Амударё туманида Ички ишлар органлари ходимлари куни муносабати билан байрам тадбири ташкил қилинди
Она ватанимиз – Ўзбекистон тинчлик ва осойишталик мамлакатидир. Тинч юртда эса ривожланиш ва тараққиёт бўлади. Шунинг учун ҳам юртимиз тинчлигини кўз қорачиғидек асраш, уни ҳимоя қилиш ёш-у кексанинг муқаддас бурчига айланган. Халқимизнинг осойишталигини асрашда ички ишлар идоралари ходимларининг хизматлари алоҳида. Мамлакатимизда 25 октябрь санаси ички ишлар органлари ходимлари куни сифатида нишонланиши соҳа ходимларининг хизматлари юксак қадрланаётганидан далолатдир. Ҳар йили ушбу сана муносабати билан соҳа ходимлари иштирокида байрам тадбирлари ташкил этилиб, тинчлигимиз посбонларининг касб байрамлари муносиб нишонланади.
Қолаверса, бу йил мустақил Ўзбекистон Республикасининг Ички ишлар вазирлиги ташкил топганига 30 йил тўлди. Шу сабабли бу гал соҳа ходимларининг касб байрами ҳар доимгидан ҳам кўтаринки руҳда, кенг тарзда нишонланмоқда.
Тинчлик ва осойишталикни сақлашда кун-у тун фидойилик намуналарини кўрсатаётган, жамоат тартибини сақлаш, жиноятчиликнинг олдини олишдек шарафли ва масъулиятли бурчига садоқат билан хизмат қилаётган ички ишлар органлари ходимлари учун 6 ноябрь куни Манғит шаҳридаги Маданият марказида катта байрам тадбири ташкил этилди.
Байрам тадбирида туман ҳокими Султонбой Йўлдашев, депутатлар, давлат ва жамоат ташкилотлари масъуллари, Ички ишлар бўлимида турли йўналишларда хизмат қилаётган ходимлар, соҳада узоқ йиллар фидокорона меҳнат қилган фахрийлар иштирок этдилар.
Тадбирда туман ҳокими Султонбой Йўлдашев сўзга чиқиб, барча ички ишлар идоралари ходимларини касб байрамлари билан самимий табриклади. Туман ҳокими табрик нутқида эл-юрт тинчлигини асраш, жамиятда қонун устуворлигини таъминлаш, жиноятчиликка қарши курашиш, бир сўз билан айтганда, муқаддас заминимиздаги тинч ва осуда ҳаётни таъминлашдек масъулиятли вазифаларини шараф билан адо этаётган тинчлик посбонларига улкан зафарлар ёр бўлишини, мустаҳкам соғлиқ, узоқ умр, бахт-саодат, хонадонларига қут-барака, сермашаққат фаолиятларида улкан муваффақиятлар тилади.
Шунингдек, байрам тадбирида ички ишлар соҳасида узоқ йиллар мобайнида фидокорона меҳнат қилиб келаётган фахрийлардан Қорақалпоғистон Республикаси ИИВ фахрийлар кенгаши котиби, истеъфодаги подполковник Абдулла Йўлдашев, Ўзбекистон Республикаси Президентининг Амударё туманидаги Халқ қабулхонаси мудири, истеъфодаги подполковник Эркин Ражабовлар сўзга чиқиб, барча ҳамкасбларни байрам билан табрикладилар.
Меҳнат фахрийлари таъкидлаганларидек, бугун ички ишлар идоралари ходимларига берилаётган эътибор, шу баробарида соҳа ходимларининг масъулияти ҳар доимгидан юз карра ошган. Уларнинг хизматлари туфайли юртимиз тинч, кўнгилларимиз хотиржам, фарзандларимиз бахтиёр. Ички ишлар идоралари сафида бурчига содиқ, Ватан учун жонини ҳам беришга тайёр ҳақиқий юрт ҳимоячилари, фидоий ходимлар сони тобора ортиб бормоқда.
Шундан кейин соҳада самарали фаолият олиб бораётган, ҳамкасбларига намуна бўлаётган бир гуруҳ ички ишлар органлари ходимлари туман ҳокимлигининг ташаккурномаси ҳамда қимматбаҳо совғалари билан тақдирланди.
Байрам тадбири Қорақалпоғистон Республикаси Ички ишлар вазирлигининг ашула ва рақс ансамбли, туман Маданият бўлимининг эстрада хонандалари ва созандалари ижросидаги ажойиб куй-қўшиқларга уланиб кетди. Ватан, дўстлик, тинчлик, севги-муҳаббат, шукроналик мазмунидаги бир-биридан шўх-шодон тароналар байрамга кўтариники руҳ бағишлаб, барча йиғилганларга юқори кайфият улашди.
Шундан сўнг туман ички ишлар бўлими ходимлари учун “Нур” тўйхонасида катта байрам дастурхони ёзилди. Соҳа ходимлари байрам дастурхони атрофида дилдан суҳбат қуриб, мароқли ҳордиқ чиқардилар.
Фурсатдан фойдаланиб, кунларни тунларга, тунларни тонгларга улаб, Ватанимиз танчлиги, осойишталигини таъминлаш йўлида хизмат қилаётган барча ички ишлар органлари ходимларини касб байрамлари билан табриклаймиз! Сиз бор экансиз, юртимиз тинч ва ҳаётимиз фаровон бўлади, азиз посбонлар!
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
