Чорвачиликда санитария ойлиги: Амударё туманида амалий семинар ўтказилди

Мамлакатимиз иқтисодиётининг таянч устунларидан бири бўлган қишлоқ хўжалиги соҳасида чорвачилик алоҳида стратегик аҳамиятга эга. Халқимиз дастурхонининг тўкинлиги, озиқ-овқат хавфсизлиги ва аҳоли саломатлиги бевосита мана шу тармоқнинг қай даражада ривожланишига боғлиқ. Баҳор фаслида биологик жараёнлар фаоллашган бир даврда чорва молларини турли юқумли касалликлардан ҳимоя қилиш, ферма ва хўжаликларда юқори даражадаги санитария ҳолатини таъминлаш давр талабига айланади. Шу боисдан ҳам, Ўзбекистон Республикаси Қишлоқ хўжалиги вазирлиги ва Фермерлар кенгашининг қўшма мурожаати асосида жорий йилнинг 18 апрелидан 18 майигача бўлган давр мамлакатимиз бўйлаб «Чорвачиликда санитария-эпидемиология ва гигиена ойлиги» деб эълон қилинди. Ушбу муҳим ташаббус доирасида республикамизнинг барча ҳудудларида бўлгани каби, Амударё туманида ҳам кенг кўламли амалий тадбирлар ва тушунтириш ишлари бошлаб юборилди.

Мазкур ойликнинг мазмун-моҳиятини соҳа вакилларига етказиш ва амалий жараёнларни тизимли ташкил этиш мақсадида Амударё туманининг Бештом маҳалласи ҳудудида жойлашган «Маҳмуд, Мансур, Музаффар» масъулияти чекланган жамиятига қарашли фермада кўргазмали семинар ташкил этилди.

Тадбирда туман ҳокими Собир Хўжаметов, чорвачиликка ихтисослашган фермер хўжаликлари раислари ҳамда туман Ветеринария ва чорвачиликни ривожлантириш бўлими мутахассислари иштирок этишди. Семинар нафақат маълумот алмашиш майдони, балки мавжуд муаммоларни тезкорлик билан ҳал этиш ва келгусидаги режаларни белгилаб олиш учун ўзига хос амалий платформа вазифасини ўтади. Туман ҳокими Собир Хўжаметов ўз нутқида бугунги куннинг долзарб масалаларига алоҳида тўхталиб, Қишлоқ хўжалиги вазирлиги ва Фермерлар кенгашининг қўшма мурожаатида белгиланган вазифалар ҳар бир чорвадор учун дастуриламал бўлиши лозимлигини таъкидлади.

Ҳоким ўз нутқида чорвачилик маҳсулотларининг сифати ва хавфсизлиги бевосита ҳайвонлар сақланадиган жойларнинг гигиеник ҳолатига боғлиқ эканини қайд этди. Шу муносабат билан тумандаги барча чорвачилик фермер хўжаликларида режа асосида, ҳеч қандай кечикишларсиз, юқори сифатли дезинфекция ва дезинсекция ишларини олиб бориш юзасидан қатъий топшириқлар берилди. Бу каби тадбирлар фақатгина қоғозда эмас, балки амалда ўз ифодасини топиши, ҳар бир бош чорва молининг саломатлиги назорат остида бўлиши кераклиги алоҳида таъкидланди. Чунки баҳорги мавсумда зараркунанда ҳашаротлар ва касаллик қўзғатувчи микроорганизмларнинг кўпайиши чорва моллари ўртасида турли эпидемиялар келиб чиқишига сабаб бўлиши мумкин, бу эса иқтисодий жиҳатдан катта зарар демакдир.

Семинарнинг амалий қисми бевосита «Маҳмуд, Мансур, Музаффар» масъулияти чекланган жамиятига қарашли ферма ҳудудида давом эттирилди. Ушбу хўжалик тумандаги намунали ва истиқболли чорвачилик мажмуаларидан бири ҳисобланади. Бу ерда парвариш қилинаётган 410 бош наслли қорамолларнинг саломатлигини муҳофаза қилиш мақсадида ветеринария мутахассислари томонидан кенг қамровли профилактик тадбирлар амалга оширилди. Жумладан, жами 1260 квадрат метр майдонни эгаллаган чорвачилик бинолари, озуқа омборлари ва ёрдамчи иншоотлар махсус кимёвий воситалар ёрдамида дезинфекция қилинди. Ветеринария ходимлари замонавий техника ва самарали дори воситаларидан фойдаланган ҳолда, белгиланган меъёрлар асосида иш олиб боришди. Бу жараёнда асосий эътибор нафақат биноларнинг ички қисмига, балки ҳайвонлар ҳаракатланадиган атроф-муҳит ва суғориш тизимларининг тозалигига ҳам қаратилди.

Чорвачиликда санитария-эпидемиология ва гигиена қоидаларига риоя қилиш нафақат ҳайвонлар учун, балки ўша ерда меҳнат қилаётган ишчи-ходимларнинг саломатлиги учун ҳам ниҳоятда муҳимдир. Бундай кўргазмали семинарларнинг ўтказилиши бошқа фермер хўжаликлари раҳбарлари учун ҳам катта тажриба мактаби бўлди. Иштирокчилар дезинфекция жараёнининг техник жиҳатлари, қўлланиладиган воситаларнинг самарадорлиги ва хавфсизлик қоидалари билан яқиндан танишишди. Мутахассислар томонидан берилган тавсиялар чорвадорларга ўз хўжаликларида касалликларнинг олдини олиш бўйича муҳим амалий тажриба вазифасини ўтайди. Бу каби профилактик тадбирлар эса дастурхонларимиз тўкинлигини, бозорларимизда гўшт ва сут маҳсулотларининг арзон ҳамда сифатли бўлишини таъминлашга хизмат қилади.