«Иқтидор мактаб ансамбли» танловининг туман босқичи ўтказилди
Санъат ва маданият — инсон маънавиятининг юксак чўққиси, миллий ўзликни англашнинг муҳим воситасидир. Айниқса, ёш авлод қалбида гўзалликка ошнолик, миллий қадриятларга ҳурмат ва ижодий тафаккурни шакллантириш бугунги давлат сиёсатининг устувор йўналишларидан бирига айланган. Шу маънода, юртимизда навқирон истеъдодларни кашф этиш ва уларни қўллаб-қувватлашга қаратилган кенг кўламли ислоҳотлар амалга оширилиб, бугун ўз мевасини бермоқда. Амударё туманида ўтказилган навбатдаги ижодий беллашув ҳам ана шундай эзгу мақсадларнинг амалдаги ифодаси бўлди.
Ўзбекистон Республикаси Президентининг 2025 йил 8 сентябрдаги “Мактабдан ташқари таълим тизимини янги босқичга олиб чиқиш чора-тадбирлари тўғрисида”ги қарори ҳамда Мактабгача ва мактаб таълими вазирлигининг 2026 йил 10 февралдаги тегишли буйруқлари ижросини таъминлаш мақсадида ташкил этилган «Иқтидор мактаб ансамбли» танловининг туман босқичи ҳақиқий санъат байрамига айланиб кетди.
Амударё туманидаги 9-сонли болалар мусиқа ва санъат мактаби биносида бўлиб ўтган ушбу нуфузли тадбир Қорақалпоғистон Республикаси “Келажак” марказининг ташаббуси билан юқори савияда ташкил этилди. Танловнинг замирида ёшлар ўртасида нотиқлик санъати ва саҳна маданиятини юксалтириш, таълим муассасаларидаги ўқувчиларнинг ижодий ҳамда интеллектуал салоҳиятини рўёбга чиқаришдек олижаноб мақсадлар мужассам. Шунингдек, Президентимиз томонидан илгари сурилган бешта муҳим ташаббус доирасида ёшларни ватанпарварлик руҳида тарбиялаш, улар учун инклюзив ижодий муҳит яратиш ва эришилган ютуқларни оммалаштириш тадбирнинг асосий мезони сифатида белгиланди. Бу каби лойиҳалар нафақат санъатга бўлган қизиқишни орттиради, балки ёш авлоднинг бўш вақтини мазмунли ташкил этиш ва уларнинг қалбида миллий ғурур туйғуларини жўш урдиришга ҳам хизмат қилади.
Танловда тумандаги умумтаълим мактабларидан жами 55 та жамоа иштирок этгани беллашувнинг нечоғлик кенг қамровли ва муросасиз кечганидан далолат беради. Саҳнада жаранг сочган ўзбек миллий чолғу асбобларининг сеҳрли наволари, ўқувчиларнинг маҳорат билан ижро этган куйлари томошабинлар ва ҳакамлар ҳайъатининг олқишларига сазовор бўлди. Истеъдодли ёшларнинг чиқишларини баҳолаб бориш учун мусиқа ва санъат мактабининг кўп йиллик тажрибага эга, малакали ўқитувчилари жалб этилди. Ҳакамлар ҳайъати ҳар бир ижрони синчковлик билан кузатиб, куйнинг оҳангдорлиги, ижро маҳорати ва жамоавий жипсликка алоҳида эътибор қаратдилар. Миллий меросимиз бўлган чолғу ижрочилиги санъати ёшлар қўлида янгича мазмун ва жозиба касб этгани тадбирнинг энг қувонарли жиҳати бўлди.
Қизғин ва мароқли кечган баҳслар якунида ғолиблар аниқланди. Ҳакамлар ҳайъатининг хулосасига кўра, фахрли учинчи ўрин 28-сонли мактабнинг “Ёш санъатшунослар” жамоасига насиб этди ва улар 3-даражали диплом билан тақдирландилар. Иккинчи ўринни 40-сонли мактабнинг маҳоратли ёшларидан иборат “Дилнаво” жамоаси эгаллаб, 2-даражали дипломга лойиқ кўрилди. Танловнинг мутлақ ғолиби сифатида 55-сонли мактабнинг “Ғунча” жамоаси эътироф этилди. Ушбу жамоа 1-даражали диплом ҳамда “Келажак” марказининг махсус эсдалик совғалари билан тақдирланиб, ўз мактаби ва устозлари ишончини оқладилар. Шунингдек, тадбирни юқори даражада ўтказишда яқиндан кўмак берган ва мезбонлик қилган 9-сонли болалар мусиқа ва санъат мактаби жамоасига ташкилотчилар томонидан алоҳида ташаккурнома топширилди.
“Иқтидор мактаб ансамбли” танлови амударёлик ёшлар учун нафақат ижодий беллашув, балки дўстлик ва санъат байрамига айланди. Мазкур тадбир юртимизда ёш истеъдодларни излаб топиш, уларга ўз иқтидорларини намойиш этишлари учун кенг имкониятлар яратиш ишлари тизимли равишда йўлга қўйилганини яна бир бор исботлади. Зеро, санъатга ошно бўлган, мусиқани ҳис қилган ёшлар келажакда Ватанимизнинг маънавий пойдеворини мустаҳкамлайдиган комил инсонлар бўлиб вояга етадилар. Бугун саҳнага илк қадамларини қўяётган ушбу “ғунча”лар эртага катта санъат оламининг ёрқин юлдузларига айланишига шубҳа йўқ.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
