Амударё туманида “Раҳбар ва ёшлар учрашуви” бўлиб ўтди

Амударё туманида ёшларнинг муаммо ва ташаббусларини тинглаш, уларни қўллаб-қувватлаш ҳамда келажак сари дадил қадам ташлашларига кўмак бериш мақсадида навбатдаги “Раҳбар ва ёшлар учрашуви” ташкил этилди. Тадбир Амударё тумани Маданият бўлимида очиқ, самимий мулоқот руҳида ўтказилди.

Учрашувда туман ҳокими Собир Хўжаметов, ҳоким ўринбосари Нодирбек Камолов, туман прокурори Баҳрам Машарипов, Ички ишлар бўлими бошлиғи Тимур Дошумбаев, Ёшлар ишлари бўлими бошлиғи Бекзод Ўринбоев, шунингдек, касб-ҳунар техникумлари, тижорат банклари ва бошқа мутасадди ташкилотлар вакиллари иштирок этдилар.

Учрашувни очиб берган туман ҳокими Собир Хўжаметов ўз сўзида ёшлар билан ишлаш давлат сиёсатининг энг муҳим йўналишларидан бири эканини таъкидлади.

“Бугун ёшлар учун яратилаётган имкониятлар ҳар қачонгидан ҳам кенг. Энг муҳими, бу имкониятлардан тўғри фойдаланиш, билим ва касб эгаллаш, ташаббус кўрсатиш зарур. Раҳбарлар сифатида биз ёшларнинг ҳар бир муаммосига ечим топишга тайёрмиз”, — деди туман ҳокими.

Шунингдек, ҳоким ёшлар бандлигини таъминлаш, уларни замонавий касбларга йўналтириш, тадбиркорлик ташаббусларини қўллаб-қувватлаш масалалари доимий назоратда эканини қайд этди.

Ҳоким ўринбосари Нодирбек Камолов ёшлар бандлигини таъминлаш борасида амалга оширилаётган ишлар, бўш иш ўринлари, касб-ҳунар техникумларида мавжуд йўналишлар ҳақида батафсил маълумот берди. У ёшларни қисқа муддатли касб ўргатиш курсларига жалб этиш, “Устоз-шогирд” анъанаси асосида ҳунар ўрганиш имкониятлари кенгайиб бораётганини таъкидлади.

Ҳоким ўринбосари ўз сўзида ёшлар дафтари орқали моддий ва ижтимоий ёрдамлар, стартап ва инновацион лойиҳаларни қўллаб-қувватлаш, имтиёзли кредитлар ва субсидия механизмлари, ёш тадбиркорларга ер майдонлари ва бино-иншоотлардан фойдаланиш имкониятлари ҳақида атрофлича тушунтириш берди.

Туман прокурори Баҳрам Машарипов ёшларнинг ҳуқуқ ва мажбуриятлари, қонунларга риоя қилиш, ҳуқуқий маданиятни ошириш масалаларига алоҳида тўхталди. У ёшлар ўртасида ҳуқуқбузарликларнинг олдини олиш, уларнинг ҳуқуқий саводхонлигини ошириш борасида олиб борилаётган профилактик тадбирлар ҳақида маълумот берди.

Ички ишлар бўлими бошлиғи Тимур Дошумбаев эса ёшларни турли салбий иллатлардан асраш, соғлом турмуш тарзини тарғиб қилиш, жиноятчиликка қарши курашда ёшларнинг фаоллиги муҳим эканини таъкидлади.

Учрашув давомида ёшлар ўзларини қизиқтирган саволлар, бандлик, таълим, кредит олиш, тадбиркорликни бошлаш, ҳуқуқий масалалар юзасидан мурожаатлар билан чиқишди. Масъуллар томонидан ҳар бир мурожаат атрофлича кўриб чиқилиб, айрим масалалар жойида ҳал этилди, қолганлари бўйича аниқ чора-тадбирлар белгиланди.

Тадбирда туман Маданият бўлими хонандалари томонидан ижро қилинган бетакрор куй-қўшиқлар барча иштирокчиларига юқори кайфият бағишлади.

Мазкур “Раҳбар ва ёшлар учрашуви” ёшларнинг ижтимоий фаоллигини ошириш, уларни қўллаб-қувватлаш, муаммо ва таклифларини бевосита тинглашда муҳим майдон бўлиб хизмат қилди. Энг асосийси, бу мулоқот ёшларнинг ўз келажагига бўлган ишончини янада мустаҳкамлаб, янги марралар сари ундади.

Чарос Арслонова, туман ҳокимлигининг Ахборот хизмати раҳбари.