Фаровон маҳалласи ҳақиқатдан ҳам фаровон!

Маҳалланинг ободлиги - она Ватаннинг ободлиги, том маънода мамлакат ва миллат фаровонлигидир. Мамлакатнинг ҳар жиҳатдан тараққий этиши учун меҳнат майдонларида фидойилик кўрсатувчи халқ маҳаллада яшайди, ижод қилади, янгиликлар яратади. Келажагимиз эгалари бўлган баркамол авлодни вояга етказишдек шарафли вазифани амалга оширади. Шунинг учун ҳам маҳалла ҳар даврда ўзининг муқаддаслиги билан эътибору, эътирофда бўлган.

 Амударё туманининг Фаровон маҳалласи, номига яраша обод ва фаровон маҳалла. Ушбу маҳаллада 642 хонадонда 2456 нафар фуқаро истиқомат қилади. Эътиборлиси, маҳалладаги 710 та оилада кейинги 3 йил ичида бирон марта ажрим ёки жиноятчилик билан боғлиқ ҳолатлар содир бўлмади.

Маҳалла раиси Мадамин Казаков, хотин-қизлар фаоли Сайёра Карабаева, ҳоким ёрдамчиси Муқаддас Бекназарова, профилактика инспектори Руфат Матназаров, ёшлар етакчиси Шохруҳ Рўзметовларнинг ўзаро ҳамкорликда ва ҳамжиҳатликда самарали иш фаолиятини йўлга қўйганлиги натижасида оилавий қадриятлар мустаҳкамланиб, маҳалла инфратузилмаси тобора яхшиланоқда, аҳоли бандлиги таъминланмоқда.

Жумладан, 2023 йилнинг дастлабки 3 ойи давомида хотин-қизлар ва ҳоким ёрдамчиси кўмаги билан 5 нафар хотин-қизга тадбиркорлик фаолиятини бошлаши учун имтиёзли кредитлар ажратилди. 2 нафар аёл ишга жойлаштирилди.

Маҳалла аҳлининг ўзаро бирдамлиги, оғизбирчилиги туфайли ҳудудда каттагина маҳалла боғи яратилди. Ушбу боғда мевали дарахт кўчатлари ҳар баҳор ва куз мавсумларида экилиб кўпайтириб борилади. Бу йилги баҳор мавсумида ҳам маҳалла аҳли 50 тупдан ортиқ мевали ва манзарали дарахт кўчатларини экишди. Аҳамиятлиси, экилган ҳар бир ниҳолнинг келажакда катта дарахт бўлиб етишиши учун бир нафар ёш оила бириктириб қўйилди. Ёш оиланинг эндигина куртак ёзаётган ниҳолларга бириктирилишда ҳам қандайдир рамзий маъно бордек.

 Фаровон маҳалласида ёш келинларга, турмуш остонасида турган ёш қизларга ўрнак ва ибрат бўлиб, оилалар мустаҳкамлигига ўз ҳиссасини қўшиб келаётган маҳалланинг 12 нафар ёши улуғ онахонларидан тузилган “Оқила аёллар ҳаракати” ҳам самарали тарзда фаолият олиб бормоқда.

 Ҳаракатнинг фаол азолари Дилбар Хўжамуратова, Моможон Аннамедовалар хотин-қизлар фаоли Сайёра Карабаева билан ҳамкорликда ёш қизлар ўртасида кийиниш маданияти, эрта никоҳ, эрта туғруқ, соғлом турмуш тарзига амал қилиш каби мавзуларда тарғибот тадбирларини, давра суҳбатларини олиб бормоқда.

 Шунингдек, профилактика инспектори билан ҳамкорликда ёшлар орасида жиноятчиликнинг олдини олиш, одам савдосига қарши курашиш бўйича учрашувлар, профилактик тадбирлар ўтказилиб келинмоқда.

Маҳалланинг фаол аъзоси Моможон Аннамедова ташкил этилаётган ушбу тадбирларда ҳамиша фаол. У ўзидаги бор ҳаётий тажрибани ёшларга улашгиси келади. Бугунги кунда у турмуш ўртоғи билан кексалик гаштини суриб неваралар тарбиясида бўлса ҳам маҳалла ишларига аралашмасдан туролмайди. Узоқ йиллар мобайнида ўқитувчилик қилиб фарзандларини уйли-жойли қилган ушбу нуронийларнинг уйидан асло файз аримайди.

 Моможон Аннамедова ўз келинларига, маҳалланинг ёш келинларига насиҳат қилганда энг аввало, сабрли бўлиш кераклигини, исрофгарчиликка йўл қўймаслик, ҳар бир нарсани тежаб ишлатиш лозимлигини, оилада юзага келган ноҳуш вазиятларда ҳам муаммони босиқлик билан ҳал қилиш лозимлигини таъкидлайди.

 Маҳаллада Моможон Аннамедова сингари онахонлар жуда ҳам кўп. Уларнинг ёшларга бераётган ўгит ва насҳатлари, бой ҳаётий тажрибалари туфайли Фаровон маҳалласи обод, оилалар турмуши фаровон.

Туман ҳокимлигининг Ахборот хизмати.