Амударёда мутасаддилар ва фермерларнинг очиқ мулоқоти ўтказилди

Бугунги мураккаб глобал шароитда озиқ-овқат хавфсизлигини таъминлаш, ички бозорни сифатли ва арзон маҳсулотлар билан тўлдириш ҳар қачонгидан ҳам долзарб аҳамият касб этмоқда. Шу боис, юртимизда фермерлик ҳаракатини ривожлантириш, ер эгаларини ҳар томонлама қўллаб-қувватлаш ва уларга зарур шарт-шароитларни яратиб бериш давлат сиёсатининг устувор йўналишлари қаторидан мустаҳкам жой олган. Ушбу жараёнларнинг амалий ифодаси сифатида жойларда соҳа мутасаддилари ва деҳқонлар ўртасида мунтазам равишда юзма-юз мулоқотлар, очиқ ҳамда конструктив учрашувлар ташкил этиб келинмоқда. Ана шундай аҳамиятли тадбир Амударё туманидаги “Амирхон” фермер хўжалиги даласида ҳам бўлиб ўтди.

Мазкур учрашувда мамлакатимизнинг қишлоқ хўжалиги соҳаси ривожига масъул бўлган юқори даражадаги раҳбарлар ва вакиллар иштирок этди. Хусусан, Ўзбекистон Либерал-демократик партияси Сиёсий Кенгаши Ижроия қўмитаси раиси, Ўзбекистон Фермерлар кенгаши раиси Актам Ҳаитов, Ўзбекистон Республикаси Олий Мажлиси Қонунчилик палатаси Аграр ва сув хўжалиги масалалари қўмитаси раиси Равшан Мамутов, Олий Мажлис Қонунчилик палатаси депутати Адҳамбек Исмаилов ҳамда Амударё тумани ҳокими Собир Хўжаметовлар туманда фаолият юритаётган фермер хўжаликлари раҳбарлари билан бевосита мулоқот қилишди. Давлат вакиллари ҳамда ер эгаларини умумий даврага жамлаган ушбу йиғилиш том маънода бой тажриба алмашиш, мавжуд муаммоларга самарали ечим топиш ва келгуси истиқболли режаларни белгилаб олиш майдонига айланди.

Танқидий-таҳлилий руҳда ўтган мулоқот чоғида мамлакатимизда аграр тармоқни янада модернизация қилиш, деҳқон ва фермерларни ҳар томонлама қўллаб-қувватлаш тизимини такомиллаштириш масалалари диққат марказида бўлди. Бугунги кунда қишлоқ хўжалигини ривожлантиришни замонавий агротехнологияларсиз тасаввур этиб бўлмайди. Шу нуқтаи назардан йиғилишда илғор технологияларни амалиётга кенг жорий этиш, айниқса, глобал иқлим ўзгаришлари ва сув танқислиги кузатилаётган бугунги мураккаб шароитда сув ва ер ресурсларидан оқилона, тежамкорлик билан фойдаланиш борасида амалга оширилаётган кенг кўламли ишлар хусусида атрофлича фикр алмашилди. Ҳар қарич ердан максимал даражада самарали фойдаланиш, тупроқ унумдорлигини сақлаш ва ошириш орқали юқори ҳосилдорликка эришиш йўллари илмий асосланган ҳолда муҳокама қилинди. Шунингдек, мутасаддилар томонидан жорий қишлоқ хўжалиги мавсумини юқори уюшқоқлик ва қатъий тартиб-интизом билан ўтказиш бўйича фермерларга қатор муҳим тавсиялар берилди.

Учрашув давомида эътироф этилган жиҳатлардан яна бири шуки, бу йилги ғалла ўрими мавсуми муваффақиятли ва талофатсиз якунланди. Маълумки, ғалла – халқимизнинг бебаҳо ризқ-рўзи, дастурхонимиз тўкинлигининг асосий кафолатидир. Шу боис, жазирама иссиқ ва турли табиий инжиқликларга қарамай, кечаю кундуз фидокорона меҳнат қилиб, жорий йилги ғалла ҳосилини нес-нобуд қилмасдан, қисқа муддатларда йиғиб-териб олган фермер ва деҳқонларнинг захматкаш меҳнати юксак баҳоланди. Уларнинг мамлакат озиқ-овқат хавфсизлигини таъминлаш, халқимиз фаровонлигини юксалтиришга қўшаётган улкан ҳиссаси учун давлат вакиллари томонидан самимий ташаккурлар изҳор этилди. Бу каби юксак эътибор деҳқонларнинг кайфиятини кўтариб, келгусида ҳам бундан-да юқори марраларни забт этишларига, янада улкан натижаларга эришишларига куч бағишлайди.

Ғалла ўрими якунланиши билан қишлоқ хўжалиги соҳами ходимлари олдида навбатдаги муҳим ва масъулиятли вазифа пайдо бўлади. Бу – ғалладан бўшаган ер майдонларига такрорий экинларни агротехник талабларга қатъий амал қилган ҳолда экиш вазифасидир. Мулоқот давомида айнан мана шу масала, яъни аҳолини йил давомида арзон, тўйимли ва энг асосийси, сифатли қишлоқ хўжалиги маҳсулотлари билан узлуксиз таъминлаш стратегияси қизғин муҳокама қилинди.

Агрономлар ва соҳа мутахассислари томонидан экин майдонларидан йил давомида камида 2 ёки 3 мартагача ҳосил олиш имкониятларини яратиш, бу орқали ернинг иқтисодий самарадорлигини ошириш зарурлиги таъкидланди. Нафақат ички бозорни таъминлашга, балки жаҳон бозорларида талаб юқори бўлган экспортбоп маҳсулотлар етиштириш ҳажмини кўпайтиришга ҳам эътибор қаратилди. Бу жараён, ўз навбатида, фермер хўжаликларининг молиявий барқарорлигини таъминлаш ва мамлакатнинг умумий экспорт салоҳиятини юксалтиришда асосий драйвер вазифасини ўтайди. Ердан йил давомида узлуксиз ва самарали фойдаланиш механизмини йўлга қўйиш умумий муҳокамаларнинг асосини ташкил қилди.

Амударё туманида  ўтказилган ушбу кенгайтирилган учрашув мамлакатимиз аграр секторида олиб борилаётган тизимли ва чуқур ўйланган ислоҳотларнинг амалдаги ёрқин ифодаси бўлди. Давлат органлари раҳбарлари ва бевосита ер эгалари ўртасидаги бундай самимий ҳамда очиқ мулоқотлар соҳадаги мавжуд муаммоларни тезкор ва самарали ҳал этишга хизмат қилибгина қолмай, меҳнаткаш деҳқонларнинг эртанги кунга бўлган ишончини ҳам ҳар томонлама мустаҳкамлайди.

Замонавий илм-фан ютуқларини ва рақамли технологияларни амалиётга изчил татбиқ этиш, ҳаёт манбаи бўлган сув ва бебаҳо бойлигимиз бўлган ердан ўта оқилона фойдаланиш, шунингдек, ҳар қарич ер қадрини билиб, фидокорона меҳнат қилиш орқали Ўзбекистон қишлоқ хўжалиги мутлақо янги ва юксак босқичга кўтарилмоқда. Зеро, ерга меҳр берган, ундан унумли фойдалана олган инсон ҳеч қачон кам бўлмайди, унинг ҳалол меҳнати эса бутун халқнинг турмуш фаровонлигига, давлатнинг иқтисодий қудратига ўзининг салмоқли ҳиссасини қўшади.