Жўқорғи Кенгес Раиси Амударё туманида ёшлар билан учрашди
Бугун мамлакатимизда кечаётган шиддатли ислоҳотларнинг бош мезони, аввало, инсон қадрини улуғлаш, ҳар бир фуқаронинг орзу-ниятларини рўёбга чиқариш учун кенг имкониятлар эшигини очишдан иборатдир. Хусусан, жамиятимизнинг энг катта ва ҳаракатлантирувчи кучи бўлган ёшлар масаласи давлатимиз сиёсатининг устувор йўналишига айланиб улгурди. Давлатимиз Раҳбарининг бевосита ташаббуслари билан белгилаб берилган “Пайшанба — ёшлар куни” анъанаси бугун нафақат тақвимдаги бир сана, балки навқирон авлод вакилларининг дарду ташвишларини тинглайдиган, уларнинг эзгу мақсадларига қанот берадиган стратегик мулоқот майдонига айланди. Ушбу эзгу ташаббус доирасида ўтказилаётган учрашувлар ёшларнинг фикр ва ғояларини тинглаш, ижодий ва ижтимоий лойиҳаларини қўллаб-қувватлаш ҳамда уларнинг ҳаётий ва касбий салоҳиятини юксалтириш йўлида хизмат қилмоқда. Навбатдаги ана шундай самимий мулоқот Амударё туманида бўлиб ўтди.
Қорақалпоғистон Республикаси Жўқорғи Кенгеси Раиси Аманбай Оринбаев амударёлик ишсиз ва оталиққа олинган ёшлар билан учрашув ўтказди. Тадбир бошланишидан аввал ёшларнинг бандлигини таъминлаш, уларни доимий даромад манбаига эга қилиш мақсадида бўш иш ўринлари меҳнат ярмаркаси ташкил этилди. Шунингдек, иштирокчилар эътиборига ҳавола этилган махсус тақдимотларда бугунги кунда ёшлар ташаббусларини қўллаб-қувватлаш борасида яратилган шарт-шароитлар, берилаётган кенг кўламли имтиёзлар ва давлат грантлари ҳақида атрофлича маълумот берилди. Бу тақдимотлар шунчаки рақамлар мажмуаси эмас, балки ҳар бир йигит-қиз учун очилган янги имкониятлар харитасидир.
Учрашув давомида Жўқорғи Кенгес Раиси Президентимиз томонидан Қорақалпоғистон ёшларига қаратилаётган алоҳида эътибор ва ғамхўрлик ҳақида сўз юритар экан, бугунги кунда таълим олиш, замонавий касб-ҳунарларни эгаллаш ва ўз салоҳиятини намоён этиш учун яратилган шароитлар дунёнинг ҳеч бир мамлакатида кузатилмаётган ноёб тизим эканлигини таъкидлади. Қорақалпоғистонлик ёшларнинг ҳар бир ташаббуси давлатнинг доимий диққат марказида экани, уларнинг илм-фан, спорт, санъат ва тадбиркорлик соҳасида эришаётган ютуқлари эса юртимиз кучига куч, қудратига қудрат қўшаётгани алоҳида мамнуният билан қайд этилди. Чиндан ҳам, бугунги кунда берилган имкониятлардан оқилона фойдаланиб, нафақат ўз ҳаётини, балки жамият ривожини ҳам ўзгартираётган шижоатли ёшлар сафи кенгайиб бораётгани барчамизни бирдек қувонтиради.
Шундан кейин ёшлар билан юзма-юз, очиқ мулоқот ташкил этилди. Амударёлик йигит-қизлар ўзларини қизиқтирган масалалар, дуч келаётган муаммолар ва эртанги кун учун муҳим бўлган таклифларини ҳеч бир истиҳоласиз, эркин тарзда баён этдилар. Мулоқотлар давомида асосий эътибор ёшларни доимий иш билан таъминлаш, тадбиркорлик фаолиятини йўлга қўйишлари учун имтиёзли кредитлар ажратиш, замонавий касб-ҳунар ўргатиш ва олий таълим тизимидаги имкониятлардан фойдаланишларини қўллаб-қувватлаш каби масалаларга қаратилди. Ҳар бир мурожаат ортида бир тақдир, бир оиланинг келажаги ва бир инсоннинг орзуси мужассам эканини инобатга олган ҳолда, кўтарилган ҳар бир масала Жўқорғи Кенгес Раисининг шахсан назоратига олинди.
Мазкур учрашув шунчаки музокара эмас, балки муаммоларга ижобий ечим топиш майдонига айланди. Соҳа мутасаддиларига ҳар бир мурожаатни қисқа муддатларда ўрганиб чиқиш ва амалий ёрдам кўрсатиш бўйича қатъий топшириқлар берилди. Бу каби тадбирлар халқ билан давлат ўртасидаги ишонч кўпригини мустаҳкамлашга, ёшларнинг давлат бошқаруви ва ижтимоий ҳаётдаги иштирокини янада оширишга хизмат қилади. Зеро, ёшлари фаол ва ташаббускор бўлган юртда тараққиёт ва фаровонлик барқарор бўлади.
Хулоса ўрнида айтиш мумкинки, Амударё туманида бўлиб ўтган ушбу учрашув ёшларнинг эртанги кунга бўлган ишончини янада мустаҳкамлади. Бу каби амалий мулоқотлар эртанги кунимиз эгаларининг ўз юртига бўлган меҳрини, Ватан тақдирига дахлдорлик туйғусини янги босқичга олиб чиқиши шубҳасиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
