Амударё тумани Молия бўлими бюджет маблағларидан мақсадли ҳамда оқилона фойдаланиш устидан давлат молиявий назоратини самарали амалга оширмоқда
Ўзбекистон Республикаси Президентининг “Молия органлари фаолиятини янада такомиллаштириш чора-тадбирлари тўғрисида”ги қарорида молия органларининг вазифалари, ҳуқуқ ва мажбуриятлари аниқ белгилаб берилган. Хусусан, молия органлари аввало, аҳолига солиқ юкини камайтириш, бюджет маблағларидан мақсадли ҳамда оқилона фойдаланиш устидан давлат молиявий назоратини амалга ошириш, қатъий иқтисод қилиш, солиқлар ва бошқа мажбурий тўловларни ҳисоблаш ва тўлаш тартибини соддалаштириш каби масалаларда назоратни амалга оширади.
Амударё тумани Молия бўлими ҳам зиммасига юклатилган шу ва бошқа вазифаларни самарали амалга ошириб келмоқда.
Хабарингиз бор, Халқ депутатлари Амударё туман Кенгашининг 44-сессиясида Амударё тумани молия бўлими томонидан 2021 йилда амалга оширилган ишлар ва 2022 йилга мўлжалланган маҳаллий бюджет параметрлари тўғрисидаги масала депутатлар томонидан муҳокама қилиниб, тегишли қарор қабул қилинган эди.
Сессияда туман Молия бўлими мудири Улуғбек Бекниязов йил давомида бўлим томонидан амалга оширилган ишлар хусусида ахборот бериб, Амударё туманининг 2022 йилги маҳаллий бюджети ҳақидаги таклифларни депутатлар эътиборига ҳавола қилди.
Айтиш керакки, 2022 йил учун туман маҳаллий бюджет даромадлари 77,3 млрд сўм, юқори бюджетдан ажратиладиган трансферт миқдори 127,6 млрд сўмни ташкил қилади. Жами харажатлар 204 млрд сўм миқдорида прогноз қилинмоқда.
2022 йилда туманимизда маҳаллий бюджет маблағлари ҳисобидан мактабгача таълим соҳаси учун озиқ-овқат ва бошқа харажатларга 12,2 млрд сўм, соғлиқни сақлаш соҳасига 66,5 млрд сўм, маданият ва спорт соҳасига 4,8 млрд сўм, ижтимоий нафақа ва кам таъминланган оилаларга моддий ёрдам ва компенсация тўловлари учун 71,2 млрд сўм ажратилади.
Бундан ташқари, 2022 йилда иқтисодий харажатларга туман бюджетидан 14,5 млрд сўм маблағ ажратилиши режалаштирилган. Ободонлаштириш ишларига 8,3 млрд сўм, Ветеренария қўмитаси ташкилотларини сақлаш харажатларини қоплаш учун 1,2 млрд сўм, туман фермер деҳқон хўжаликлари ва томорқа ер эгалари кенгаши харажатларига 0,9 млрд сўм ажратилиши белгиланган.
Қарорда кўрсатилишича, 2022 йил давомида давлат бошқарув органлари фаолиятига 5,3 млрд сўм, фуқароларнинг ўзини ўзи бошқариш органларига эса 7,1 млрд сўм миқдорида маблағ ажратилади.
Жорий йилдан бошлаб маҳаллаларда ҳоким ёрдамчиларининг фаолияти йўлга қўйилиши кутилмоқда. Йил давомида ҳоким ёрдамчиларининг тавсиялари асосида маҳаллаларнинг инфратузилмасини яхшилаш мақсадида 1,4 млрд сўм маблағ ажратилади. Захира жамғармаси маблағлари эса 1,9 млрд сўмни ташкил этади.
Президентимизнинг “Бюджет жараёнида фуқароларнинг фаол иштирокини таъминлаш бўйича қўшимча чора-тадбирлар тўғрисида”ги қарорига асосан Амударё туманида ҳам бюджет маблағларининг маълум қисми жамоатчилик фикри асосида белгиланган тадбирларни молиялаштиришга йўналтирилади.
Қарорда бюджет маблағларини тақсимлашда энг аввало ижтимоий соҳага катта эътибор берилганини кўриш мумкин. Бу эса аҳоли турмуш фаровонлигини янада яхшилаш борасидаги ишлар “Инсон қадрини улуғлаш ва фаол маҳалла йили” деб эълон қилинган жорий йилда ҳар қачонгидан ҳам кенг кўлам касб этишидан далолат беради.
Ф.Эшимбетова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
