“Янги Конституция− халқ дардига қулоқ солувчи давлат асоси!" шиори остида тарғибот тадбири бўлиб ўтди

Айни кунларда мамлакатимиз бўйлаб умумхалқ Референдуми олдидан “Янги Конституция − халқ дардига қулоқ солувчи давлат асоси!” шиори остида тарғибот тадбирлари, концерт дастурлари ўтказилмоқда. Уларда жамоат арбоблари, эстрада юлдузлари, спортчилар, давлат идоралари вакиллари, тадбиркорлар, иқтидорли ёшлар чиқиш қилмоқда.

Мана шундай тарғибот тадбири Амударё туманида ҳам ўтказилди.

10 апрель куни туманнинг чекка ҳудудларидан бири бўлган Холимбег овули ҳудудида жойлашган 35-сонли мактабда янгиланаётган Конституция тарғиботига бағишланган тадбир бўлиб ўтди. Унда республика ишчи гуруҳ азолари, Олий Мажлис Қонунчилик палатаси депутати Зумрад Бекатова, иқтидорли ёшлар, педагог ходимлар, фаол аёл-қизлар ҳамда  маҳалла аҳли иштирок этишди.

Тадбирда Олий Мажлис Қонунчилик палатаси депутати Зумрад Бекатова йиғилганларга Бош қомусимизга киритилаётган ўзгартишларнинг мазмун-моҳияти, таълим ривожи, соғлиқни сақлаш масалаларига доир муҳим жиҳатлар хусусида маълумотлар берди.

Депутат ўз сўзида Асосий Қонунимиз мамлакатимизда янги ҳаёт, янги жамият барпо этиш йўлида қўлга киритилаётган барча ютуқ ва марраларимизнинг ҳуқуқий пойдевори – келажагимизнинг ишончли кафолати эканлигини таъкидлаб, Ўзбекистон Республикаси Олий Мажлиси Қонунчилик палатаси мамлакатимизнинг янги таҳрирдаги Конституцияси тўғрисидаги Қонунини қабул қилганлиги, ушбу Қонун умумхалқ референдумида овозга қўйилиши ва унда ҳар бир фуқаро иштирок этиб, ўз фуқаролик бурчини бажармоғи лозимлигини алоҳида қайд этиб ўтди.

Тадбирда ишчи гуруҳ азоси, “Оила ва хотин-қизлар” илмий тадқиқот институти директори ўринбосари, педагогика фанлари доктори, профессор Ойниса Мусурманова ҳам маъруза қилди.

У янгиланаётган Конститутциявий қонун лойиҳаси матнининг 50- ва 52-моддаларида мактаб  ва мактабгача таълимни ривожлантириш бўйича қатор ҳуқуқий асослар келтириб ўтилганини қайд этиб, 30 апрель куни барчани ўз келажагимиз ва ҳақ-ҳуқуқларимиз кафолати учун овоз беришга чақирди.

Шундан сўнг, Қорақалпоғистон Республикаси Вазирлар Кенгаши Раиси ўринбосари Марям Аҳмедова Янгиланаётган Конституция мамлакат ривожи, аҳолининг тинч ва фаровон турмуш кечириши, юртнинг тараққий этиши учун муҳим ҳуқуқий асос эканини таъкидлаб ўтди. Янгиланаётган Конституцияда давлат тузилиши, ҳокимият ва бошқарув органлари тизими, уларнинг ваколат ҳамда мажбуриятлари, шакллантирилиш тартиби, сайлов тизими, фуқароларнинг ҳуқуқ ва эркинликлари, жамият ва шахснинг ўзаро муносабатлари, шунингдек, суд тизими ҳамда давлат ва жамиятнинг ўзаро муносабатлари янада аниқ ва равшан белгилаб берилгани алоҳида эътироф этилди.

Тадбир давомида “Зулфия” номидаги Давлат мукофоти соҳибаси Барно Самандарова Конституциямизнинг 44-моддасида мажбурий меҳнат, болаларнинг баркамол ривожланишига салбий таъсир қиладиган ҳар қандай болалар меҳнати тақиқланаётганини таъкидлади. У ўз нутқида 30 апрель кунги Референдумда тенгдошларининг ва ўзининг ҳақ-ҳуқуқлари мустаҳкам кафолатлаб қўйилаётган Янгиланаётган Конституциямизга овоз беришини таъкидлади ва ёшларни ҳам шунга чорлади.

Тарғибот тадбирида Холимбег овулидаги мактабгача таълим муассаси тарбияланувчилари, 17-, 35-сонли мактабларнинг иқтидорли ўқувчилари томонидан она Ватан, тинчлик ва дўстликни тараннум этувчи гўзал куй-қўшиқлар ижро этилди.

Шу ўринда айтиш керакки, Конституциявий қонун лойиҳаси бўйича умумхалқ муҳокамаларида жами 222 минг 715 та таклифлар келиб тушган ва уларнинг 25 фоизи лойиҳага киритилган. Лойиҳани тайёрлашда 400 дан ортиқ халқаро ҳужжатлар, 190 га яқин давлат тажрибаси ўрганилган. Янгиланаётган Конституция моддалари 128 тадан 155 тага кўпайиб, нормалар 275 тадан 434 тага ошмоқда ҳамда Асосий Қонунимизда Ўзбекистон ҳуқуқий, ижтимоий, дунёвий демократик давлат эканлиги белгилаб қўйилмоқда. 

Тадбирдан сўнг, ишчи гуруҳ вакиллари тумандаги Аёлларни реабилитация қилиш ва мослаштириш марказида бўлиб, аёлларни қўллаб-қувватлаш ҳамда ижтимоий-психологик ёрдамга муҳтож аёлларга кўрсатилаётган эътибор билан яқиндан танишдилар.

Маҳалланинг фаол онахонлари, психологлар билан кечган суҳбат жараёнида оилавий ажримларнинг олдини олиш, “Аёллар дафтари”га киритилган аёлларга психологик ёрдам кўрсатиш, тушкунликка тушиб қолган аёлларни соғлом ҳаётга қайтариш, уларнинг саломатлигини тиклаш муҳим вазифа эканлиги таъкидланиб, маҳаллаларда психологик тренинглар, бепул тиббий кўрикларни кўпроқ ташкил этиш лозимлиги қайд этилди.

Учрашувда нуроний онахонлардан оилалар тинчлигини мустаҳкамлаш бўйича тавсия ва маслаҳатлар олинди. 

Туман ҳокимлигининг Ахборот хизмати.