“Ишбилармон аёл” кўрик-танловининг туман босқичи бўлиб ўтди

Мамлакатимизда амалга оширилаётган кенг кўламли ижтимоий-иқтисодий ислоҳотлар, сиёсий жараёнлар туб мазмун-моҳиятини кенг тарзда тарғиб қилиш, юртимиз иқтисодиётида, кичик бизнес ва хусусий тадбиркорликнинг ривожланишида фаол иштирок этаётган шижоатли, ташаббускор хотин-қизларни ҳар томонлама қўллаб-қувватлаш мақсадида “Ишбилармон аёл” кўрик-танлови ўтказилиб келинмоқда.

Амударё туманида ҳам ушбу танловнинг туман босқичи бўлиб ўтди. Танловда иштирокчилар қўшимча иш ўринларини яратиш, аёлларнинг жамиятдаги фаоллигини янада ошириш юзасидан ишлаб чиққан лойиҳалари ва кўргазмалари билан қатнашдилар. Танловда қатнашчилар тикувчилик йўналиши бўйича ўзлари тайёрлаган либосларни намойиш этиб, унинг тикилиш услуби, дизайни, қандай тадбирларга кийилиши лозимлиги бўйича батафсил маълумот бердилар.

Танловнинг якуний натижаларига кўра мутлоқ ғолибликни “Тамара техтиль” масъулияти чекланган жамияти раҳбари Тамара Юсупова эгаллади. Тадбиркор аёл Республика босқичда иштирок этиш учун йўлланмани қўлга киритди. Танловда иштирок этиб юқори натижаларга эришган бошқа иштирокчилар ҳам “Замонавий ташаббускор аёл”, “Йилнинг мурувватли ишбилармон аёли”, “Инвеститцияларни жалб қилишда ташаббус кўрсатган ишбилармон аёл”, “Энг ёш, фаол аёл тадбиркор” номинациялари бўйича тақдирланди.

Айтиш керакки, Тадбиркорлар ва ишбилармон ҳаракати – Ўзбекистон Либерал-демократик партияси Қорақалпоғистон Республикаси Кенгаши, Ўзбекистон Савдо-саноат палатаси Қорақалпоғистон Республикаси бошқармаси, Ўзбекистон касаба уюшмалари федератциясининг Қорақалпоғистон Кенгаши, Қорақалпоғистон фермер, деҳқон хўжаликлари ва томорқа ер эгалари Кенгашининг қўшма қарорига асосан ўтказилаётган мазкур танловнинг белгиланган низом ва қоидаларига мувофиқ тарзда иштирокчиларнинг фаолияти объективлик ва шаффофлик таъминаланган ҳолда баҳоланди.

Танлов жараёнида иштирокчиларнинг туманда ҳунармандчиликни ривожлантираётгани, замонавий ишлаб чиқаришни йўлга қўйиш орқали янги иш ўринларини яратаётгани, аҳолига хизмат кўрсатишни қай даражада ташкиллаштиргани инобатга олинди.

Кўрик-танловнинг мутлақ ғолиби Тамара Юсупова ўзининг тадбиркорлиги, шижоатлилиги билан 50 нафардан зиёд ишсиз аёл-қизларни иш билан таъминлаган. У 2019 йилдан буён Манғит шаҳридаги кичик саноат зонасидан ажратилган бинода тадбиркорлик фаолиятини олиб бормоқда. “Тамара техтиль” масъулияти чекланган жамияти ташкил этилган вақтда 15 та иш ўрни мавжуд эди. Айни кунларда тадбиркор имтиёзли кредитлар олиб янги иш ўринларини яратишга ҳаракат қилмоқда.

Умуман олганда, танлов иштитрокчиларини фақат шартли равишдагина ғолиб ва совриндорларга ажратиш мумкин. Аслида уларнинг ҳар бири ўзлари фаолият олиб бораётган соҳаларда қўлга киритаётган ютуқлари, оилалари ва эл-юрт фаровонлиги йўлида қилаётган фидокорона меҳнатлари, интилишлари билан ҳар қандай эътирофга, эъзозга лойиқдир.

Туман ҳокимлигининг Ахборот хизмати.