БОБУР НОМЛИ ОВУЛИДАГИ ОИЛАВИЙ ПОЛИКЛИНИКА АҲОЛИГА СИФАТЛИ ТИББИЙ ХИЗМАТ КЎРСАТИБ КЕЛМОҚДА

Юртимизда аҳолига малакали тиббий хизмат кўрсатилишини таъминлаш мақсадида кам самарали қишлоқ врачлик пунктлари мақбуллаштирилиб, уларнинг негизида қишлоқ оилавий поликлиникалари ташкил этилган эди. Айни пайтда улардаги кундузги стационарларда беморларга педиатр, терапевт, акушер-гинеколог, стоматолог, жарроҳ каби тор соҳа мутахассислари хизмат кўрсатиши йўлга қўйилган.

Саломатликни мустаҳкамлаш, ҳар томонлама соғлом ва баркамол авлодни вояга етказиш, халқимиз турмуш фаровонлигини янада юксалтириш йўлида замонавий шароит яратишга қаратилаётган бу каби алоҳида эътибор одамларнинг ҳаётдан рози бўлиб яшашида, эртанги кунга ишончи янада ортишида муҳим аҳамият касб этмоқда.

Амударё туманидаги Бобур номли овулда жойлашган 4-сонли оилавий поликлиникада ҳам тиббий хизмат кўрсатиш сифатини янада яхшилаш мақсадида аниқ тадбирлар белгилаб олинган бўлиб, уларнинг ижроси тўлиқ таъминланмоқда. Туман тиббиёт бирлашмасига қарашли ушбу оилавий поликлинкада кўрсатилаётган тиббий хизматдан ҳудуд аҳолиси жуда мамнун.

Мазкур тиббиёт масканида ҳудуддаги 10 минг 891 нафар аҳолига хизмат кўрсатилади. Шундан 5 минг 529 нафарини эркаклар, 5 минг 362 нафарини аёллар, 3 минг 378 нафарини 14 ёшгача бўлганлар, 576 нафарини 15-17 ёшгача бўлганлар, 6932 нафарни эса 18 ёшдан катталар ташкил қилади. Шунингдек, 1 ёшгача бўлган болалар 240 нафар, туғиш ёшидаги аёллар 2 минг 781 нафардан иборат. Оилавий поликлиника ҳудудида 7 та мактаб, 4 та давлат ва 1 та нодавлат мактабгача таълим муассасалари мавжуд.

Муассасадаги тиббий хизматлардан Бобур номли овул аҳолисидан ташқари, Жумуровул маҳалласи ва Жумуртов шаҳарчаси фуқаролари ҳам фойдаланади. Ҳудуддаги 1 минг 960 та хонадонга 6 нафар умумий амалиёт шифокори ва 30 нафар ўрта тиббиёт ходими, шундан 17 нафари патронаж ҳамширалари бириктирилган.

Оилавий поликлиникада шифокор ва патронаж ҳамширалар ўзларига бириктирилган ҳудудлардаги оилалар тиббий-ижтимоий ҳолатини ўрганиш борасида ҳам тегишли чора-тадбирларни амалга оширишмоқда. Айрим ҳолларда беморларни уйида кўрикдан ўтказиш ва зарур муолажаларни амалга ошириш, эмлаш орқали турли юқумли касалликларнинг олдини олиш ишлари йўлга қўйилган.

Ҳудудда рўйхатга олинган фертиль ёшидаги аёллар саломатлиги ҳам доимий назоратда. Ўтган 2021 йилнинг 9 ойи давомида ҳудудда 174 нафар, жорий 2022 йилнинг 9 ойи давомида эса 170 нафар чақалоқ туғилиши қайд этилди. Жорий йилнинг 9 ойда рўйхатга олинган 234 нафар ҳомиладор аёлларга Вазирлар Маҳкамасининг “Республиканинг қишлоқ туманларида оналар ва болаларнинг репродуктив саломатлигини мустаҳкамлашга доир қўшимча чора-тадбирлар тўғрисида”ги қарори ижросини таъминлаш мақсадида поливитамин, витамин комплекслари берилиб борилмоқда. Ҳисобдаги аёлларнинг 17 нафари республика Скрининг марказида тўлиқ текширувдан ўтишга юборилди. Шунингдек, ҳудуддаги 70 ёшдан катта бўлган 285 нафар қарияларга кальций Д3 препаратлари тарқатилди.

Поликлиникада бирламчи тиббий ёрдам кўрсатиш, ташхис қўйиш, лаборатория, соғломлаштириш муолажаларини амалга ошириш хоналари ишлаб турибди. Айниқса, тор доирадаги мутахассисларнинг фаолият кўрсатаётгани аҳолига кўплаб қулайликлар яратмоқда.

Туман марказидан олисда жойлашган ҳудуддаги ушбу маскан тиббиёт ходимларининг самарали фаолияти ва бу ерда яратилган замонавий шароитлар аҳолига сифатли тиббий хизмат кўрсатиш ва саломатлигини янада яхшилаш, юқумли касалликлар бўйича барқарор ҳолатни сақлаш ҳамда болалар ўртасида касалликка чалиниш ҳолатларини камайтириш имконини бермоқда. Тиббий кўрик ва маслаҳат учун туман марказига қатнашларига ҳожат қолмагани, узоғи яқин бўлганидан, шу ернинг ўзида сифатли тиббий хизматдан фойдаланиш имконияти яратилгандан Бобур номли овул аҳолиси жуда мамнун.

О.Худойберганова.