ҒЎЗА ҚАТОР ОРАЛАРИ КУЛЬТИВАЦИЯ ҚИЛИНМОҚДА

Пахта – туманимиз қишлоқ хўжалиги асосий экинларидандир.

Жорий йилда 2021 йил ҳосили учун 350 та фермер хўжаликлари экин далаларининг 15030 гектарига пахта экиш режалаштирилди ва МЧЖ шаклидаги “Амударётех” ХЖ пахтачилик кластери билан фермер хўжаликлар ҳамда қишлоқ хўжалиги корхоналари ўртасида пахта етиштириб бериш бўйича контрактация шартномалари тузилди. Жами пахта майдонларининг 3762 гектарига “С-47-27”, 9517 гектарига “Султон”, 251 гектарига “Манғит-1” 1500 гектарига “Янги” навини экиш режалаштирилган.

Чигит экиш мавсумини қисқа муддатларда ва сифатли ўтказиш учун 65 та экиш отрядлари тузилиб, ушбу  отрядларга 145 дона ҳайдов, 385 дона чопиқ, 220 дона транспорт тракторлари, 213 комплект бороналар, 293 та мола, 60 та чизел, 211 та чигит экиш сеялкалар, 50 та оддий, 33 та лазерли ер текислагичлар, 350 та тиркамалар, 17 та ёқилғи ташиш агрегатлари ва ҳар бир отядга бир донадан хизмат кўрсатувчи кўчма таъмирлаш устахоналари бириктирилди.

Туманда 4 апрелдан бошлаб пухта тайёргарликлар асосида чигит экиш ишларига киришилди.

Айни кунларда униб чиққан ғўза ниҳоларига дастлабки ишлов бериш яъни культивация қилиш ишлари бошланиб кетди. Ушбу муҳим агротехник тадбирни сифатли ўтказиш мақсадида 90 та отядлар тузилди ва уларга 365 та культиваторлар бириктирилди.

Ҳар бир культиватор агрегатидан унумли фойдаланган ҳолда тадбирни 10-12 кунда сифатли тамомлаш чоралари кўрилди. Хусусан, механизаторларнинг узлуксиз ишлашига эришиш учун далалар бошларида кўчмали механизаторлар уйлари ташкил этилиб, уларда барча зарур шароитлар яратилди. Шунингдек, 365 нафар механизаторларнинг иш ҳақлари ҳар беш кунда ҳисоб-китоб қилиниб, рағбатлантирилмоқда.

Оқ олтин овулидаги “Полвонов Рахмон” фермер хўжалигига Қаҳрамон Полвонов раҳбарлик қилади.

Хўжалик аъзолари қишлоқ хўжалик экинларидан мўл ҳосил етиштиришда ўзига хос тажриба тўплашган. Улар ғўза чигитини ўз муддатларида экиш, униб чиққан ниҳолларга дастлабки ишлов бериш, ғўза парвариши давридаги ҳар бир агротехник тадбирнинг ўз вақтида, сифатли ўтказилиши кузги мўл ҳосилга пухта замин яратишини яхши билишади.

Уста деҳқонлар жорий йилги чигит экиш мавсумини 6 апрелдан 12 апрелгача сифатли ўтказишди, 60 гектар ерга пахта экишди.

Ҳозирги кунда униб чиққан ғўза ниҳолларини биринчи культивациялаш ишларини ҳам бошлаб юборишди.

Хўжаликда пахтадан ташқари 10 гектар буғдой майдони ҳам мавжуд. Ушбу буғдойзорлар қондириб суғорилиб, озиқлантирилгани боис бир текис ривожланмоқда.

Баҳорги ҳаракат – кузги баракат, дейди халқимиз. Ҳа, баҳорнинг ҳар дақиқасидан унумли фойдаланиб, эрта эккан, экинига ғамхўрлик қилган деҳқон ютқазмайди. Яратилажак ҳосил халқимиз турмуши обод, дастурхони тўкин бўлишига хизмат қилади, албатта.

О.РАЖАБОВА.