Касб-ҳунар мактаби битирувчиси янги ҳаёт остонасида

Амударё туманида ёшларни ҳар томонлама қўллаб-қувватлаш, тадбиркорлик қобилиятларини рўёбга чиқариш, касбга ўқитиш, ҳунар эгаллаши ҳамда ўз устида ишлаб, малакаларини оширишлари учун барча шарт-шароитлар яратилган.

Бу борада ўрта махсус профессионал таълим тизимида амалга оширилаётган кенг қамровли ислоҳотлар ўсиб келаётган ёш авлодда интеллектуал қобилиятлар ва касбий билимларни ривожлантиришда алоҳида аҳамият касб этади.

 Қиличбой овулида яшовчи Муҳаббат Йўлдошева жорий ўқув йилида Амударё тумани 2-сонли касб-ҳунар мактабини тикувчилик йўналиши бўйича тугатди.

Ушбу таълим муассасасининг асосий мақсадларидан бири− ёшларни тадбиркорликка йўналтириш бўлиб, бу борада эришилаётган ютуқлар алоҳида эътирофга сазовор.

Айрим ўқувчилар ўзининг танлаган касби бўйича устозларидан таълим олиб, ўз тадбиркорлик фаолиятини йўлга қўйишган. Уларга мактабнинг малакали устозлари томонидан доимий равишда йўл-йўриқ кўрсатилиб, тавсиялар бериб келинмоқда.

Муҳаббат ҳам ҳозирги кунда касб-ҳунар мактабида эгаллаган билим ҳамда кўникмалари асосида олий таълим муассасасига дизайнерлик йўналиши бўйича  ҳужжат топширишни ният қилган.

Муҳаббат тикувчиликнинг сир-асрорларини,  аввало, онаси Наргиза Сапарбоевадан ўрганган бўлса, касб-ҳунар мактабида устозлари − Гулчеҳра Султонова ҳамда Шарофат Файзуллаева унга бор билимларини бериб, моҳир тикувчи бўлиб етишишига катта ҳисса қўшдилар.

Ўзининг интилувчанлиги, қолаверса, устозлари ёрдами билан Муҳаббат имтиёзли кредит асосида ўзига янги тикиш машинаси сотиб олди ҳамда онаси билан биргаликда тикув-чеварлик цехини очиб, ўз фаолиятини бошлади.

Бугунги кунда у ҳамқишлоқларига гўзал либослар тикиб бериш баробарида юқори даромад манбаига эга бўлиб, 2 нафар ҳамқишлоғининг ҳам бандлигини таъминлашга эришди.

Муҳаббатнинг ўзи истаган олий таълим муассасасига ўқишга киришига омад ҳамда тадбиркорлик фаолиятига муваффақият тилаймиз!  

Ф.Эшимбетова.