"Сиёсатдаги ёшлар" интеллектуал турнири ўтказилди
Ўзбекистон Халқ демократик партияси Қорақалпоғистон Республикаси Кенгаши томонидан Амударё туманида "Сиёсатдаги ёшлар" интеллектуал турнири ўтказилди.
Тадбирда Ўзбекистон Халқ демократик партияси Қорақалпоғистон Республикаси Кенгаши масъул ходимлари, Халқ депутатлари Амударё туман Кенгашидаги партия гуруҳи аъзолари, партиянинг "Ёшлар қаноти" аъзолари, партия фаоллари, ёшлар ва оммавий ахборот воситалари вакиллари иштирок этди.
Тадбирни Ўзбекистон Халқ демократик партияси Қорақалпоғистон Республикаси Кенгаши раиси ўринбосари Махмуд Есенгелдиев ҳамда партиянинг Қорақалпоғистон Республикаси Кенгаши Ёшлар ва хотин-қизлар билан ишлаш бўлими бошлиғи Гулназ Далибаевалар сўзга чиқиб иштирокчиларни самимий қутлаб, турнирда барча жамоаларга омад ва юксак натижалар тилади.
Интеллектуал турнирни ташкил этишдан асосий мақсад — ёшларнинг сиёсий билим ва кўникмаларини юксалтириш, уларнинг мамлакатимизда кечаётган сиёсий жараёнларда фаол ва онгли иштирокини таъминлашдан иборат. Шунингдек, ёшларнинг сиёсий-ҳуқуқий саводхонлигини аниқлаш, уларни ҳар томонлама қўллаб-қувватлаш ва рағбатлантириш ҳам устувор вазифа сифатида белгиланди.
Бу каби тадбирлар Ўзбекистон Халқ демократик партиясининг Сайловолди дастурида назарда тутилган вазифаларни амалиётга татбиқ этишда муҳим аҳамият касб этади. Айниқса, партия сафидаги ёшларнинг интеллектуал салоҳиятидан самарали фойдаланиш, юксак сиёсий билим ва ташкилотчилик қобилиятига эга бўлган иқтидорли ёшларни аниқлаш ҳамда уларнинг истеъдод ва салоҳиятини рўёбга чиқаришга хизмат қилади.
Интеллектуал турнирда ёшлардан иборат жамоалар билим ва тафаккур борасида ўзаро беллашди. Қизғин ва муросасиз кечган тадбир ёшларнинг интеллектуал салоҳияти, жамоавий ҳамжиҳатлиги ва тезкор фикрлаш қобилиятини намоён этди.
Танлов иштирокчилари икки шарт асосида ўз билим ва салоҳиятларини синовдан ўтказди.
“Тезкор савол-жавоб” деб номланган биринчи шартда жамоалар давлат бошқаруви, сиёсий жараёнлар ва ҳуқуқий тизимга оид саволларга қисқа вақт ичида аниқ ва тўғри жавоб бериш орқали ўз билим даражаси ҳамда тезкор фикрлаш қобилиятини намоён этди.
“Сиёсий тезкор жавоб бериш” номли иккинчи шартда эса иштирокчилар Ўзбекистон Республикаси Конституцияси, “Сиёсий партиялар тўғрисида”ги Қонун, Сайлов кодекси, Оила кодекси ва Меҳнат кодекси бўйича тайёрланган саволлар юзасидан ўзаро беллашиб, сиёсий-ҳуқуқий саводхонлик даражасини синовдан ўтказдилар.
Юқори савияда ва қизғин рақобат руҳида ўтган интеллектуал турнир якунларига кўра ғолиб жамоалар аниқланди.
Мазкур беллашувда билим ва заковати билан ажралиб турган “Юксалиш” жамоаси фахрли биринчи ўринни қўлга киритди. “Ёшлар” ва “Тараққиёт” жамоалари иккинчи ўринга, “Қалқон” ҳамда “Ватанпарвар” жамоалари эса учинчи ўринга сазовор бўлди.
Ғолиблар партиянинг Қорақалпоғистон Республикаси Кенгаши томонидан тайёрланган махсус диплом ва эсдалик совғалари билан тақдирланди.
Шунингдек, тадбир якунида партия сафига янгидан қабул қилинган аъзоларга партиянинг аъзолик гувоҳномалари тантанали равишда топширилди.
Ўзбекистон ХДП Қорақалпоғистон Республикаси Кенгаши
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
