Амударё тумани ҳокими С.Йўлдашевнинг Ўзбекистон Республикаси Давлат мустақиллигининг 30 йиллиги муносабати билан юртдошларимизга байрам табриги

Ассалому алайкум, азиз юртдошлар!

Бугун биз халқимиз ҳаётидаги унутилмас тарихий воқеа – Ватанимиз мустақиллигининг ўттиз йиллик байрамини катта шод-у хуррамлик билан нишонламоқдамиз.

Аввало, Сиз азизларни, Сизлар орқали бутун туманимиз аҳлини энг улуғ, энг азиз байрамимиз – Ўзбекистон Республикаси давлат мустақиллигининг 30 йиллик байрами билан чин қалбимдан самимий муборакбод этаман!

Бутун халқимизга истиқлолнинг буюк неъматларини ҳадя этган, бизнинг инсоний қадр-қимматимизни, ғурур ва шаънимизни, дин-у диёнатимизни қайтариб берган Мустақиллик байрами аждодларимиз неча асрлар давомида орзу қилган буюк неъматдир.

Халқимизнинг метин иродаси, мислиз куч-қидрати орқали барча соҳаларда қўлга киритаётган ютуқларимиз Янги Ўзбекистонда янги бир уйғониш даври – Учинчи Ренессанс даврига пойдевор яратилаётганлигидан далолатдир. 

Ватанимизнинг истиқлол йилларида босиб ўтган шонли йўлига назар ташлар эканмиз, эртанги кунимизга, ўз куч ва имкониятларимизга бўлган ишончимиз тобора ортади.

Азиз юртдошлар!

Ҳар йили халқимизнинг энг улуғ, энг азиз байрами яқинлашиши билан, ўтган давр мобайнида амалга оширган ишларимизни сарҳисоб қилиб, ўзимизга янги-янги марраларни белгилаб олишга одатланганмиз.

Қайд этиш керакки, сўнгги йилларда мамлакатимиз тараққиёти йўлида амалга оширилаётган ислоҳотлар натижасида, барча соҳаларда сезиларли ўзгаришлар кузатилиб, янги ютуқлар қўлга киритилди. Ислоҳотлар самарадорлигини ошириш борасидаги тизимли ишлар орқали мамлакатимизнинг энг чекка ҳудудлари ҳам тобора ривожланиб, аҳоли турмуш тарзи яхшиланмоқда.

Туманимизда ҳам ислоҳотлар натижасида салмоқли ишлар амалга оширилиб, янги ривожланиш босқичига қадам қўйилмоқда. Хусусан, туманда фаол инвестиция сиёсати юритилиб, янги, замонавий корхоналар барпо этилмоқда, тадбиркорлик ва хусусий мулкни ривожлантириш, барча соҳа ва тармоқларда янгича ёндашувларни жорий этишга алоҳида эътибор қаратилмоқда. Шунингдек, қишлоқ хўжалиги соҳасини жадал ривожлантиришда  замонавий технологиялардан фойдаланиш, соҳада самарали усулларни қўллаш бўйича амалий ишлар олиб борилмоқда.

Айтиш керакки, муҳтарам Президентимизнинг “2020–2023 йилларда Қорақалпоғистон Республикасини комплекс ижтимоий-иқтисодий ривожлантириш чора-тадбирлари тўғрисида”ги қарорига асосан туманимизда 2020-2023 йилларда 406,6 млрд. сўмлик 76 та инвестиция лойиҳаларини амалга оширилиши орқали 2 571 та янги иш ўринлари яратилиши режалаштирилиб, бу борада амалий ишлар қилинмоқда.

Туманимизда кичик бизнес ҳамда тадбиркорликни ривожлантириш масалаларига қаратилаётган эътибор натижасида қиймати 87,4 млрд сўмлик 57 та лойиҳалар амалга оширилиб, 1 995 та янги иш ўринлари яратилди.

Таъкидлаш керакки, сўнгги йилларда амалга оширилаётганган “Обод қишлоқ” дастури доирасидаги бунёдкорлик  ишлари  мамлакатимизнинг энг чекка ҳудудларига ҳам янгиланиш нафасини, яратувчанлик руҳини олиб кирмоқда. Инсонларнинг фикри, дунёқараши ўзгармоқда, қишлоқларимизда турмуш маданияти ошиб бормоқда.

Туманимизда “Обод қишлоқ” дастури доирасида жорий йилда Хитой овули ҳамда Жумуртов шаҳарчасида овулларида жами 37 млрд. сўмдан ортиқ ишларни бажариш режалаштирилган бўлиб, айни кунда қурилиш ва бунёдкорлик, ободонлаштириш ишлари қизғин давом эттирилмоқда.

Шунингдек, бугунги кунда туманимизда аҳолининг турмуш фаровонлигини янада яхшилаш мақсадида янги иш ўринларини ташкил қилиш, намунавий лойиҳалар асосида арзон уй-жойлар қуриш, муҳандислик-коммуникация ва ижтимоий инфратузилма билан таъминлаш борасида ҳам кенг кўламли ишлар бажарилмоқда.

Кам таъминланган, ногиронлиги бўлган инсонларга алоҳида ғамхўрлик кўрсатиш, фуқароларни ижтимоий муҳофаза қилиш, жамиятнинг ҳимояга муҳтож қатламларини қўллаб-қувватлаш масалаларига ҳам алоҳида эътибор қаратилмоқда.

Бу каби изчил ислоҳотлар, юксалишларнинг том маънода янги босқичга кўтарилиши халқимизнинг бугунги кунидан рози бўлиб яшашига, эртангги кунига ва келажагига ишонч билан қараб, Ватан тақдирига даҳлдорлик туйғуларининг мустаҳкамланишига хизмат қилмоқда.

Ишонаманки, юртдошларимиз ҳам ўз билими ва меҳнати билан мамлакатимиз тараққиётига муносиб ҳисса қўшиб, яқинлашиб келаётган муҳим ижтимоий-сиёсий жараён - Ўзбекистон Республикаси Президенти сайловида фаол иштирок этадилар.

Қадрли юртдошлар!

Бугун юртимизнинг ҳар бир гўшасида катта шодиёна – мамлакатимиз мустақиллигининг 30 йиллиги кенг нишонланмоқда. Жойларда “Янги Ўзбекистонда эркин ва фаровон яшайлик!” шиори остида байрам тадбирлари кўтаринки руҳда давом этмоқда. Шу фурсатдан фойдаланиб, Сизларни ва Сиз орқали бутун туманимиз аҳлини яна бир бор энг улуғ, энг азиз айём – мустақиллигимизнинг 30 йиллик байрами билан чин қалбимдан табриклайман!

Юртимиз тинч, осмонимиз мусаффо, турмушимиз фаровон, мустақиллигимиз абадий бўлсин.

Эътиборингиз учун раҳмат!