Ичимлик сув иншоотлари технологик аудитдан ўтказилмоқда

Маълумки, Оролбўйи минтақасида аҳолини тоза ичимлик суви билан таъминлаш, сув ресурсларидан оқилона фойдаланиш ва коммунал соҳадаги инфратузилмани модернизация қилиш масаласи давлатимиз ва ҳукуматимизнинг доимий эътибор марказидаги масалалардан бири ҳисобланади. Сабаби, аҳолининг турмуш фаровонлигини ошириш, саломатлигини муҳофаза қилиш бевосита сифатли ичимлик суви таъминотига боғлиқ.

Шу боис, соҳада олиб борилаётган ислоҳотлар кўлами йил сайин кенгайиб, мавжуд сув иншоотларининг техник ҳолатини яхшилаш ва хизмат кўрсатиш сифатини оширишга қаратилган аниқ чора-тадбирлар амалга оширилмоқда. Хусусан, бугунги кунда "Қорақалпоқ сув таъминоти" акциядорлик жамияти томонидан республика ҳудудидаги 412 дона сув иншоотлари орқали халқимизга тоза ичимлик суви етказиб бериш ҳамда канализация хизматларини кўрсатиш йўлга қўйилган. Бироқ, ушбу иншоотларнинг самарадорлигини доимий равишда таҳлил қилиш ва назоратга олиш давр талабидир.

Бу борада Ўзбекистон Республикаси Президентининг 2025 йил 14 апрелдаги "Қурилиш ва уй-жой коммунал хўжалиги соҳасида давлат назоратини самарали ташкил этиш чора-тадбирлари тўғрисида"ги 66-сонли фармони соҳа ходимлари олдига янги ва долзарб вазифаларни қўйди. Мазкур фармоннинг 4-кичик бандига мувофиқ, 2025 йилнинг 1 июлидан бошлаб барча ичимлик сув таъминоти ва оқова сувларни чиқариб юбориш тизими объектларини технологик аудитдан ўтказиш тартиби қатъий белгилаб берилди. Бундан кўзланган асосий мақсад — тизимдаги мавжуд муаммоларни ўз вақтида аниқлаш, маънан ва жисмонан эскирган ускуналарни янгилаш ҳамда энергия ресурсларини тежаш орқали аҳолига кўрсатилаётган хизматлар сифатини оширишдан иборатдир.

Фармон ижросини таъминлаш мақсадида Қорақалпоғистон Республикаси ҳудудий қурилиш ва уй-жой коммунал хўжалиги соҳасида назорат инспекцияси ҳамда "Қорақалпоқ сув таъминоти" акциадорлик жамияти мутахассислари ҳамкорлигида технологик аудит ўтказиш бўйича махсус режа-график ишлаб чиқилди ва амалиётга татбиқ этилди.

Тасдиқланган режа-жадвалга асосан, айни кунларда жойлардаги ичимлик сув таъминоти ва оқова сув тизими объектларида кенг қамровли ўрганиш ишлари олиб борилмоқда. Инспекция ходимлари томонидан объектларнинг қурилган йили, лойиҳавий ва амалдаги қуввати, ишлаб чиқариш унумдорлиги, модернизация қилиш зарурати ва бошқа муҳим технологик параметрлари синчковлик билан кўздан кечирилмоқда. Бу жараён шунчаки статистик маълумот тўплаш эмас, балки иншоотларнинг самарадорлигини текширувчи чуқур таҳлилий жараёндир.

Ушбу режа-жадвал асосида яқинда Амударё туманининг Бўз ёп овули ҳудудида жойлашган сув иншоотида ҳам назорат тадбирлари ўтказилди. Мутахассислар станциянинг бугунги кундаги техник ҳолатини ўрганиб, насос агрегатларининг иш самарадорлиги, сув тозалаш тизимининг созлиги ва электр энергияси сарфи кўрсаткичларини таҳлил қилдилар.

Технологик аудитнинг энг муҳим жиҳати унинг натижадорлигида намоён бўлади. Ўрганишлар якунига кўра, Қорақалпоғистон Республикаси ҳудудий қурилиш ва уй-жой коммунал хўжалиги соҳасида назорат инспекцияси томонидан ҳар бир объект бўйича махсус хулосалар тайёрланади.

Ушбу ҳужжатда кўздан кечирилган қурилманинг унумдорлигини ошириш, аниқланган техник камчиликларни бартараф этиш, зарур ҳолларда ускуналарни замонавий тежамкор технологияларга алмаштириш бўйича аниқ тавсия ва кўрсатмалар акс этади. Бу эса сув таъминоти корхоналарига ўз фаолиятини қайта кўриб чиқиш, мавжуд ресурслардан оқилона фойдаланиш ва пировардида аҳолини узлуксиз ва сифатли ичимлик суви билан таъминлаш имконини беради.

Ҳозирги вақтда бундай назорат тадбирлари Қорақалпоғистоннинг барча туман ва шаҳарларида давом эттирилмоқда. Зеро, ҳар бир хонадонга кириб бораётган тоза ичимлик суви — халқимиз фаровонлиги ва саломатлигининг муҳим кафолатидир.