Уруғлик учун пахта экилган далалар ҳосилини аниқлаш ва ғалла экиш мавсумини сифатли ўтказишга бағишланган кўргазмали семинарлар бўлиб ўтди

Амударё туманида 2022 йил ҳосили учун 2200 гектар майдонда 47 та фермер хўжаликлари томонидан уруғлик чигит экилган бўлиб, бугунги кунда ушбу майдонларда апробация, яъни кутилаётган ҳосилни аниқлаш тадбирини амалга оширилмоқда. Бу борада тажриба алмашиш мақсадида Тўлқин овулидаги “Аҳмедов Ражаббой” фермер хўжалигида кўргазмали семинар бўлиб ўтди. Ушбу хўжаликда 80 гектар майдонга уруғлик пахта экилган.

Тадбирга Республика “Уруғчиликни ривожлантириш маркази” давлат корхонасининг Қорақалпоғистон Республикаси бошқармаси масъуллари ҳамда туман ҳокимининг Қишлоқ ва сув хўжалиги масалалари бўйича ўринбосари Ислом Маткаримов, масъулияти чекланган жамият шаклидаги “ Amudaryotex” хусусий корхонаси пахта-тўқимачилик кластери, туман Қишлоқ хўжалиги бўлими мутасаддилари ҳамда тумандаги уруғлик пахта етиштирувчи 47 та фермер хўжалиги раҳбарлари қатнашдилар.

Тадбирда қишлоқ хўжалиги масъуллари ва иштирокчилар уруғлик пахта экилган даладаги ғўза ниҳолларининг ривожланишини кўздан кечирдилар. Август ойида жавом этаётган ғўза парваришида “Долзарб-30 кунлик”да белгиланган агротехник тадбирларни ўз вақтида амалга ошириш, касаллик ва зараркунандаларга қарши самарали курашиш, озиқлантириш ишларини якунлаш юзасидан тушунтиришлар берилди. Шунингдек, ушбу майдонларни шарбат усулида пешма-пеш суғориш ҳамда культивация қилиш ишларини тизимли ташкил қилиш каби агротехник тадбирларни ўз вақтида бажариш юзасидан кўрсатмалар берилди.

Ғўза парваришида “Долзарб-30 кунлик”да қўшимча ғўза майдонларини 2 марта культивация қилиш, ғўза майдонларига 2 марта биостимуляторлар сепиш, зараркунандаларга қарши курашиш, майдонларини 3 марта шарбат усулида суғориш, чилпиш ишларини якунлаш каби тадбирларни тез фурсатларда якунлаш вазифалари топширилди. Шунингдек, ғўза қатор ораларини сувдан кейинги культивация қилиш ишлари ғоятда муҳим эканлиги айтилди. Бунинг учун туманда мавжуд 365 та культиваторларни отряд усулда ишлатишга алоҳида эътибор қаратилиб, 90 та отрядлар тузилгани ва ҳар бир отрядга тажрибали мутахассислар бириктирилгани таъкидланди.

Август ойида деҳқонларимиз яна бир муҳим палла – ризқ-рўзимиз бўлган ғалла экиш мавсумини ҳам бошлайдилар. Туманимизда 2023 йил ҳосили учун 355 та фермер хўжаликлари ҳамда қишлоқ хўжалиги корхоналари томонидан 7000 гектар майдонга ғалла экиш режалашган. Шундан 2800 гектари очиқ майдонга, 4200 гектари ғўза қатор ораларига экилади.

Шу йилнинг 11 августида Тошёп овулидаги “Бекман Алламберганов” фермер хўжалигида ғалла экиш ишларини намунали ташкил этиш масаласига бағишланган семинар бўлиб ўтди.

Семинарда туман ҳокими Султонбой Йўлдашев, Ўзбекистон Республикаси Қишлоқ хўжалиги вазирининг биринчи ўринбосари Шуҳрат Тешаев, Сув хўжалиги вазири Шавкат Ҳамроев, Қорақалпоғистон Республикаси Вазирлар Кенгаши Раиси ўринбосари Дарёбой Қайпов, қишлоқ хўжалиги соҳасининг тумандаги масъуллари, фермер хўжаликлари раислари иштирок этдилар.

Тадбирда Дарёбой Қайпов, Шавкат Ҳамроев, Шуҳрат Тешаев, Султонбой Йўлдашевлар 2023 йил ҳосили учун ғалла экиш мавсумини қулай муддатларда сифатли ўтказиш юзасидан фермер хўжаликлари раҳбарларига зарур маслаҳат ва тавсияларни бериб ўтдилар.

Таъкидланганидек, экиш мавсумини ўз вақтида, намунали ўтказиш учун уруғлик миқдори ҳисоб-китоб қилиниб, ғамланди. Ҳар бир гектар ерга 250 килограммдан уруғлик сарфланиши кўзда тутилган. Экиш ишларини 15 августда 31 августгача, оптимал муддатларда ўтказиш учун фермер хўжаликлари кесимида графиклар ишлаб чиқилган.

Шунингдек ғалла экиш мавсуми учун 25 та отрядлар ташкил этилди ва уларга 620 та турли техника ҳамда механизмлар бириктирилди.

Туманда жорий йилда 2023 йил ҳосили учун ғалланинг “Алексеевич”, “Антонино”, “Гром”, “Давр”, “Аср” каби навлар уруғи экилиши ва юқори ҳосил етиштиришнинг барча чоралари амалга оширилиши таъкидланди.

Ойгул РАЖАБОВА.