ГУЛЗОР МАҲАЛЛАСИДА ЯНГИ ЗАМОНАВИЙ САВДО ВА ХИЗМАТ КЎРСАТИШ ШОХОБЧАСИ ИШГА ТУШДИ

Мамлакатимиз иқтисодиётида кичик бизнес ва хусусий тадбиркорликнинг ўрни ва мавқеи тобора ошиб бормоқда. Тадбиркорлик субъектларини ҳар томонлама қўллаб-қувватлаш юзасидан амалга оширилаётган кенг кўламли чора-тадбирлар мулкдорлар сафи ортиб, ички бозорни рақобатбардош маҳсулотлар билан тўлдириб, янги иш ўринларини яратиш баробарида аҳоли даромадларини кўпайтириш ва турмуш фаровонлигини оширишга хизмат қилаётир.

Муҳтарам Юртбошимиз ташаббуси билан мамлакатимиз овул ва маҳалла, шаҳарча фуқаролар йиғинида ҳоким ёрдамчилари фаолияти йўлга қўйилгани, улар аҳоли билан яқиндан танишиб, турмуши сифатини яхшилаш, камбағалликни қисқартириш борасида кўпгина хайрли ишларни амалга ошираётгани халқимизнинг ҳақли эътирофига сазовор бўлмоқда.

Амударё туманида иш бошлаган ҳоким ёрдамчилари ҳам ўз ҳудудлари аҳолиси ҳаёти билан яқиндан танишиб, хатловдан ўтказиб, зарур ҳолларда амалий ёрдамлар бермоқдалар.

Яқинда Манғит шаҳрининг Гулзор маҳалласида тадбиркор Расул Янгибоев лойиҳа қиймати 2 миллиард сўмлик янги, замонавий, уч қаватли савдо ва аҳолига хизмат кўрсатиш шохобчасини ишга туширди. Бу маблағнинг 1 миллиард сўми тадбиркорнинг ўз маблағи, 1 миллиард сўм эса маҳалладаги ҳоким ёрдамчиси Акбар Ражабов томонидан берилган тавсиянома асосида олинган имтиёзли банк кредитидир. Ушбу бинода “Ҳар бир оила - тадбиркор” дастури асосида ҳоким ёрдамчиси тавсияномасига кўра 33 миллион сўм имтиёзли кредит олган яна бир аёл Муяссар Абдуллаева тикувчилик йўналишида тадбиркорлик фаолиятини бошлади. Шохобча ишга туширилиши натижасида бу ерда 8 та янги иш ўрни яратилди.

Маҳалла фуқаролари орасида ҳоким ёрдамчисининг ёрдами билан банкларнинг имтиёзли кредити ҳисобига тадбиркорлик фаолиятини бошлаган, оиласи иқтисодини юксалтиришга интилаётганлар кўп. Кам таъминланган оила рўйхатида турган Жўрабек Собирбоев, Санобар Қўчқоров, Ботир Саъдуллаевлар 33 миллион сўмлик банк кредити ҳисобига ўз оилаларида наслдор қўйлар парваришлашни бошлашди. Озода Ҳабиева, Феруза Маткаримова, Мадина Болтабоевалар эса кредит маблағлари ҳисобига замонавий тикув машиналари сотиб олиб тикувчилик цехи фаолиятини йўлга қўйишди.

Жорий йил бошидан маҳалладаги кам таъминланган оилаларнинг 4 тасига субсидия асосида иссиқхоналар қуриб берилди. Натижада 22 нафар ишсиз фуқаролар бандлиги таъминланиб, доимий даромадга эга бўлдилар, 18 нафар ишсиз фуқаролар ўз-ўзини банд қилишга эришдилар.

Шунингдек, “Mangit city” масъулияти чекланган жамияти 225 миллион сўм имтиёзли банк кредити ҳисобига автомобилларга техник хизмат кўрсатиш шохобчасига янги замонавий ускуналар сотиб олиб, ўз фаолиятини кенгайтирди.

Амалга оширилаётган бунингдек саъй-ҳаракатлар юртдошларимиз турмуши сифати ошишига хизмат қилиши билан аҳамиятлидир.

Ойгул РАЖАБОВА.