ЯНГИ ИНШООТ ТИББИЙ ХИЗМАТ СИФАТИНИ ЮҚОРИ БОСҚИЧГА ОЛИБ ЧИҚИШГА ХИЗМАТ ҚИЛАДИ

Юртимизда сўнгги йилларда тиббиёт соҳасини ривожлантириш, оналик ва болаликни муҳофаза қилиш, тиббий хизмат сифатини янада яхшилашга алоҳида аҳамият берилмоқда. Айниқса, “Она ва бола соғлиғига эътибор – жамиятга, келажакка эътибор” тамойили асосида тиббий хизмат сифатини ошириш борасида катта ишлар амалга оширилмоқда.

Шу ўринда айтиш жоизки, туманимизда ҳам тиббиёт соҳасидаги эзгу ишларнинг кўлами кенгаймоқда. Ҳудудлардаги тиббиёт муассасаларининг моддий-техник базаси янада мустаҳкамланиб, замонавий тиббий жиҳозлар билан таъминланмоқда. Туман Тиббиёт бирлашмасига қарашли янги туғруқ мажмуасининг бунёд этилаётгани, қад ростлаётгани ҳам бунинг яққол ифодасидир. 

Айни пайтда аҳолига хизмат кўрсатилаётган туман Тиббиёт бирлашмаси туғруқ комплекси 95 ўринга мўлжалланган бўлиб, шундан туғруқ бўлими 60 ўрин, ҳомиладорлар патологияси бўлими  35 ўриндан иборат. Муассасада 5 та туғруқ зали, 2 та операция хонаси мавжуд.  Ҳар бир палата 4 ўринга мўлжалланган. Лекин амалдаги тегишли санитария қоида ва меъёрлари талабларига асосан эса  ҳар бир палатага 2 нафардан аёл жойлаштирилиши керак. Алоҳида боғлов хонаси, муолажа хонаси, кўрик хоналари  учун ҳам жой етишмайди.

Туғруқ бўлими ва ҳомиладорлар патологияси бўлими алоҳида, мослаштирилган биноларга жойлашган бўлиб, бу ўз навбатида ҳомиладор аёлларга  кўрсатилаётган тиббий хизмат сифати ва кўламига салбий таъсир кўрсатади. Чақалоқлар учун интенсив терапия хоналари майдон жиҳатидан талабга жавоб бермайди. Бундан ташқари, қабул бўлимида алоҳида кириш-чиқиш учун қулайлик йўқ.

Ўтган асрнинг 73-йилларида қурилган туман Марказий шифохонасининг туғруқ комплекси биноси 2012 йилда мослаштирилиб капитал таъмирланган бўлиб, марказлашган канализация тизими ҳам мавжуд эмас. Туман Тиббиёт бирлашмасида туғруқхона комплекси биносининг эскирганлиги, амалдаги санитария қоида ва меъёрлари талабларига жавоб бермаслиги, аҳоли ва туғруқлар сонининг табиий кўпайиши ҳисобга олиниб, янгидан замон талабларига мос туғруқхона комплекси қурилиши зарурлиги бўйича таклиф Президентимизга Қорақалпоғистонга ташрифи давомида етказилган эди. Бу таклиф эътиборга олиниб, тегишли дастурга киритилди.

Шундан сўнг, Тиббиёт бирлашмасида янги – қиймати 14,4 млрд. сўмга тенг бўлган 90 ўринли 4 қаватли туғруқ комплекси замонавий лойиҳаси тасдиқланди ва қурилиш ишлари бошлаб юборилди. Ҳозирги вақтда давом этаётган қурилиш ишлари “Темир бетон” МЧЖ томонидан  олиб борилмоқда. Ушбу объект учун 14,4 млрд. сўм маблағ ажратиб берилгани, замонавий кўринишдаги бинони қуриш ишлари бошлангани репродуктив ёшдаги аёллар, ҳомиладорлар ва болаларга кўрсатиладиган  тиббий ёрдам сифатини ошириш ва кўламини янада кенгайтириш масалаларига давлатимиз раҳбарининг алоҳида эътибори натижасидир.

Янги лойиҳа асосида қурилаётган мазкур замонавий иморатдаги иситиш ва совутиш тармоқлари илғор технологиялар асосида такомиллаштирилади. Катта ҳажмда олиб борилаётган қурилиш ишлари натижасида барча шарт-шароитлар яратилган бино қад ростлайди. Шу билан бирга ушбу янги муассаса энг замонавий тиббиёт асбоб-ускуналари билан жиҳозланади.

Оналар ва болалар саломатлигини мустаҳкамлаш, ҳомиладорларга ғамхўрлик кўрсатиш, эртамиз эгаларининг соғлом туғилишига шароит яратиш мақсадида амалга оширилаётган бу эзгу иш туманда тиббий хизмат сифатини янги босқичга олиб чиқиш имконини беради.

О.Худойберганова.