БОЛАЖОНЛАР ҚАДРДОН БОҒЧАСИ БИЛАН ХАЙРЛАШИБ, МАКТАБГА УЧИРМА БЎЛИШДИ
Бешовул маҳалласидаги 42-сонли Мактабгача таълим ташкилотида “Хайр, боғчажон!” тадбири бўлиб ўтди. Тадбир муносабати билан муассаса ҳовлиси байрамона безатилди. Тадбирга педагог-тарбиячилар, тарбияланувчилар ва уларнинг ота-оналари ҳам ташриф буюришди.
Муассасанинг тайёрлов гуруҳи тарбияланувчиларини мактабга кузатиш маросимини мазмунли, эсда қоларли, ёрқин лаҳзаларга бой тарзда ўтказиш мақсадида ташкил этилган мазкур тадбирни ташкилот директори Гулнора Қурбонбоева очиб берди. У ўз сўзида юртимизда ёш авлодни комил инсон қилиб вояга етказиш устувор масалага айлангани, бу борада амалга оширилаётган ислоҳотлар, ёшларга яратилаётган имкониятлар хусусида кенг тўхталиб ўтди. Шунингдек, маҳалладаги кичкинтойларнинг севимли масканига айланган ушбу мактабгача таълим ташкилотидаги шарт-шароитлар, уларга тарбия бераётган тарбиячи-педагоглар, ўтказилаётган машғулотлар тўғрисида маълумот берди.
Таъкидланганидек, ташкилотда 4 та гуруҳда 90 нафар кичкинтойларга 8 нафар тарбия-педагоглар таълим-тарбия бериб келишмоқда. Тайёрлов гуруҳида эса 25 нафар болажонларга “Беш ташаббус” бўйича ташкил этилган 5 та марказда машғулотлар ўтказилиб, савод ўргатилди. Уларга анъанавий тарзда ўтказилиб келинаётган “Йил тарбиячиси” кўрик-танловининг ўтган йили Қорақалпоғистон босқичида ғолиб бўлган Феруза Ўрозматова қизиқарли машғулотлар ўтказиб, мактабга тайёрлади.
Болажонлар муассасада ташкил этилган санъат, тил ва нутқ, қуриш-ясаш ва математика, сюжетли ўйинлар ва саҳналаштириш, фан ва табиат каби 5 та марказда ҳафта давомида машғулотларда қатнашишди ва қўшиқ, шеърлар айтишни, ўйинчоқлар ясаш ва чизишни, эртак қаҳрамонлари образларини ижро этишни, ҳарфлар ва ёзувларни, сонларни ёзишни ўрганиб, фан ва табиат ҳақидаги тасаввурларини бойитишди. Уларга қунт билан таълим-тарбия берган тарбиячи-педагоглардан Феруза Ўрозматова, Юлдуз Бозорбоева, Лайло Қурбониёзова, Шоира Сийтимова, Шоҳсита Қурбонбоевалардан ота-оналар ҳам жуда миннатдор бўлишди.
Тадбир давомида сўзга чиққан ота-оналар муассаса ходимларига ўз миннатдорчиликларини билдиришди ва шу ерда тарбияланаётган кичкинтойларга телевизор совға қилиб, келажакда уларнинг комил инсонлар бўлиб улғайишларини тилашди.
Шундан сўнг, тадбир давом эттирилиб, кичкинтойлар ижросида шўх қўшиқ ва рақслар, қувноқ шеърлар, саҳна кўринишлари намойиш этилди. Ташкилот тарбияланувчилари томонидан ижро этилган эртак қаҳрамонлари Билмасвой ва Буратино томошалари барчага жуда манзур бўлди. Болажонлар ушбу саҳна кўриниши орқали билим олишнинг афзаллигини, илмли бўлишнинг аҳамиятини тушуниб олганликларини беғубор, болаларча қарашлари билан ўзларининг самимий тилларида ифодалаб беришди. Айниқса, уларнинг боғча опаларга, ўзлари улғайган тарбия масканига, ота-оналарига шеърий раҳмат айтиб, қадрдон боғчалари билан хайрлашишгани ҳаммани жуда таъсирлантирди.
Тадбир сўнгида мактабга учирма бўлган болажонларга фахрий ёрлиқлар, эсдалик совғалари топширилиб, ушбу лаҳзаларни хотираларга муҳрлаш учун суратларга тушишди. Қизиқарли ўтган тадбир нафақат кичкинтойларда, балки ота-оналар ва тарбиячиларда ҳам катта таассуротлар қолдирди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
