Амударё туманидаги таълим масканларида янги ўқув йилига тайёргарлик қизғин давом этмоқда

Амударё туманидаги Халқ таълими бўлимига қарашли умумтаълим мактабларида таълим-тарбия олувчи 38 мингга яқин ўқувчилар ёзги таътил тугаши биланоқ, жонажон мактаби, устозлари бағрига шошадилар. Бугунги кунда тумандаги барча умумтаълим муассасаларида янги 2022-2023 ўқув йилига тайёргарлик кўриш жараёнлари қизғин суръатларда олиб борилмоқда.

Бу борадаги ишларни янада жадаллаштириш ва янги ўқув йилини муносиб тайёргарлик билан кутиб олиш мақсадида 1 август куни Оқ олтин овули ҳудудида жойлашган 50- сонли ҳамда 7-сонли умумтаълим мактабларида кўргазмали семинар бўлиб ўтди.

Янги ўқув йилига тайёргарлик кўриш, мактабларнинг техник баъзасини яхшилаш, педагог кадрларнинг салоҳиятини ошириш масалаларига бағишланган кўргазмали семинарда туман Халқ таълими бўлими мудири Акмал Исмаилов, бўлим масъуллари ҳамда тумандаги 85 та мактаб директорлари иштирок этишди.

Семинарда мактабларга кириш йўлакларини тартибга келтириш, мактаб биноси атрофларини бегона ўт-ўланлардан тозалаб ободонлаштириш, дарахтларни оқлаш, дарахт ва гулларга шакл бериш, спорт майдончаларини тартибга келтириш, мактабларнинг ички тозалиги таъминлаш, футбол, волейбол, баскетбол майдончаларидаги устунларни бўяш, қозон ва қозонхоналарни тартибга келтириш, таъмирталаб парта, доска, шкаф умуман синфхоналарни таъмирлаш, стулларни ўқувчининг ёшига мос равишда жойлаштириш, коридор, синф ва лаборатория хоналарига шиорлар, баннерларни дид ва тартиб билан осиш каби масалаларга алоҳида эътибор қаратилди.

Янги ўқув йилига тайёргарлик ишлари 50- ва 7- сонли умумтаълим мактаблари билан бир қаторда туманнинг барча олис ҳудудларида жойлашган умутаълим мактабларда ҳам жадал суръатларда олиб борилмоқда.

Жумладан, Назархан овули ҳудудидаги 3-сонли мактаб реконструкция қилиниб, жорий таъмирлаш ишлари якунланиш арафасида. Шунингдек, 69-, 26-, 61, 51-, 46-, 78-, 18- сонли мактабларда ҳам қурилиш-таъмирлаш ишлари жадал олиб борилмоқда.

Ундан ташқари, Куюк кўпир овули ҳудудида жойлашган 14-сонли умумтаълим мактабига 180 ўринли, Тош ёп овули ҳудудида жойлашган 76-сонли мактабга 360 ўринли, Ойбек маҳалласи ҳудудида жойлашган 55-сонли мактабга 330 ўринли қўшимча бинолар қўрилмоқда. Қурувчилар жорий қурилиш-таъмирлаш ишларини янги ўқув йили бошланиш арафасида тугатиб, ўқувчилар учун янги синфхоналарни тантанали разда топширишни ният қилишган.

Шу ўринда айтиш керакки, ўқувчиларнинг яхши билим ва тарбия олиши мактабдаги соғлом муҳит ва яратилган шарт-шароитларга ҳам бевосита боғлиқ.

Кенг ва ёруғ синфхоналарда малакали устозлар томонидан берилган билимни қунт билан ўзлаштирган ўқувчилар ишонамизки, Ватан тараққиётига муносиб ҳисса қўшадиган баркамол авлод бўлиб вояга етишади.

Туман ҳокимлигининг Ахборот хизмати.