69-СОНЛИ МАКТАБДА “ЁШ ТАБИАТШУНОСЛАР” ТАДБИРИ ЎТКАЗИЛДИ
Аёқчи маҳалласидаги 69-сонли мактабда кимё ва биология фанлари тўгараги аъзолари иштирокида буюк олим Чарлз Дарвин таваллудининг 214 йиллиги ва Дмитрий Менделеев таваллудининг 189 йиллиги муносабати билан “Ёш табиатшунослар” байрам тадбири ташкил этилди.
13 арель куни бўлиб ўтган мазкур тадбирда мактаб ўқитувчилари ва ўқувчилари иштирок этишди. Мактабнинг олий тоифали кимё ва биология фани ўқитувчилари Минавар Матчонова ҳамда Хосият Ўрозбоевалар томонидан ташкил этилган ушбу тадбирни 10-синф ўқувчилари Машҳура Жуманиёзова, Ўғилжон Отажоновалар олиб боришди.
Тадбирда мактабнинг 9-11-синф ўқувчилари фаол иштирок этишди. Дастлаб ўқувчилар кимёвий элементларга шеърий таъриф бериб, ўзларини таништириб чиқишди. Бир гуруҳ ўқувчилар эса элементларни рақс тарзида кўрсатиб беришди.
Тадбирда таъкидланганидек, кимё ва биология фанлари фармацевтика, озиқ-овқат, нефт ва газни қайта ишлаш, қурилиш материалларини ишлаб чиқариш, тоғ-кон саноати, экология ва атроф-муҳитни муҳофаза қилиш, тиббиётнинг турли тармоқларида ўта муҳим ҳисобланади. Ўта мураккаб бўлишига қарамасдан бу фанлар жуда қизиқарли бўлгани сабабли мактабда ташкил этилган тўгаракда юқори синф ўқувчилари фаол иштирок этишади.
Мактабда дарс ва тўгарак машғулотлари давомида очиқ дарслар, семинарлар, лаборатория дарслари ташкил этилади ва ўқувчилар билан биргаликда элементлар таништириб борилади. Чунки ҳозирги даврда кимё ва озиқ-овқат саноатлари ривожланиб борган сари малакали кадрларга ҳам эҳтиёж ортаётгани сабабли кимё ва биология фанларини чуқур ўқитилиши олий таълим муассасаларида саноат корхоналарига малакали кадрларни етиштиришда, кейинчалик етук илмий ходимлар, тиббиёт ходимларини тайёрлашда тайёрлашда муҳим омил саналади.
Тадбир давомида ўқувчилар кимё фани билан бирга биология фанидан ҳам билимдонликларини намойиш этиб, ер юзидаги ноёб ўсимликларни таништириб ўтишди. Биология фанида ҳаётдаги тирик организмлар ва табиий жамоаларнинг тузилиши, функцияси, тирик мавжудотларнинг келиб чиқиши ва тарқалиши, уларнинг бир-бири ва тирик табиат билан ўзаро боғланишини ўрганишаётганини айтиб, тарихда бобокалонларимиз фаннинг ривожига ўз ҳиссасини қўшгани тўғрисида гапириб ўтишди. Шунингдек, Абу Райҳон Берунийнинг табиат 5 элементга, яъни бўшлиқ, ҳаво, олов, сув ва тупроқдан яратилган деб эътироф этгани, у ўзининг «Ҳиндистон» асарида табиатни дарахтдаги энг бақувват ва соғлом новдаларининг ўсишига имкон берадиган боғбонга ўхшатганини, бу билан у тирик организмлар ўртасида яшаш учун кураш бориши ва табиий танланиш содир бўлишини башорат килганини, замонавий фанда бу ўзининг исботини топгани ҳақидаги маълумотларни сўзлаб беришди.
Тадбирда мактабнинг 10-11-синф ўқувчилари иштирокида табиатни асраш, унга дўстона муносабатда бўлиш, экологик муаммоларни бартараф этишга биргаликда ҳаракат этиш кабиларни акс эттирган чуқур маъно ва мазмунга, тарбиявий аҳамиятга эга бўлган саҳна кўринишларини тақдим этишди. Қизиқарли ўтган тадбирда ўқувчилар кимё ва биология фанлари ҳамда унинг ривожига муносиб ҳисса қўшган аллома бобокалонларимиз, буюк олимлар Чарлз Дарвин ва Дмитрий Менделеевлар ҳақида кенг ва батафсил маълумотларга эга бўлдилар. Қизиқарли ўтган тадбир барчага манзур бўлди.
Хосият Ўрозбоева, шу мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
