Янги қонун ҳужжатлари мазмун-моҳиятига бағишланган йиғилиш бўлиб ўтди

Жорий йилнинг 11 август санасида Амударё тумани ҳокимлигида Ўзбекистон Республикаси Олий Мажлиси Сенатининг ўн еттинчи ялпи мажлисида маъқулланган қонунлар ва кўриб чиқилган бошқа масалалар, иқтисодий ислоҳотларнинг мазмуни, Ўзбекистон Республикаси давлат мустақиллигининг 30 йиллиги муносабати билан “Янги Ўзбекистонда эркин ва фаровон яшайлик!” ғоясини аҳолига етказиш мақсадида йиғилиш ўтказилди.

Йиғилишда Ўзбекистон Республикаси Олий Мажлиси Сенати аъзоси Ботир Матмуратов, туман ҳокими Султонбой Йўлдашев, ҳокимлик масъул ходимлари, секторлар раҳбарлари, Халқ депутатлари туман Кенгаши депутатлари, ҳоким ўринбосарлари, бўлимлар бошлиқлари, корхона-ташкилот раҳбарлари, фуқаролар йиғини раислари ҳамда оммавий ахборот воситалари вакиллари иштирок этдилар. Йиғилини туман ҳокими Султонбой Йўлдашев очди ҳамда олиб борди.

Йиғилишда Ўзбекистон Республикаси Олий Мажлиси Сенати аъзоси Ботир Матмуратов сўзга чиқиб, Олий Мажлиси Сенатининг ўн еттинчи ялпи мажлисида маъқулланган қонунлар ва Сенат ваколати доирасида кўриб чиқилган бошқа масалалар бўйича кенг турда тўхталиб ўтди.

Йиғилиш кун тартибидаги дастлабки масала - “Ер участкаларини ажратиш ва улардан фойдаланиш, шунингдек ерларни ҳисобга олиш ва давлат ер кадастрини юритиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонуни лойиҳаси юзасидан туман Ер тузиш ва кўчмас мулк кадастр хизмати бошлиғи Шокир Давлатов маълумот берди.

Мазкур қонун билан туманлар, шаҳарлар давлат ҳокимияти органларининг эгалик қилишга, фойдаланишга ва ижарага ер бериш, ер участкаларини савдо ва хизмат кўрсатиш соҳаси объектлари билан биргаликда юридик ва жисмоний шахсларга мулк этиб реализация қилиш ҳамда ер участкаларига мерос қилиб қолдириладиган умрбод эгалик қилиш ҳуқуқини ким ошди савдоси асосида фуқароларга реализация қилиш каби ваколатлари бекор қилинади.

Йиғилишда туман Санитария-эпидемиологик осойишталик ва жамоат саломатлиги маркази бош шифокори Гулмурод Бекиев “Ўзбекистон Республикасининг айрим қонун ҳужжатларига аҳолининг санитария-эпидемиологик осойишталигини таъминлашга қаратилган ўзгартишлар ва қўшимча киритиш тўғрисида”ги Ўзбекистон Республикаси Қонунининг қабул қилиниши коронавирус инфекциясининг янги тўлқинларининг олдини олиш учун аҳоли ўртасида оммавий вакцинацияни ташкил этишнинг қонуний асосларини янада мустаҳкамлашга ҳамда юқумли касалликлар тарқалиши хавфи мавжуд бўлган тақдирда профилактик эмлаш ўтказишни жорий этиш юзасидан амалдаги қонунчиликдаги мавжуд зиддиятларни бартараф этишга хизмат қилишини қайд этди.

Шундан сўнг Ўзбекистон Республикасининг “Лицензиялаш, рухсат бериш ва хабардор қилиш тартиб-таомиллари тўғрисида”ги Ўзбекистон Республикаси Қонуни қабул қилинганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида”ги Қонуни тўғрисида сўз юритилди. Туман Адлия бўлими бошлиғи Мўминжон Матюсупов мазкур Қонуннинг қабул қилиниши ишбилармонлик муҳитини фаоллаштиришда муҳим ўрин тутувчи лицензиялаш, рухсат бериш ва хабардор қилиш тартиб-таомилларига оид қонунлар самарадорлигининг ошишига хизмат қилишини таъкидлади.

Йиғилишда “Интеллектуал мулк объектларининг ҳуқуқий муҳофазаси янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Ўзбекистон Республикаси Қонуни ҳақида Қорақалпоғистон Республикаси Интелектуал мулк ҳимояси маркази раҳбари Нурали Есназаров ахборот берди. Қайд этилганидек, мазкур Қонун интеллектуал мулк объектларига талабнома топширувчилар талабларини тўлақонли инобатга олиш, соҳада жаҳон тажрибасини муваффақиятли амалга ошириш, соҳа бўйича халқаро рейтинглардаги ўринни мустаҳкамлаш, муаллифлик ҳуқуқи ва турдош ҳуқуқлар соҳасидаги халқаро ҳужжатлар талабларини бажариш мақсадида ишлаб чиқилган.

Шунингдек, мамлакатимизда аҳоли мурожаатлари билан ишлаш бўйича янги тизим яратилаётганлиги хусусида Ўзбекистон Республикаси Президентининг Амударё туманидаги Халқ қабулхонаси мудири Эркин Ражабовнинг фикр-мулоҳазалари, бу борада туманимизда олиб борилаётган ишлар тўғрисидаги ахбороти тингланди.

Йиғилиш кун тартибида шу каби қатор масалалар хусусида сўз юритиб, масъулларнинг ахборотлари, фикр-мулоҳазалари тингланиб, ҳар бир масала бўйича тегишли топшириқ ҳамда тавсиялар берилди.

Туман ҳокимлигининг Ахборот хизмати.