Амударё туманида сув ресурсларини бошқариш бўйича семинар-тренинг ўтказилди
Сўнгги йилларда дунё миқёсида кузатилаётган глобал иқлим ўзгаришлари ва чучук сув ресурсларининг тобора тақчиллашиб бораётгани бугунги кунда инсоният олдидаги энг долзарб ҳамда мураккаб муаммога айланиб улгурди. Айниқса, Оролбўйи минтақасидаги ўзига хос экологик вазият, қишлоқ хўжалиги ва табиатни муҳофаза қилиш соҳасидаги мавжуд ёндашувларни тубдан қайта кўриб чиқишни, шунингдек, сувни тежашнинг янги усулларини жорий этишни тақозо этмоқда. Ана шундай муҳим вазифаларни ҳал этиш мақсадида Экология ва иқлим ўзгариши миллий қўмитаси, шунингдек Бирлашган Миллатлар Ташкилотининг Тараққиёт Дастури ва Глобал Экологик Жамғармаси томонидан қўшма лойиҳа амалга оширилмоқда. Мазкур лойиҳа доирасида Амударё тумани ҳокимлиги биносида “Сув ресурсларини интеграциялашган ҳолда бошқариш” мавзусида махсус семинар-тренинг ўтказилди.
Тадбирда сув хўжалиги ташкилотлари мутахассислари, муҳандис-гидротехниклар, маҳаллий ҳокимият органлари вакиллари ҳамда фермерлар иштирок этди. Семинар-тренингнинг асосий концепцияси бугунги кундаги ўзгарувчан иқлим ва чекланган сув ресурслари шароитида суғоришни тўғри ва самарали ташкил қилиш бўйича тингловчиларда билим ва амалий кўникмаларни шакллантиришга қаратилди.
Ўқув жараёнида муҳим илмий-амалий йўналишлар қамраб олинди. Жумладан, экинларни суғориш режимининг назарий асослари ва иқлим ўзгаришининг суғорма деҳқончиликка бевосита таъсири мутахассислар томонидан батафсил тушунтирилди. Шунингдек, суғориш режими шаклланишига таъсир этувчи турли хил табиий ва хўжалик омиллари комплекс таҳлил қилинди. Иштирокчилар суғориш режимини ҳисоблашнинг энг сўнгги замонавий методлари ва махсус рақамли дастурлари билан яқиндан танишиш имконига эга бўлдилар. Бундан ташқари, ўқув-тренинг дастури доирасида ҳуқуқий базага ҳам алоҳида эътибор қаратилиб, сув истеъмолчиларининг қонуний ҳуқуқ ва мажбуриятлари кенг ёритиб берилди. Амалий машғулотлар давомида “Иқлим кўрсаткичлари асосида қишлоқ хўжалиги экинларининг суғориш” мавзусидаги курс доирасида аниқ мисоллар ва вазиятлар кўриб чиқилди.
Тингловчилар қишлоқ хўжалиги экинларини суғориш режимини ҳисоблаш усулларини нафақат назарий, балки амалий намуналар орқали ҳам чуқур ўрганиб чиқдилар. Хусусан, ғўза учун суғориш режимини ҳисоблаш намунаси, шунингдек, ғалла учун суғориш режимини ҳисоблаш намунаси соҳа мутахассислари томонидан амалда кўрсатиб берилди. Аҳамиятли жиҳати шундаки, минтақа шароитидан ва ернинг таркибидан келиб чиққан ҳолда, сизот сувлар яқин бўлган ҳудудларда суғориш режимини ҳисоблаш намунаси алоҳида ўрганилди.
Тадбир якунида Ўзбекистон Республикасида сув тежамкор технологияларни амалиётга кенг жорий этиш ва сув ҳисобини рақамлаштиришнинг ҳуқуқий жиҳатлари амалдаги Сув Кодексига асосланган ҳолда қизғин муҳокама қилинди. Бу каби семинар-тренинглар келгусида сув ресурсларидан оқилона фойдаланиш, қишлоқ хўжалигида ҳосилдорликни ошириш ва минтақамиз экологиясини келажак авлодга бешикаст етказиш йўлида хизмат қиладиган энг муҳим пойдевор бўлиши шубҳасиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
