Хавфсиз маҳалла — осойишта ҳаёт

Бугунги шиддатли даврда жамият осойишталиги ва фуқаролар хавфсизлигини таъминлаш ҳар қачонгидан ҳам долзарб аҳамият касб этмоқда. Айниқса, аҳоли гавжум бўладиган ҳудудларда, савдо мажмуалари ва аҳоли хонадонларида хавфсиз муҳитни шакллантириш давлат сиёсатининг устувор йўналишларидан бирига айланди. Бу борада Ўзбекистон Республикаси Президентининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги Қарори муҳим ҳуқуқий асос бўлиб хизмат қилмоқда. Мазкур ҳужжат ижросини таъминлаш, маҳаллаларда тинчлик ва барқарорликни мустаҳкамлаш мақсадида Амударё туманида ҳам кенг кўламли амалий ишлар олиб борилмоқда.

Туман Ички ишлар бўлими ҳузуридаги Қўриқлаш хизмати ходимлари томонидан амалга оширилаётган чора-тадбирлар замирида аввало инсон қадрини улуғлаш ва унинг мол-мулкини турли тажовузлардан ҳимоя қилишдек эзгу мақсад мужассам. 2026 йил давомида белгиланган иш режага мувофиқ, туман маҳаллаларида ҳуқуқбузарликларнинг барвақт олдини олиш ва жиноятчиликка қарши курашиш тизими сифат жиҳатидан янги босқичга кўтарилмоқда.

Қорақалпоғистон Республикаси Ички ишлар вазирлиги ҳузуридаги Қўриқлаш хизматининг тарғибот ишлари бўйича тасдиқланган режасига асосан, ҳудудлардаги криминоген вазият чуқур таҳлил қилиниб, алоҳида эътибор талаб этувчи, яъни “қизил” тоифага киритилган маҳаллаларда манзилли ўрганишлар олиб борилмоқда. Мазкур хатлов ишлари натижасида заиф нуқталар аниқланиб, замонавий техника воситалари ёрдамида хавфсизликни кучайтириш чоралари кўрилмоқда.

Жорий йилнинг 8 апрель куни Амударё туманининг Навоий маҳалласи ҳудудида жойлашган “Манғит деҳқон бозори” масъулияти чекланган жамияти ҳудудида навбатдаги профилактик тадбир ва тарғибот ишлари ташкил этилди. Тадбир доирасида бозор ҳудудида фаолият юритаётган 45 нафардан зиёд тадбиркор билан юзма-юз мулоқот ўтказилиб, уларга ўз мулкларини сақлашда замонавий қўриқлаш тизимларининг афзалликлари, тезкор ҳаракатланувчи гуруҳларнинг имкониятлари ва техник воситаларнинг ишончлилиги юзасидан батафсил маълумотлар берилди.

Профессионал ёндашув ва тушунтириш ишлари ўз самарасини бермай қолмади. Тадбиркорлар билан ўтказилган мулоқотлар давомида хавфсизлик тизими нафақат моддий бойликларни, балки инсонларнинг руҳий хотиржамлигини ҳам таъминловчи омил эканлиги алоҳида таъкидланди. Натижада, бозор ҳудудида фаолият юритаётган 7 та заргарлик дўкони эгалари замонавий ҳимоя воситаларини ўрнатишга қарор қилишди. Маълумки, заргарлик буюмлари савдоси билан шуғулланувчи нуқталар доимо юқори хавф остида бўлади, шу боис уларни “Ташвиш” тугмачаси орқали марказлашган қўриқлаш пунктига улаш энг мақбул ечим ҳисобланади.

Бундан ташқари, нафақат тадбиркорлик субъектлари, балки оддий фуқаролар ҳам ўз хонадонлари хавфсизлигига бефарқ эмасликларини кўрсатишди. Тарғибот натижасида икки нафар фуқаронинг турар жойи ҳам мазкур тизимга уланиб, юқори даражадаги хавфсизлик назорати остига олинди. Эндиликда ушбу объектларда бирор-бир нохуш ҳолат ёки таҳдид юзага келган тақдирда, “Ташвиш” тугмачасининг бир марта босилиши билан Қўриқлаш хизматининг тезкор гуруҳлари бир неча дақиқа ичида воқеа жойига етиб бориши кафолатланади.

Бу каби тизимли ишларнинг амалга оширилиши Амударё тумани маҳаллаларида жиноятчиликнинг олдини олиш ва жамоат тартибини сақлашда муҳим пойдевор бўлиб хизмат қилади. Президент қарори ижроси доирасида олиб борилаётган бундай манзилли чора-тадбирлар фақатгина маълум бир кун ёки тадбир билан чекланиб қолмайди. Бу жараён йил давомида изчил давом эттирилиб, ҳар бир хонадон ва ҳар бир тадбиркорлик нуқтаси хавфсиз маконга айлантирилиши кўзда тутилган.