ФАОЛ МАЪНАВИЯТ ТАРҒИБОТЧИСИ

Юртимиз умумий ўрта таълим мактабларининг маънавий-маърифий ишлар бўйича директори ўринбосарлари зиммасига мактаб таълимини умуммиллий ҳаракатга айлантириш борасида амалга оширилаётган ишларни янги босқичга кўтариш, ўқувчиларнинг китобхонлик даражасини ошириш, уларни халқимизнинг миллий қадрият, анъаналарини асраб-авайлашга, ҳурмат қилишга ўргатиш асносида онгида маънавий иммунитетни мустаҳкамлаш каби бири-биридан муҳим вазифалар юкланган.

Шунингдек, ўқитувчилар жамоасида соғлом маънавий муҳитни яратиш, илғор, ўз касбига ижодий ёндошадиган, интилувчан ўқитувчиларни қўллаб-қувватлаш, уларга ўз устида ишлашлари учун муносиб шароитлар яратиш, намунали ўқитувчилар тажрибаларини оммалаштириш орқали муассасада таълим сифатини оширишга эришиш ҳам уларнинг зиммасида.

Амударё туманининг Қипчоқ шаҳарчасида фаолият юритаётган 11-сонли мактаб тумандаги энг ёши улуғ таълим муассасаларидан бири саналади. Фаолияти давомида мактабда таълим олган ўқувчилардан турли соҳалар бўйича олим-у фузалолар, ижодкорлар, санъаткорлар, қишлоқ хўжалиги фидойилари етишиб чиққан мактабнинг нуфузи ҳозирги кунда ҳам намунали, дейиш мумкин.

Мактаб ўқувчилари “Энг намунали синф сардорлари”, “Камалак билимдонлари”, “Энг намунали мактаб сардорлари” танловларида, асосий фанлар олимпиадаларида муносиб ўринларни эгаллаб келишаяпти. “Беш ташаббус олимпиадаси” спорт мусобақаларида ўқувчилар спортнинг мини футбол, енгил атлетика, волейбол, шахмат турлари бўйича туманда 1-, 2-ўринларни эгаллашди. Жорий йилги битирувчиларнинг 1 нафари Ички ишлар академиясига ўқишга кирди, 2 нафар ўқувчи инглиз тилини билиш даражаси бўйича B2 сертификатига эга, 2 нафар ўқувчи мактабни олтин медаль билан тугатди. Бу натижалар жорий йилги битирувчиларининг олийгоҳларга кириш рейтинги яна ҳам ошишига хизмат қилади.

Муассасада қўлга киритилаётган ютуқларда маънавий-маърифий ишлар бўйича директор ўринбосари Қундузой Холмуродованинг муносиб ҳиссалари бор. Асли ўқитувчилар оиласи вакиласи бўлган Қундозой ушбу мактабда таълим олган, аъло баҳоларга ўқиш билан бирга шеърлар, ҳикоялар ёзиб турар, ижод намуналари “Жеткиншек”, “Амударё ҳақиқати” (ҳозирги “Тараққиёт кўзгуси”) газеталари ёритиларди.

У 2005 йилда 11-сонли мактабни тугатиб, шу йили Ажиниёз номидаги Нукус давлат педагогика институтининг филология факультетига ўқишга кирди. Олийгоҳда ҳам илмий-амалий анжуманларда фаол иштирок этиб, иқтидорини намойиш этди. 2009 йилда олийгоҳни тугатиб, ўзи ўқиган мактабда она тили ва адабиёт фани ўқитувчиси бўлиб илк меҳнат фаолитини бошлади. Шунингдек, ёшлар етакчиси вазифасида ишлади.

Айни кунда эса мактаб директорининг маънавий-маърифий ишлар бўйича ўринбосари лавозимида сидқидилдан меҳнат қилаяпти. Шу боисдан ҳам мактабда турли мавзулардаги маънавий-маърифий тадбирлар юксак савияда ўтказилади, таъсирчанлигига эришилади. Олийгоҳларда таълим олаётган талабалар, олийгоҳларни битириб, турли соҳаларда меҳнат қилаётган мактабнинг собиқ ўқувчилари билан тез-тез ўқувчиларнинг учрашувларини ўтказиб туришга алоҳида эътибор қаратади. Ҳудуднинг улкан ҳаётий тажрибага эга нуроний отахонлари, онахонлари, ибратли оилалар вакиллари билан учрашувлар эса ўқувчилар учун ибрат мактаби бўлаётир.

Қундузой Холмуродова ўқувчиларнинг келажаги учун қандай касбни танлашидан қатъий назар, маънавиятли, одобли ва фидойи бўлиб камолга етишига интилади. Бу ниятлари уни доимо ғайрат-шижоат билан ишлашга ундайверади.

Ойгул РАЖАБОВА