Халқ депутатлари Амударё туман кенгашининг 39-сессияси тўғрисида ахборот

27 октябрь куни Амударё тумани ҳокимлигининг мажлислар залида Халқ депутатлари туман кенгашининг навбатдаги 39-сессияси бўлиб ўтди. Сессияда Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитаси раиси Баҳодир Тожиев, туман ҳокими Султонбой Йўлдашев, Халқ депутатлари туман  кенгаши депутатлари, секторлар раҳбарлари, ҳоким ўринбосарлари, ҳокимлик масъул ходимлари, корхона-ташкилотлар раҳбарлари ҳамда оммавий ахборот воситалари вакиллари иштирок этдилар. Сессия мажлисини туман ҳокими Султонбой Йўлдашев очди ҳамда олиб борди.

Сессия мажлисида сенатор Баҳодир Тожиев сўзга чиқиб, жорий йил бутун мамлакатимиз тарихида муҳим аҳамиятга эга бўлган сиёсий йил бўлиб қолганлигини, бунинг боиси бутун дунё ҳамжамияти эътибор марказида бўлган Ўзбекистон Республикаси Президенти сайлови бўлиб ўтганлигини алоҳида таъкидлади. Сенатор ўз сўзида ушбу тарихий, сиёсий жараённи муносиб ўтказишда катта тайёргарлик кўрилганини, мамлакатимизнинг ҳар бир фуқароси Президент сайловига масъулият билан ёндашиб, унда фаол иштирок этганини, сайловлар халқаро стандартларга мос, демократик тамойиллар асосида, уюшқоқлик билан амалга оширилганини қайд этди. Шу билан бирга мамлакат янги тараққиёт йўлига қадам қўяётганини таъкидлаб, бу йўлда барчани бирдамликка чорлади.

Сессия мажлиси кун тартибидаги қатор масалалар юзасидан масъулларнинг ахборот ҳамда ҳисоботлари тингланди, улар бўйича сессия иштирокчиларининг, депутатларнинг фикр-мулоҳазалари эшитилди.

Дастлаб кун тартибидаги дастлабки масала Амударё туманини комплекс ижтимоий-иқтисодий ривожлантириш бўйича секторлар ҳудудларида 2021 йилнинг иккинчи ярим йиллигида амалга ошириладиган ишлар, “Йўл хариталари”нинг 3-чоракдаги ижроси тўғрисида бўлиб, ушбу масала юзасидан тумандаги секторлар раҳбарларининг ҳисоботлари тингланди.

Ҳар бир сектор раҳбари ўзи раҳбарлик қилаётган ҳудудларда аҳоли яшаш шароитларини яхшилаш, мавжуд муаммо ва камчиликларни ўз вақтида аниқлаб, уларни бартараф қилиш чоралари кўрилгани, бу борада жойларда секторлар раҳбарлари ҳамда корхона-ташкилотлар масъуллари иштирокида аҳоли мурожаатларини қабул қилиш бўйича сайёр қабуллар, очиқ мулоқотлар ташкил этилгани, аниқланган муаммолар эса тегишлича ўрганилиб, ижобий ечимини топганлиги хусусида ахборот берди. Шунингдек, секторлар раҳбарлари ўз ҳисоботларида ҳудудларда аҳолининг ижтимоий кўмакка муҳтож қатлами, эҳтиёжманд оилалар билан ишлаш бўйича тизимли ишлар олиб борилгани, банд бўлмаган аёллар ва ёшлар бандлигини таъминлаш бўйича қатор самарали ишлар амалга оширилгани хусусида тўхталди.

Секторлар раҳбарларининг ҳисоботлари ўқиб эшиттирилганидан сўнг улар юзасидан депутатларнинг фикрлари тингланди. Сўнгра, туманидаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхонаси мудири Акбаржон Хўжамуратов туманда тадбиркорлар муаммолари билан ишлаш, уларни ҳар томонлама қўллаб-қувватлаш борасида амалга оширилаётган ишлар хусусида ахборот берди.

Қайд этилишича, қабулхона томонидан 2021 йил 1 октябргача тадбиркорлар мурожаатларини қабул қилиш бўйича ҳудудларда 36 та сайёр қабуллар ташкил этилган бўлиб, уларда, олиб борилган тарғибот-ташвиқот ишлари ҳамда ўтказилган суҳбатлар давомида қабулхонада жами  210 та масала бўйича 208 та мурожаатлар рўйхатга олинган. Мурожаатлардаги масалалардан 139 таси, яъни 67 фоизи қаноатлантирилган, 71 тасига, яъни 33 фоизига ҳуқуқий тушунтиришлар берилган.

Сессия ишида туман Адлия бўлими бошлиғи Мўъминжон Матюсупов ягона давлат ҳуқуқий сиёсатини, жумладан, ҳуқуқ ижодкорлиги фаолиятини сифатли ташкил этиш, бир хил ҳуқуқни қўллаш амалиётини шакллантириш, инсон ҳуқуқ ва эркинликларининг самарали ҳимоя қилинишини таъминлаш, шунингдек, аҳолининг ҳуқуқий маданиятини оширишнинг яхлит тизимини жорий этиш каби вазифалар ижроси юзасидан туманда амалга оширилган ишлар хусусида ахборот берди.

Ахборотда келтирилишича, бўлимга жорий йилнинг 9 ойи давомида жами 152 та ариза ва шикоят келиб тушган бўлиб, мурожаатларнинг 139 таси ҳал қилинган, шундан 73 та ариза ва шикоятлар қаноатлантирилган, 66 тасига ҳуқуқий тушунтириш берилган. Бўлим ходимлари томонидан бевосита шахсий қабулда 135 нафар, сайёр қабулларда 29 нафар фуқароларнинг мурожаатлари қабул қилинган ҳамда улар тегишлича қаноатлантирилган.

Сессия кун тартибидаги навбатдаги масала Амударё тумани халқ таълими бўлимига қарашли 65-сонли мактабда бўш (вакант) директор лавозимига ўтказилган танлов якунлари бўйича номзодга келишим бериш тўғрисида бўлиб, ушбу масала юзасидан номзод Шаҳноза Хўжамуратованинг келгуси 3 йилда амалга оширадиган ишлари бўйича дастури тингланди.

Номзод Шаҳноза Хўжамуратова ўз дастурида мактабни малакали кадрлар билан таъминлаш, таълим сифатини ошириш, ўқувчиларнинг фанлар олимпиядаларидаги фаол иштирокини таъминлаш, мактабдан ташқари таълим жараёнини ташкил этиш, ижтимоий тармоқларда очиқ дарсларни ёритиб бориш, маънавий-маърифий ишларни ривожлантириш каби йўналишлар бўйича самарали фаолият олиб бориши хусусида маълумот берди.

Дастур ўқиб эшиттирилганидан сўнг Қорақалпоғистон Республикаси Халқ таълими вазирлиги томонидан тавсия қилинган номзодга келишим бериш бўйича яширин овоз бериш жараёни ташкил этилди. Дастлаб депутатлар орасидан саноқ комиссияси тузилди ва яширин овоз бериш бюллетенлари тарқатилди. Овоз бериш якунларига кўра Қорақалпоғистон Республикаси Халқ таълими вазирлигининг Амударё тумани халқ таълими бўлимига қарашли 65-сонли умумий ўрта таълим мактаби директори лавозимига Шахноза Худжамуратова тайинлаш тўғрисидаги тавсиясига келишим бериш юзасидан тегишли қарор қабул қилинди.

Сессия кун тартибига киритилган барча масалалар атрофлича кўриб чиқилди, барча масалалар юзасидан тегишли қарорлар қабул қилинди. Шунинг билан сессия ўз ишини якунлади.

Туман ҳокимлигининг Ахборот хизмати.