Техниканинг созлиги – мўл ҳосил гарови
Халқимизда “Қиш ғамини ёзда кўр”, деган ҳикмат бежиз айтилмаган. Зеро, қишлоқ хўжалигида ҳар бир дақиқа ғанимат, айниқса, баҳорги экиш мавсуми яқинлашгани сайин дала меҳнаткашлари зиммасидаги масъулият икки ҳисса ортади.
Амударё туманида ҳам айни куларда баҳорги дала ишларига қизғин ҳозирлик кўрилмоқда. Ушбу жараён Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Амударё туман бўлими ходимлари томонидан мониторинг қилиб борилмоқда. Маълумки, сифатли ва ўз вақтида бажарилган агротехник тадбирларнинг муваффақияти, аввало, қишлоқ хўжалиги техникаларининг созлигига, уларнинг мавсумга шайлигига бевосита боғлиқ. Шу боис, тумандаги барча мутасадди ташкилотлар ва фермер хўжаликлари куч-ғайрати техникаларни таъмирлаш ва созлаш ишларига сафарбар этилган. Бу жараён эртанги кун хирмонининг баракаси учун қўйилаётган мустаҳкам пойдевордир.
Туман бўйича 2026 йилги баҳорги дала ишлари мавсумига тайёргарлик кўриш мақсадида ишлаб чиқилган чора-тадбирлар режасига мувофиқ, мавжуд 16 та устахоналарда кенг кўламли таъмирлаш ишлари ташкил қилинган. Режага асосан, туман бўйича жами 150 дона чигит экиш сеялкалари, 325 дона культиватор, 1700 дона тишли борона ва 293 дона ер текислагич молалар тўлиқ таъмирдан чиқарилиши белгиланган.
Эътиборли жиҳати шундаки, бу йилги мавсумда техника ва агрегатларни замонавий агротехнология талабларига мослаштиришга алоҳида урғу берилмоқда. Хусусан, чигит экиш ва ишлов бериш техникаларини 76 сантиметрли оралиқ схемасига ўтказиш ва мослаштириш ишлари олиб борилаётгани, келажакда ғўза парваришида қатор ораларига ишлов бериш сифатини оширишга, ўсимликнинг ривожланиши учун қулай шароит яратишга хизмат қилади. Мутахассисларнинг таъкидлашича, ушбу схеманинг қўлланилиши техникаларнинг даладаги ҳаракати давомида кўчатларга шикаст етказмаслигини ва агротехник тадбирларнинг юқори аниқликда бажарилишини таъминлайди.
Таъмирлаш ишларининг бориши айрим ҳудудларда намунали ташкил этилганини алоҳида қайд этиш жоиз. Жумладан, Оқ олтин овулидаги фермерларнинг техникалари жамланган устахонада фаолият юритаётган муҳандис-техник ходимлар ва тажрибали чилангарларнинг саъй-ҳаракати билан таъмирлаш ишлари жадал суръатларда якунига етказилмоқда.
Мазкур масканда режалаштирилган техникалардан 12 дона чигит экиш сеялкаси, 16 дона культиватор, 88 дона тишли борона ҳамда 16 дона темир молалар мавсумга тўлиқ шай ҳолатга келтирилди. Ушбу агрегатларнинг барчаси кўрикдан ўтказилиб, эскирган қисмлари янгисига алмаштирилди, бўёқлаш ва мойлаш ишлари сифатли бажарилди.
Худди шундай уюшқоқликни Холимбег овулида ҳудудида ҳам кузатиш мумкин. Ушбу ҳудудда ҳам баҳорги мавсум олдидан техника паркини янгилаш ва созлаш ишларига жиддий эътибор қаратилган. Бугунги кунга келиб, мазкур устахонада 9 дона чигит экиш сеялкаси, 13 дона культиватор, 72 дона тишли борона ва 12 дона темир молаларни таъмирлаш ишлари тўлиқ якунланди.
Бу каби амалий ишларнинг замирида биргина мақсад ётибди: баҳорнинг ғанимат дамларида, тупроқда намлик сақланиб турадиган қисқа муддат ичида чигитни ерга қадаш ва уни парваришлаш ишларини кечиктирмасдан амалга оширишдир. Техника соз бўлса, ишда унум, деҳқоннинг кўнглида хотиржамлик бўлади. Агрегатларнинг, айниқса, борона ва молаларнинг созлиги эса ерга сифатли ишлов бериш, тупроқни майин ҳолатга келтириш ва намликни сақлашда муҳим роль ўйнайди.
Амударё туманида олиб борилаётган бундай тизимли ишлар, техникаларни мавсумга тайёрлаш жараёнлари 2026 йилда мўл ва сифатли пахта ҳосили етиштириш учун мустаҳкам замин яратади, дейишга тўлиқ асос бўла олади. Зеро, бугунги ҳаракат – эртанги барака демакдир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
