Амударёда ҳукумат раҳбари ва ёш авлод ўртасида очиқ мулоқот бўлиб ўтди
Мамлакатимизда ёшларга оид давлат сиёсати бугунги кунда янги босқичга кўтарилди. Эртанги кунимиз эгалари бўлган йигит-қизларнинг замонавий билим ва касб-ҳунарларни эгаллаши, жамиятда ўз ўрнини топиши ҳамда уларнинг ташаббусларини ҳар томонлама қўллаб-қувватлаш давлат сиёсатининг энг устувор йўналишларидан бирига айланган. Бу борада жойларда ташкил этилаётган “Раҳбар ва ёшлар учрашувлари” давлат идоралари ва ёш авлод ўртасидаги ишонч кўпригини мустаҳкамлашда муҳим аҳамият касб этмоқда. Амударё туманида ўтказилган навбатдаги йирик анжуман ҳам айни шу мақсадларга хизмат қилди. Ушбу муҳим тадбирда Қорақалпоғистон Республикаси Вазирлар Кенгашининг Раиси Фарход Эрманов иштирок этиб, туман ёшлари билан юзма-юз мулоқот қилди. Учрашувда, шунингдек, Ёшлар ишлари агентлиги Қорақалпоғистон Республикаси бошқармаси бошлиғи Полат Мақсетбаев, Амударё тумани ҳокими Собир Хўжаметов, республика ва туман миқёсидаги турли соҳа раҳбарлари, таълим муассасалари ва ташкилотлар вакиллари ҳамда юзлаб фаол ёшлар қатнашдилар.
Тадбир аввалида сўз олганлар бугунги глобаллашув даврида ёшлар учун яратилаётган кенг кўламли имкониятлар хусусида атрофлича тўхталиб ўтдилар. Мулоқот давомида кун тартибидаги энг долзарб масалалар — сифатли таълим олиш, бандликни таъминлаш, ёшлар тадбиркорлигини ривожлантириш ва замонавий касб-ҳунарларни ўрганиш бўйича батафсил маълумотлар берилди.
Хусусан, мутахассислар томонидан иқтидорли ёшларни қўллаб-қувватлашга қаратилган давлат грантлари, ўз бизнесини бошлаш истагида бўлганлар учун имтиёзли кредитлар ажратиш тартиби ҳамда инновацион ғояларни ҳаётга татбиқ этишга мўлжалланган стартап лойиҳалар танловлари ҳақида аниқ тавсиялар берилди. Шунингдек, бугунги куннинг талабидан келиб чиқиб, хорижий давлатларнинг нуфузли олийгоҳларида таълим олиш ҳамда ривожланган мамлакатларда қонуний ва хавфсиз меҳнат фаолиятини йўлга қўйиш механизмлари бўйича ҳам тушунтириш ишлари олиб борилди.
Учрашувнинг энг эътиборли ва муҳим жиҳати унинг расмиятчиликдан холи, очиқ ва самимий мулоқот руҳида ўтганлигидадир. Тадбирда ёшлар ўзларини ўйлантираётган муаммолар, соҳаларда учраётган тўсиқ ва камчиликлар ҳамда туман ривожига ҳисса қўшадиган янги таклиф ва ташаббуслар билан тўғридан-тўғри Қорақалпоғистон Республикаси Вазирлар Кенгаши Раисига мурожаат қилиш имконига эга бўлдилар.
“Очиқ микрофон” форматида ўтган мулоқотда ёшларнинг шижоати, интилиши ва эртанги кунга бўлган ишончи яққол намоён бўлди. Вазирлар Кенгаши раҳбари Фарход Эрманов ҳар бир мурожаатни диққат билан тинглаб, уларнинг ечими юзасидан мутасадди раҳбарларга қатъий топшириқлар берди. Қувонарлиси шундаки, ёшлар томонидан кўтарилган масалаларнинг аксариятига жойида ижобий ечим топилди, вақт ва ўрганиш талаб этадиган мурожаатлар эса алоҳида назоратга олиниб, ижро муддатлари белгиланди.
Бу каби учрашувлар нафақат муаммоларни ҳал этиш майдони, балки ёшларни янги марралар сари руҳлантирувчи куч ҳамдир. Амударё туманида ўтказилган мазкур тадбир ёшларнинг жамият ҳаётидаги ижтимоий фаоллигини ошириш, уларни давлат бошқаруви ва ислоҳотлар жараёнида дахлдорлик ҳисси билан яшашга ундашда муҳим аҳамият касб этди. Раҳбар ва ёшлар ўртасидаги бундай жонли мулоқотлар бюрократик тўсиқларни бартараф этиб, ёш авлоднинг орзу-умидларини рўёбга чиқаришга хизмат қилиши шубҳасиз. Мазкур учрашув мамлакатимизда ёшлар сиёсатининг амалдаги ёрқин ифодаси бўлиб, ёш авлодга берилаётган юксак эътиборнинг яна бир амалий намунаси сифатида тарихга кирди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
