ЎЗБЕКИСТОН МАҲАЛЛАСИДА ТИББИЁТ БИРЛАШМАСИ РАҲБАРИНИНГ АҲОЛИ БИЛАН УЧРАШУВИ ВА ЧУҚУРЛАШТИРИЛГАН ТИББИЙ КЎРИК ТАШКИЛ ЭТИЛДИ

Президент Шавкат Мирзиёев раҳбарлигида шу йил 28 март куни кенгайтирилган тарздаги видеоселектор йиғилиши ўтказилиб, унда соғлиқни сақлаш соҳаси масъулларига қатор топшириқлар берилган эди. Шунга кўра туманлар тиббиёт бирлашмалари раҳбарлари маҳаллаларда учрашувлар ўтказиб, тиббиёт соҳасидаги кенг кўламли ислоҳотлар, уларнинг натижалари, соҳага оид янгиликлар, аҳолига бирламчи ва ихтисослашган тиббий хизматлардан фойдаланиш бўйича яратилаётган имкониятлар ва ўзлари томонидан амалга оширилаётган ишлар ҳисоботларини аҳолига шахсан етказиб боришмоқда.

Амударё туманида ҳам Тиббиёт бирлашмаси бошлиғи Фахриддин Абдуллаев томонидан овул ва маҳаллаларда аҳоли билан учрашувлар, тиббиёт ходимлари иштирокидаги чуқурлаштирилган тиббий кўриклар ташкил этилмоқда.

Шу йил 24 сентябрь куни Ўзбекистон маҳалласида ҳам туман Тиббиёт бирлашмаси бошлиғининг аҳоли билан учрашуви бўлиб ўтди. Маҳалладаги 5-сонли оилавий поликлиникада бўлиб ўтган мазкур учрашувда Бирлашма раҳбари тиббиётни ривожлантириш бўйича белгиланган вазифалар ижросига доир 9 ойлик ҳисобот билан таништириб, соҳада амалга оширилган ишлар, келгусидаги режалар ҳақида батафсил маълумотлар берди. Шу билан, бирга тиббиёт бирлашманинг тор доирадаги мутахассислар, яъни терапевт, кардиолог, эндокринолог, офтальмолог, жарроҳ, невропатолог, акушер-гинеколог шифокорлари иштирокида тиббий кўрик ўтказилди.

Шу куни 387 нафар фуқаро тиббий кўрикдан ўтказилиб, уларнинг 91 нафарида турли касалликлар аниқланди. Беморларнинг 89 нафарига амбулатор ва 2 нафарига стационар шароитда даволанишга тавсия қилинди. Шунингдек, маҳалланинг 32 нафар фуқароси ЭКГ, 47 нафари УЗИ текширувлари ўтказилди. Уйда ётган 1 нафар бемор аҳволидан хабар олиниб, керакли тавсиялар ва дори-дармонлар берилди.

Ўзбекистон маҳалласидаги 5-сонли қишлоқ оилавий поликлиникасида аҳолига бирламчи тиббий-санитария ёрдами кўрсатилади. Муассасада 7 нафар шифокор, шундан 4 нафари умумий амалиёт шифокори ҳамда 24 нафар ўрта тиббиёт ходимлари фаолият юритмоқда.

Ушбу тиббиёт маскани туман марказидан 21 км. узоқликда жойлашган. Маҳалладан тиббиёт масканигача бўлган масофа 5 км.ни ташкил қилади. Оилавий поликлиникада бир сменада қатновлар 60 қувватига эга бўлган амбулатория-поликлиникаси ҳам фаолият кўрсатади.

Маҳалла ҳудудидаги 578 та хонадонда 3481 нафар аҳоли яшайди. Аҳолининг 1641 нафари аёллар, 1840 нафари эса эркаклардир. 1 ёшгача бўлган болалар 67 нафарни, 14 ёшгача бўлганлар 854 нафарни, 15-17 ёшдагилар 217 нафарни ташкил қилади. Аҳолининг 1132 нафари 18-40 ёшлилар, 1287 нафари 41 ёш ва ундан катталар, 831 нафари эса туғиш ёшдаги аёллардан иборат. Шунингдек, рўйхатдаги ногиронлар сони 51 нафарни, ногиронлиги бўлган болалар эса 11 нафарни ташкил қилади.

Ҳудудда жорий йил давомида 40 та, ўтган йили 44 та туғилиш қайд қилинган. Ундан ташқари, шу йилнинг апрель ойида қандли диабет касаллигини аниқлаш мақсадида скрининг текширувлари ўтказилиб, 3 нафар беморда қандли диабет касаллиги аниқланди ва назоратга олинди. Эндокринолог шифокор билан биргаликда беморларни соғломлаштириш ишлари олиб борилди.

Камқонликнинг олдини олиш мақсадида ҳудудда 10-17 ёшлардаги 224 нафар кизларга “Феррумфуморат” таблеткаси берилди. Шунингдек, камқонликнинг олдини олиш ва профилактика қилиш мақсадида туғиш ёшидаги 18-35 ёшлар оралиғидаги 636 нафар аёл-қизларга “Фолий кислотаси” таблеткаси, 3-15 ёшдаги 759 нафар болаларга “Антиструмин” таблеткаси, 97 нафар ҳомиладор аёлларга эса “Торивит” таблеткаси берилди.

Юрак-қон томир касалликлари билан “Д” ҳисобда турган, туғма юрак нуқсони ташхиси қўйилган 15 ёшли бир нафар беморга ордер берилиб, Тошкент шаҳридаги ихтисослашган марказда жарроҳлик амалиёти ўтказилди.

Туман Тиббиёт бирлашмаси раҳбари иштирокида ўтказилган учрашув давомида маҳалла аҳолиси шу каби маълумотлар билан танишиб, ўзларини қизиқтирган саволларга жавоблар олдилар.

Ўтказилган чуқурлаштирилган тиббий кўрикда касаллик белгилари аниқланган беморларга тиббий тавсиялар, маслаҳатлар берилиб, соғлом турмуш тарзига амал қилиш тартиби батафсил тушунтирилди.

Бу каби тадбирлар бошқа ҳудудларда ҳам ўтказилади.

Ф.Абдуллаев, туман Тиббиёт бирлашмаси бошлиғи.