“ЁНҒИН ХАВФСИЗЛИГИНИ ТАЪМИНЛАШ БЎЙИЧА ДОЛЗАРБ 30 КУН” ДОИРАСИДА МАХСУС-ТАКТИК ЎҚУВ МАШҚИ ЎТКАЗИЛДИ

Амударё туман ҳокимининг 2023 йил 8 июлдаги жорий йилнинг 10 июль - 10 август кунлари оралиғида туман ҳудудида “Ёнғин хавфсизлигини таъминлаш бўйича долзарб 30 кун” тадбирини ўтказиш тўғрисида”ги Фармойиши ижросини таъминлаш мақсадида, жорий йилнинг 17 июль санасида Амударё туманининг Дўрман овулида жойлашган “Қалдирғоч” болалар дам олиш оромгоҳида ёнғин хавфсизлигини таъминлаш бўйича кўргазмали махсус тактик-ўқув машқи ўтказилди.

Ўқув машқига Амударё тумани Фавқулодда вазиятлар бўлими Фавқулодда вазиятлар давлат тузилмаси ва фуқаро муҳофазаси бўлинмаси бошлиғи, майор Бекзод Тажибаев ҳамда бўлинма инспектори лейтенант Ҳасан Ҳайитбоевлар иштирок этишди ва машқларни белгиланган режа асосида олиб боришди.

Ушбу ўқув машқини ўтказишдан асосий мақсад оромгоҳ ҳудудида ёнғин содир бўлганда объект фуқаро муҳофазаси тузилмаларининг амалий ҳаракатларини ва кўникмаларини ошириш, табиий ва техноген тусдаги фавқулодда вазиятлар юзага келганда объект раҳбарлар таркиби ҳамда фуқаро муҳофазаси шахсий таркибининг тўғри ҳаракат қилиш кўникмаларини такомиллаштиришдан иборатдир. Шунингдек, тадбирдан бошқарув органи ва фуқаро муҳофазаси шахсий таркибининг кечиктириб бўлмайдиган ёнғин ўчириш ва қутқарув ишларига тайёргарлигини кучайтириш, фавқулодда вазиятлар юзага келганда фуқаро муҳофазаси шахсий таркибининг ўз мажбуриятларини аниқ ва тўғри бажаришини амалиётда синаш ва ўрганиш каби мақсадлар ҳам кўзланган. Махсус тактик ўқув машқи ўтказиш орқали дам олаётган ўқувчи-ёшларга ёнғиннинг олдини олиш ва бартараф этиш бўйича тушунчалар бериш ва бирламчи ёнғин ўчириш воситалари тўғрисида маълумотлар тақдим этиш орқали ўқувчи-ёшларнинг бу борадаги кўникмаларини ривожлантириш ҳам кўзда тутилган.

Ўқув машқининг 1-босқичида “Қалдирғоч” болалар дам олиш оромгоҳидаги майдонда ёнғинлар билан боғлиқ бўлган фавқулодда вазиятлар рўй берганда объект фуқаро муҳофазаси тузилмасининг тезкорлик билан фавқулодда вазиятларни бартараф этиш ҳаракатлари амалда кўрсатиб берилди.

2-босқичда эса “Қалдирғоч” болалар дам олиш оромгоҳида ёнғин содир бўлганда жабрланганларни хавфсиз ҳудудга олиб чиқиш ва биринчи тиббий ёрдам кўрсатиш ҳамда ёнғинни бартараф этиш ҳаракатлари амалда кўрсатилиб, тадбир иштирокчиларига зарур тавсиялар тақдим этилди.

Ўқув-машқининг иккала босқичи ҳам кўргазмали воситалар орқали олиб борилгани боис, оромгоҳда дам олаётган ўқувчи-ёшлар ҳақиқатдан ҳам ёнғин содир бўлган қалтис вазиятларда асосан нималарга эътибор қаратиш зарурлигини, шунингдек, оддий фуқароларнинг ёнғин-қутқарув хизмати ходимларининг кўрсатмаларига амал қилиши борасидаги кўникмаларига эга бўлдилар.

Оромгоҳда дам олаётган болалар ҳам ёнғин хавфсизлиги қоидаларига риоя қилиш бўйича дастлабки билим ва кўникмаларга эга бўлдилар. Амалиёт шуни кўрсатадики, одатда ёнғин содир бўлаётганда болалар ҳеч ким топа олмайдиган жойга яширинишади. Бола хавф ҳақида хабар бермоқчи бўлиб, қичқириши мумкин, аммо бундай ҳолларда овоз одатда чиқмай қолиш мумкин. Шунинг учун болаларга хавфсизлик қоидаларини кичкиналигиданоқ ўргатиш ва ёнғин қандай хавфли эканини тушунтириш лозим.

Тадбир якунида оромгоҳда дам олаётган ўқувчи-ёшлар масъулларга ўзларини қизиқтирган саволлар билан мурожаат қилдилар ва зарур жавоблар олдилар.

И.Ҳосилов, Амударё тумани ФВБ бошлиғи, подполковник.