“МИРЗО УЛУҒБЕК ВОРИСЛАРИ” ТАНЛОВИНИНГ ТУМАН БОСҚИЧИ ЎТКАЗИЛДИ
Мамлакатимизнинг зукко, илмли, маърифатли ва интилувчан ёшлари учун ўзлигини намоён этишлари учун яна бир имконият яратилди.
“Истеъдодли ёшларни қўллаб-қувватлаш, “Улуғбек жамғармаси фаолиятиини ривожлантириш чора-тадбирлари тўғрисида”ги ҳукуматимиз қарорига мувофиқ эндиликда 2022 йилдан бошлаб, ҳар йили “Мирзо Улуғбек ворислари” республика танлови ўтказилади.
Қарорда белгиланишича, истеъдодли ёшларни қўллаб-қувватлаш “Улуғбек” жамғармаси, Инновацион ривожланиш вазирлиги, Ёшлар ишлари агентлиги, Олий ва ўрта махсус таълим вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳамкорлигида ташкиллаштирилиб, ушбу танловда 16 ёшдан 25 ёшгача бўлга ёшлар иштирок этиши мумкин.
Иқтидорли ёшларни кашф қилиш, уларнинг ташаббусларини қўллаб-қувватлаш борасида амалга оширилаётган ишларни янада жадаллаштириш, уларни илмий-техник фаолиятга кенг жалб қилиш, олис ҳудудларда истқомат қилаётган йигит-қизларнинг билим, кўникма ва малакасини ошириш, инновацион ғояларини амалиётга татбиқ этиш ва ҳаётда ўз ўринларини топишига кўмаклашиш мақсадида ташкил этилган танловнинг илк босқичи Амударё туманида шу йил 16 март куни бўлиб ўтди.
Туман Маданият саройида бўлиб ўтган танловда Қорақалпоғистон Республикаси ҳудудий инновацион ривожланиш бошқармаси, “Ёшлар келажагимиз” жамғармаси Қорақалпоғистон Республикаси филиали бошқармаси, Ўзбекистон Республикаси Президенти ҳузуридаги Оролбўйи халқаро инновация маркази, Ёшлар ишлари агентлиги туман бўлими масъуллари иштирок этиб, танловнинг саралаш босқичи, яъни тестдан муваффақиятли ўтган 10 нафар истеъдодли ёшларнинг инновацион лойиҳаларини кўриб чиқдилар.
Ушбу танловни ўтказиш юзасидан ҳукуматимиз қабул қилган қарорда танловнинг биринчи босқичи туман ва шаҳарларда февраль-март ойларида ўтказилиши, унда энг юқори натижага эришган 5 нафардан номзодлар 2-босқичига иштирок этиш ҳуқуқини қўлга киритиши белгиланган.
Шунга мувофиқ туманимиз ўтказилган танловда 5 нафар истеъдодли ёшлар ғолиб деб топилиб, кейинги босқичга йўлланма берилди ҳамда махсус сертификат, базавий ҳисоблаш миқдорининг 5 баравари, яъни 1 миллион 350 минг сўм пул мукофоти билан тақдирландилар.
Танлов ғолиблари энди шу йилнинг апрель ойида ўтказиладиган “Мирзо Улуғбек ворислари” танловининг Қорақалпоғистон Республикаси босқичида иштирок этиб, ўз интеллектуал салоҳиятини синовдан ўтказадилар.
Ушбу танловнинг иккинчи босқичи ғолиблари базавий ҳисоблаш миқдорининг 10 баравари, Республика босқичи ғолиблари эса 20 баравари миқдорида бир марталик пул мукофоти, диплом билан тақдирланади.
Танловнинг илк босқичидан муваффақиятли ўтган туманимизнинг иқтидорли ёшларининг кейинги босқичларда ҳам ғолибликка эришишларини тилаб қоламиз.
О.РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
