Нукусда «Жасорат учқунлари» мусобақасининг Республика босқичи бўлиб ўтди

Ҳар бир давлатнинг қудрати, тинчлиги ва келажаги унинг вояга етиб келаётган навқирон авлоди қалбида шаклланган ватанпарварлик туйғуси, мустаҳкам иродаси ҳамда ҳар томонлама етук билимлари билан ўлчанади. Бугунги шиддат билан ривожланиб бораётган глобаллашув даврида ёшларни нафақат жисмонан бақувват, балки маънан етук, замонавий билимларни пухта эгаллаган ва ўз Ватанини севадиган, унинг ҳимоясига доимо шай турадиган инсонлар этиб тарбиялаш энг устувор йўналишлардан бирига айланган. Нукус шаҳрида навқирон авлод вакиллари иштирокида ўтказилган “Жасорат учқунлари” спорт ва маърифий мусобақасининг Республика босқичи ҳам шу мақсадга қаратилган аҳамиятли тадбирлардан бири бўлди.

Ўсиб келаётган ёш авлод қалбида Ватанга муҳаббат, садоқат ва масъулият туйғуларини юксалтиришга хизмат қилувчи мазкур мусобақа шунчаки куч синашиш майдони эмас, балки ёшларнинг ўзига хос матонат, дўстлик ва билим мактабига айланди.

Ушбу нуфузли тадбирнинг очилиш маросимида Шимоли-ғарбий ҳарбий округ қўмондонлиги ҳамда Қорақалпоғистон Республикаси Мактабгача ва мактаб таълими бошқармасининг масъул раҳбарлари, ҳарбий хизматчилар ва фахрий устозлар иштирок этишди. Сўзга чиққанлар мамлакатимизда ёшларга қаратилаётган улкан эътибор, уларнинг ҳар томонлама баркамол бўлиб вояга етишлари учун яратилаётган кенг имкониятлар ҳақида тўхталиб ўтишди. Шунингдек, бу каби ҳарбий-ватанпарварлик мусобақалари ёшларда темир интизом, жамоавий жипслик ва мардлик фазилатларини янада ривожлантиришини алоҳида таъкидладилар.

Мусобақаларда Қорақалпоғистон Республикасининг барча ҳудудларида фаолият юритаётган “Жасорат мактаблари”нинг энг сара, чаққон ва билимли 5–9-синф ўқувчиларидан иборат жамоалар ўзаро беллашдилар. Эътиборли жиҳати шундаки, мазкур ёш тоифаси ўқувчиларнинг дунёқараши шаклланадиган, уларда етакчилик қобилиятлари юзага чиқадиган энг муҳим давр ҳисобланади.

Низомга кўра, ҳар бир жамоа 8 нафар иштирокчидан ташкил топган бўлиб, улар мусобақа давомида бир ёқадан бош чиқариб, ҳақиқий жамоавий руҳни, бир-бирини қўллаб-қувватлаш ва ўзаро уйғунликда ҳаракат қилиш кўникмаларини намойиш этишлари талаб этилди.

Иштирокчилар бир қатор мураккаб, аммо ўта қизиқарли ва муҳим 5 та йўналиш бўйича ўз маҳоратларини синовдан ўтказдилар. Хусусан, саф тайёргарлиги шартида ёшларнинг ҳарбий интизоми, қадамларни бир хилда ташлаши ва буйруқларни сўзсиз бажариши кўрикдан ўтказилди. Тиббий билим ва кўникмалар синови иштирокчиларни фавқулодда вазиятларда биринчи ёрдам кўрсатишга ўргатган бўлса, замонавий дунё талабларидан келиб чиққан ҳолда дастурга киритилган робототехника йўналиши ўқувчиларнинг интеллектуал салоҳияти ва муҳандислик иқтидорларини намоён этиш учун ажойиб майдон бўлди. Шунингдек, ҳуқуқий саводхонлик йўналишида ёшларнинг ўз ҳуқуқ ва бурчларини қай даражада билиши синовдан ўтказилди. Миллий спорт ўйинлари шартида эса уларнинг жисмоний бақувватлиги ва аждодларимиздан мерос бўлиб келаётган қадриятимизга бўлган ҳурмати яққол кўзга ташланди.

Кун бўйи давом этган, соғлом рақобат ва ҳаяжонли лаҳзаларга бой бўлган беллашувлар якунига кўра, ҳакамлар ҳайъати ғолибларни эълон қилди. Барча йўналишларда юқори натижаларни қайд этиб, ўзларининг тенгсиз эканликларини исботлаган Қонликўл туманидаги 2-сонли умумтаълим мактабининг “Лочин” жамоаси мутлақ ғолиб деб топилди ва фахрли 1-ўринни қўлга киритди.

Ўзининг мустаҳкам иродаси ва аҳил жамоавий ҳаракатлари билан ажралиб турган Тахиатош туманидаги 4-сонли умумтаълим мактабининг “Жайхун” жамоаси эса 2-ўринга сазовор бўлди. Ҳар бир шартда фаол иштирок этиб, ўзларининг қалқондек мустаҳкам эканликларини кўрсата олган Чимбой туманидаги 36-сонли умумтаълим мактабининг “Қалқон” жамоаси 3-ўрин соҳиби бўлди.

“Жасорат учқунлари” мусобақаси шунчаки танлов эмас, балки ёш қалбларда порлаган ватанпарварлик учқунларини юртга садоқат оловига айлантирган муҳим беллашув бўлди. Мана шундай иқтидорли ва шижоатли ёшлари бор юртнинг сарҳадлари дахлсиз, келажаги эса буюкдир.