БОШ ВАЗИР ЎРИНБОСАРИ АМУДАРЁДА ЯНГИДАН ҚУРИЛАЁТГАН КЎПРИКНИНГ ҚУРИЛИШ ИШЛАРИ БИЛАН ТАНИШДИ
Президентимиз 2019 йил 20-21 август кунларидаги Қорақалпоғистон Республикасига қилган ташрифи давомида 2020-2022 йиллар мобайнида туманимиздаги Амударё дарёси устидан ўтадиган темир йўл ва автомобиль йўли қўшма кўприги қурилишини лойиҳалаштириш ва лойиҳани амалга ошириш бўйича топшириқлар берган эди. Шунга кўра ва Давлатимиз раҳбарининг 2020 йил 12-13 декабрь кунлари Хоразм вилоятига қилган ташрифи чоғидаги Қорақалпоғистон Республикаси ва Хоразм вилоятини боғловчи Амударё дарёси устига автомобиль ва темир йўл қўшма кўпригини қуриш ишларини бошлаш бўйича берган тегишли топшириқларига мувофиқ қисқа муддат ичида қурилиш ишлари бошлаб юборилди.
Амударёликларнинг кўп йиллик орзуси бўлган эскириб қолган понтон кўприк ўрнига замонавий темирбетон конструкцияли кўприкнинг қурилиши айни кунларда жадал суръатларда давом этмоқда. Янги кўприкнинг қурилиши орқали Қорақалпоғистон Республикаси ва Хоразм вилояти аҳолиси учун савдо-иқтисодий, ижтимоий ва маиший алоқаларнинг янада ривожлантирилиши кутилмоқда.
21 апрель куни Хоразмни Қорақалпоғистон билан боғлайдиган ушбу автомобиль ва темир йўл кўпригида олиб борилаётган қурилиш ишлари билан танишиш мақсадида туманимизга Ўзбекистон Республикаси Бош вазирининг биринчи ўринбосари Очилбой Раматов ташриф буюрди.
Бош вазирнинг биринчи ўринбосари Очилбой Раматов Хоразм вилояти ҳокими Фарҳод Эрманов, Қорақалпоғистон Республикаси Вазирлар Кенгаши раиси Қаҳрамон Сариев ҳамда туман ҳокими Султонбой Йўлдашевлар ҳамроҳлигида янгидан барпо этилаётган кўприкнинг қурилиш майдонида бўлиб, “Ўзбекистон темир йўллари” акциядорлик жамиятининг “Кўприк қурилиш трести” унитар корхонаси ишчилари томонидан амалга оширилаётган катта ҳажмдаги қурилиш ишлари билан танишди.
Янги кўприк қурилиши лойиҳасига буюртмачи этиб - “Ўзбекистон темир йўллари” акциядорлик жамияти, бош лойиҳачи этиб - “Боштранслойиҳа” акциядорлик жамияти, бош пудратчи этиб - “Ўзбекистон темир йўллари” акциядорлик жамиятининг таркибий бўлинмалари белгиланган. Ушбу қўшма кўприкнинг узунлиги 412,7 метр, баландлиги 11,5 метр, кенглиги 8,5 метрни ташкил қилади ва шу билан бир қаторда 79 км. узунликда “Шовот-Гурлан-Жумуртов-Қораўзак” темир йўл линиясини қуриш бўйича ҳам ишлар бошлаб юборилган. Янги темир йўл линияси қурилиши натижасида Россия ва Қозоғистон Республикасидан юкларни ташиш масофасини 240 км.га вақтини эса 6 соатга қисқартиришга эришилади.
Юк ташиш ҳажми икки баравар кўпайиб, йилига 25 миллион тоннани ташкил этади. Минтақаларнинг ривожи натижасида иқтисодий самарадорлик йилига 100 миллиард сўмга ошади. Бундан ташқари, Қорақалпоғистон Республикасидан Хоразм вилоятига қурилиш материалларини етказиб бериш харажатлари камаяди, бу эса ижтимоий объектлар ва инфратузилмаларни қуриш харажатларини камайтиради. Мухтасар қилиб айтилганда, мазкур кўприкнинг ишга туширилиши натижасида ҳудудлар фаровонлашиб, аҳолининг турмуш даражаси янада яхшиланади.
2021 йилга ушбу лойиҳани амалга ошириш учун республика бюджетидан 40 млн. АҚШ доллари миқдорида маблағ ажратилиши кўзда тутилмоқда.
Янги кўприк қурилиши майдонида амалга оширилаётган ишлар ҳолати билан танишган масъуллар томонидан пудратчи ташкилотлар раҳбарлари ва ишчиларга самарадорликни ошириш бўйича тегишли тавсиялар, муҳим маслаҳатлар берилди. Шунингдек, иш жараёнида дуч келинаётган, мавжуд муаммолар билан ҳам танишилиб, уларни бартараф этиш бўйича тегишли раҳбарларга вазифалар топширилди.
О. Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
