Туман ҳокимининг қипчоқлик ёшлар билан учрашуви очиқ мулоқот тарзида бўлиб ўтди

8 июнь куни Қипчоқ овул фуқаролар йиғини биносида туман ҳокимининг Қипчоқ овул фуқаролар йиғини ва Қипчоқ шаҳарча фуқаролар йиғини ҳудудида истиқомат қилувчи ёшлар билан учрашуви бўлиб ўтди.

Учрашувда туман ҳокими Султонбой Йўлдашев, туман Халқ қабулхонаси бўлими мудири Эркин Ражабов, туман ҳокими ўринбосари Маҳмуд Шерметов, Ёшлар ишлари агентлиги туман бўлими бошлиғи Сардор Исмаилов ҳамда фаол ёшлар иштирок этишди.

Учрашувда туман ҳокими Султонбой Йўлдашев тарихан қисқа даврда Ўзбекистон ёшлари эришган муваффақият ва ютуқлар замирида давлатимиз томонидан кўрсатилаётган катта ғамхўрлик ва юксак эътибор мужассам эканлигини таъкидлади.

Шунингдек, “Июнь ойи – ёшлар ойлиги” доирасида ёшлар манфаатига хизмат қилувчи кўплаб йирик амалий лойиҳалар, турли хил интеллектуал танловлар, семинар ва учрашувлар, бизнес-марафонлар, спорт мусобақалари ҳамда гала концертлар ўтказиш режалаштирилганини айтиб ўтди.

Самимий ва очиқ мулоқот тарзида бўлиб ўтган учрашувда ёшларнинг бизнес ғоялари, ташаббуслари тингланди ва қўллаб-қувватланди. Тадбиркорлик қилиш истагидаги ёшлардан айримлари туман ҳокимига мурожаат қилди.

Жумладан, Қипчоқ овул фуқаролар йиғини ҳудудида истиқомат қилувчи Феруза Сабирова ўз тадбиркорлик фаолиятини тикувчилик йўналиши бўйича бошлаш нияти борлигини ва субсидия асосида тикув машинаси олиш истаги борлигини айтиб мурожаат қилган бўлса, яна бир бўлғуси тадбиркор Санобар Маткаримова ўз маҳалласи ҳудудида гўзаллик салони очиш нияти борлигини билдириб зарурий жиҳозлар учун субсидия ажратилишида амалий ёрдам сўради.

Ундан ташқари, маҳаллада истиқомат қилувчи ижтимоий ҳимояга муҳтож ёшлардан бирининг онаси Озода Сафарбаева ҳам фарзандининг операцияси учун амалий ёрдам сўраб мурожаат қилди.

Туман ҳокими Қипчоқ овули ёшлари томонидан келиб тушган ҳеч бир мурожаат эътибордан четда қолмаслигини, мазкур мурожаатлар бироз вақт талаб этани учун албатта ўрганиб чиқилиб ижобий ҳал қилинишини маълум қилди.

Учрашувда Қипчоқ шаҳарчаси ҳудудида истиқомат қилувчи ёшлар ҳам ўз таклиф ва муаммолари билан туман ҳокимига мурожаат қилдилар.

Шу маҳалланинг фаол ёшларидан бири Улуғбек Муродов субсидия асосида мотокультиваторга эга бўлса ҳамқишлоқларига беминнат хизмат кўрастишни, Гулбарчин Камолова эса субсидия асосида тикув машинаси олиб аёл-қизларга бежирим либослар тикиб беришни мақсад қилишганини айтиб мурожаат қилишди.

Ушбу ёшларннинг ҳам мурожаати туман ҳокими ва тегишли ташкилот мутасаддилари томонидан қайд этилиб тез кунларда ижобий ҳал этилишига келишиб олинди.

Учрашув якунида туман ҳокими барча ёшларни яқинлашиб келаётган “Ёшлар куни”ни билан самимий табриклаб, ўқиш ва ишларида муваффақият тилади.

Туман ҳокимлигининг Ахборот хизмати.