Қорақалпоғистон Республикаси Жўқорғи Кенгеси Раиси Аманбай Оринбаев Амударё туманида бўлди

Қорақалпоғистон Республикаси Жўқорғи Кенгеси Раиси Аманбай Оринбаев Амударё туманини ижтимоий-иқтисодий жиҳатдан ривожлантириш ҳамда аҳоли турмуш шароитини янада яхшилаш йўналишларида амалга оширилаётган ишлар билан танишиш мақсадида 15 ноябрь куни туманда бўлди.

Дастлаб Жўқорғи Кенгес Раиси тумандаги бунёдкорлик ишларини кўздан кечириб, қурилиш суръати белгиланган режадан орқада қолаётга объектлар – 27-сонли мактаб ва 30-сонли мактабгача таълим ташкилоти фаолияти билан яқиндан танишди ҳамда мутасаддиларга тегишли топшириқлар берди.

Шундан кейин туман ҳокимлиги биносида Қорақалпоғистон Республикаси Жўқорғи Кенгеси Раиси Аманбай Оринбаев Амударё тумани фаоллари, муассаса, корхона ва ташкилотлар раҳбарлари, шунингдек Қорақалпоғистон Республикаси миқёсидаги вазирликлар, бошқармалар ва ташкилотлар раҳбарлари иштирокида йиғилиш ўтказди.

Йиғилишда туман аҳолиси кундалик ҳаётида учраётган муаммоларга ечим топиш, аҳолининг фаровон турмуш кечиришини таъминлаш йўлида амалга оширилаётган чора-тадбирлар ва бу йўналишда баъзи соҳаларда йўл қўйилаётган камчиликлар ҳақида сўз юритилди.

Танқидий руҳда ўтказилган йиғилишда кўпчилик бюджет ташкилотларида давлат бюджетидан ажратилган маблағларни тасарруф этиш жараёнида молиявий хато-камчиликлар учраётгани, маблағларни мақсадсиз ишлатилиш ҳолатлари рўй бераётганлиги алоҳида таъкидланди. Ўрганишлар давомида Амударё туманида ҳам шу каби нохуш ҳолатлар аниқланган. Бу каби қонун бузилиш ҳолатларини бартараф этиш ва келгусида такрорланишининг олдини олиш бўйича мутасаддиларга ҳамда иқтисодий соҳа масъулларига тегишли топшириқлар берилди.

Шунингдек, фуқаролар мурожаатлари билан ишлашда ҳам қатор камчиликлар мавжудлиги, асосан ҳудуд аҳолисини ижтимоий қўллаб-қувватлаш, коммунал хизматлар сифати, турар жой билан таъминлаш, ички йўлларни таъмирлаш масалаларида кўплаб мурожаатлар келиб тушаётгани таъкидланди.

Бундан ташқари, таълим, ёшлар билан ишлашиш, транспорт хизматини кўрсатиш, давлат дастурлари ижросини таъминлаш, маҳсулотларини экспорт қилиш каби соҳаларда қўшимча имкониятлар мавжудлиги таъкидланиб, уларни ишга солган ҳолда туманнинг ижтимоий-иқтисодий ривожланиш суратини янада яхшилаш лозимлиги айтиб ўтилди.

Айтиш жоизки, мамлакатимизда ижтимоий ҳимояга муҳтож кишиларни, айниқса аёл-қизларни моддий ва маънавий қўллаб-қувватлаш борасида тизимли ишлар амалга оширилмоқда. Жумладан, боқувчисини йўқотган ва ижтимоий ҳимояга муҳтож оилаларни уй-жой билан таъминлаш борасида ҳам қатор амалий ишлар қилинмоқда.

Шу куни Амударё тумани Бойовул маҳалласида яшовчи ижтимоий ҳимояга муҳтож, боқувчисини йўқотган Малика Аҳмедовага Қорақалпоғистон Республикаси Жўқорғи Кенгеси Раиси Аманбай Оринбаев томонидан Президентимизнинг совғаси – 2 хонали уй совға қилиниши ҳам бу борада амалга оширилаётган ишларнинг амалий исботи бўлди.

Бундан ташқари, оиланинг доимий даромад манбаини яратиш мақсадида икки нафар фарзанднинг онаси Малика Аҳмедова туманидаги 43-сонли мактабгача таълим ташкилотига ишга жойлаштирилди.

Йиғилиш якунида Қорақалпоғистон Республикаси Жўқорғи Кенгеси Раиси томонидан жорий йил якунигача тумани ижтимоий-иқтисодий ривожлантириш ва аҳоли турмуш фаровонлигини янада яхшилаш мақсадлари учун жами 20 миллиард 855,3 миллион сўм маблағ ажратилиши таъкидланди.

Қорақалпоғистон Республикаси Жўқорғи Кенгесининг Ахборот хизмати.

Туман ҳокимлигининг Ахборот хизмати.