Нукусда мигрантлар реинтеграциясига бағишланган амалий семинар ўтказилди

Дунёнинг қайси бурчагида, қандай шароитда меҳнат қилмасин, ҳар қайси инсон учун ўз туғилиб ўсган макони, меҳрибон оиласи ва яқинларининг иссиқ тафтидан, дийдоридан кўра азизроқ ва қадрлироқ неъмат йўқ. Меҳнат фаолиятини хорижий давлатларда олиб бориб, турли синовларни енгиб ўтган, катта ҳаётий тажриба орттирган ва ниҳоят соғ-омон ўз юртига қайтган юртдошларимиз учун бугунги кунда давлат миқёсида ва кенг жамоатчилик томонидан яратилаётган муносиб шарт-шароитлар уларнинг эртанги кунга, келажакка бўлган умид ва ишончини янада мустаҳкамламоқда.

Маълумки, узоқ вақт давомида ўзга юртда, мутлақо бегона муҳитда ва турли хил шароитларда меҳнат қилиб Ватанга қайтган инсонлар жамиятга қайта мослашиш жараёнида муайян ижтимоий, молиявий ва психологик тўсиқларга дуч келишлари ҳаётнинг табиий қонуниятидир. Айнан мана шундай муҳим ўтиш даври ва долзарб паллада уларни ёлғиз қолдирмаслик, муаммолари билан яккама-якка ташлаб қўймаслик, аксинча, уларга ҳар томонлама моддий ва маънавий кўмак бериш, замонавий касб-ҳунар сирларини ўргатиш орқали жамиятнинг фаол ва тўлақонли аъзосига айлантириш мақсадида бутун юртимиз бўйлаб қатор хайрли ва амалий ташаббуслар амалга оширилмоқда.

Ана шундай эзгу мақсадларни ўзида мужассам этган муҳим тадбирларнинг навбатдагиси Нукус шаҳрида ҳам ўтказилди. “Исеним” ахборот-ресурс марказининг “Ватан бағрида: мигрантлар реинтеграциясига кўмак” номли грант лойиҳаси доирасидаги мазкур амалий семинар 3-сонли техникум биносида ўтказилди.

Ушбу амалий семинарнинг асосий мақсади, энг аввало, узоқ вақт хорижда меҳнат қилиб, ўз оиласи бағрига қайтиб келган фуқароларни бугунги кундаги шиддат билан янгиланаётган ва ривожланаётган жамият ҳаётига тезкорлик билан мослаштиришдан иборатдир. Шунингдек, уларнинг ижтимоий, маданий ва иқтисодий фаоллигини сезиларли даражада ошириш, шу билан бирга, уларнинг замонавий меҳнат бозорининг рақобатбардош талабларига тўлиқ жавоб бера оладиган янги касбий кўникмаларини шакллантиришга кўмаклашиш лойиҳанинг бош ғояси этиб белгиланган.

Семинар давомида лойиҳага жалб этилган малакали тренерлар томонидан барча иштирокчиларга ушбу грант лойиҳасининг туб мазмун-моҳияти, унинг доирасида бугунги кунга қадар амалга оширилаётган кенг кўламли ишлар ҳамда яқин келажакда кўзланган ва кутилаётган ижобий натижалар ҳақида батафсил маълумотлар тақдим этилди.

Мутахассислар ўзларининг чиқишларида меҳнат миграциясидан қайтган фуқароларнинг реинтеграция, яъни Ватанга қайта мослашув жараёнида тез-тез учраётган турли хил ижтимоий, ҳуқуқий ва айниқса, руҳий муаммоларини ўртага ташладилар ва кенг жамоатчилик эътиборига ҳавола қилдилар. Уларнинг оила даврасига ва умуман жамиятга қайта интеграциялашувидаги мавжуд қийинчиликлар, ишга жойлашишдаги тўсиқлар чуқур таҳлил қилиниб, ушбу мураккаб масалаларни бартараф этишнинг энг самарали, замонавий ва илғор ечимлари лойиҳа қатнашчилари билан савол-жавоб тариқасида қизғин муҳокама қилинди.

Тадбир давомида тикувчилик, IT технологиялари ва электр таъмири соҳаларида чуқурлаштирилган тарзда таҳсил олаётган умидли йигит-қизларнинг фаол иштирок этганлиги семинарнинг янада жонли, кўтаринки руҳда ва қизиқарли баҳс-мунозараларга бой тарзда ўтишини таъминлаб берди. Назарий билимлар маърузалар билангина чекланиб қолмасдан, махсус ташкил этилган амалий машғулотлар, мастер-класслар ва очиқ юзма-юз мулоқотлар орқали барча иштирокчилар ўзларининг танлаган севимли касблари бўйича билим ва малакаларини янада мустаҳкамлаш, етук мутахассислардан қимматли маслаҳатларни олиш ҳамда ўзаро тажриба алмашишдек имкониятга эга бўлдилар.

Семинар якунида унда фаол қатнашган, ўз билим ва салоҳиятини намойиш эта олган барча иштирокчиларга ташкилотчилар томонидан тегишли билим ва малакага эга бўлганлигини тасдиқловчи махсус сертификатлар тантанали равишда топширилди. Жамият томонидан кўрсатилаётган бундай юксак эътибор ва рағбат эса, ҳеч шубҳасиз, иштирокчиларнинг ўз кучига, эртанги кунига бўлган қатъий ишончини янада оширишига хизмат қилади.

Мазкур грант лойиҳаси Ўзбекистон Республикаси Олий Мажлиси ҳузуридаги Жамоат фондининг молиявий кўмаги асосида ҳаётга изчил татбиқ этилмоқда. Бу эса, ўз навбатида, юртимизда нодавлат нотижорат ташкилотлари томонидан илгари сурилаётган барча эзгу ташаббуслар давлатимизнинг, ҳукуматимизнинг эътибори ва диққат марказида эканлигини, чет элдаги меҳнат мигрантларининг Ватан бағрига, ўз оилалари бағрига қайтиб, тинч, осойишта ва фаровон ҳаёт кечиришлари учун барча зарур шарт-шароитлар яратилаётганлигини амалда яққол намоён этади.