9 май− Хотира ва қадрлаш куни кенг нишонланди

Маълумки, 1999 йил 9 май куни Ўзбекистон пойтахтида Хотира майдони очилди ва ушбу кундан буён 9 май− Хотира ва қадрлаш куни сифатида нишонланиб келинади.

Ушбу байрам арафасида фашизм устидан қозонилган Ғалабага беқиёс ҳисса қўшган, мана шу ёруғ кунларга етиб келолмаган ватандошларимизнинг сўнмас хотиралари ёд этилади. Қолаверса, жанг майдонларида мардлик, жасорат кўрсатган, фронт ортида фидокорона меҳнат қилган ва бугун орамизда соғ-омон юрган фахрийларимизга эҳтиром кўрсатилади.

9 май– Хотира ва қадрлаш куни муносабати билан Манғит шаҳридаги Хотира майдонида ҳам тантанали тадбир ўтказилди. Тадбирда дастлаб, Ўзбекистон ва Қорақалпоғистон Республикаларининг давлат мадҳиялари янгради.

Шундан сўнг туманимизнинг истеъдодли санъаткорлари томонидан ижро этилган она Ватан ва тинчликни тараннум этувчи куй-қўшиқлар йиғилганлар дилида ўзгача ғурур ва ифтихор уйғотди.

Тадбирда туман ҳокими Султонбой Йўлдашев сўзга чиқиб, мамлакатимизда 9 май – Хотира ва қадрлаш кунини кенг нишонлаш, Иккинчи жаҳон урушида ҳалок бўлган аждодларимиз хотирасига чуқур ҳурмат бажо келтириш, фашизмга қарши жангларда, меҳнат фронтида жонбозлик кўрсатган фахрийларимизга эътибор ва эҳтиром кўрсатиш, ёшларни маънавий-ахлоқий жиҳатдан тарбиялашга ҳисса қўшаётган фахрийларни эъзозлаш борасида қилинаётган ишлар ҳақида тўхталиб ўтди.

Таъкидланганидек, фашизм устидан қозонилган Ғалабага муносиб ҳисса қўшган ҳар бир юртдошимизнинг хотираси келгуси авлодларимиз қалбида мангу яшайди. Орамизда бўлган уруш ва меҳнат фронти фахрийлари давлатимиз ва жамиятимизнинг доимо эъзозида бўлиб, уларнинг инсониятни фашизм балосидан қутқариш йўлида қилган фидоийликлари келгуси авлодларимиз учун ибрат мактабидир.

Тадбирда туман Мудофаа ишлари бўлими бошлиғи Шерзод Муродов йиғилганларни ушбу қутлуғ айём билан самимий муборакбод этиб, Иккинчи жаҳон уруши йилларида мардонавор жанг қилиб, жонини фидо қилган юртошларимиз ҳамда мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилиш органлари ходимларининг хотираси барчанинг дилида мангуга муҳрланганлигини таъкидлади.

Шундан сўнг, марҳумлар руҳига Қуръон тиловат қилиниб, Мотамсаро она ҳайкали пойига гулчамбарлар қўйилди.

Меҳмонлар Хотира майдонидаги рамзий китоб саҳифаларини варақлаб, урушда шаҳид кетган аждодларимизни хотирлашди. Қонли жанггоҳлардан омон қайтган, меҳнат фронтида фидойилик намуналарини кўрсатиб, халқ хўжалигининг қайта тикланишига ҳисса қўшган юртдошларимиз номларини ифтиҳор билан тилга олишди.

Хотира ва Қадрлаш кунини нишонлашдан кўзлаган бош мақсади – Иккинчи жаҳон урушида шаҳид кетган боболаримиз руҳини шод қилиш, орамиздаги фидойи инсонларга ҳурмат-эҳтиром кўрсатиш, аҳоли, айниқса ёшларни юртимизда ҳукм сураётган тинчлик ва осойишталикни қадрлашга чорлашдир. Зеро хотира ҳамиша муқаддас, инсон қадр-қиммати азиз, тинчлик эса энг буюк неъматдир!

Туман ҳокимлигининг Ахборот хизмати