“ХАВФСИЗ ВА СОҒЛОМ ЮРТ” ЛОЙИҲАСИ ДОИРАСИДА ТЕЗКОР ПРОФИЛАКТИК ТАДБИРЛАР ЎТКАЗИЛДИ
Ўзбекистон Республикаси Президентининг “Таълим муассасаларида йўл ҳаракати қоидалари тарғиботини кучайтириш чора-тадбирлари тўғрисида”ги Фармонида белгиланган вазифаларни изчиллик билан амалга ошириш, ўсиб келаётган ёш авлодни йўл ҳаракати билан боғлиқ хавф-хатарлардан ҳимоя қилиш, йўлларда ҳаракат хавфсизлигини таъминлаш мақсадида Амударё туман Ички ишлар бўлими Йўл ҳаракати хавфсизлиги бўлими инспекторлари томонидан таълим муассасаларида мунтазам тарғибот-ташвиқот ишлари олиб борилмоқда. Таълим-тарбия муассасаларида кўнгилли ёшлар иштирокида “Йўл ҳаракати хавфсизлиги тарғиботчиси” ва “Яшил чироқ” мусобақалари ташкил этилиб, барча ёш тоифаларидаги ўқувчи-ёшлар қамраб олинмоқда.
Навбатдаги ана шундай тарғибот тадбири Амударё тумани Мактабгача ва мактаб таълими бўлими тасарруфидаги 36-сонли умумтаълим мактаби ўқувчи-ёшлари иштирокида “Йўл ҳаракати интизоми болаликдан бошланади” шиори остида ўтказилди.
Тадбир аввалида туман Ички ишлар бўлимининг Йўл ҳаракати хавфсизлиги бўлими бошлиғи Бегзод Қазақов мактабда ташкил этилган йўл ҳаракатини ўрганиш майдончаси ва йўл ҳаракати хавфсизлиги синф хонаси билан яқиндан танишди.
Шу билан бирга, Бегзод Қазақов таълим муассасаларида йўл ҳаракати қоидалари тарғиботини кучайтириш борасида қонунчилик ҳужжатларида белгиланган чора-тадбирлар хусусида ўқувчиларга батафсил маълумот ва тушунчалар берди. Ўз навбатида ўқувчи-ёшлар йўл ҳаракати хавфсизлиги бўйича ўзларини қизиқтирган саволлар билан мурожаат қилдилар. Уларнинг саволларига жавоб бериш жараёнида Бегзод Қазақов йўлларда, чорраҳаларда, пиёдалар ўтиш жойларида ҳаракатланиш асосларини амалий кўргазмали тарзда, ўқувчилар иштирокида ташкил этиб, йўл ҳаракати қоидаларига амал қилиш йўлларда ҳаракатланиш маданияти эканлигини таъкидлади.
Шу куни Йўл ҳаракати хавфсизлиги бўлими бошлиғи Бегзод Қазақов раҳбарлигида “Хавфсиз ва соғлом юрт” лойиҳаси доирасида кенг қамровли тезкор профилактик тадбири ҳам ўтказилди. Тадбир давомида туманимиз йўлларида ҳаракатланаётган автотранспорт воситаларининг техник ҳолати ва ҳайдовчиларнинг ҳаракат хавфсизлиги қоидаларига амал қилиш ҳолатлари ўрганилди.
Кенг қамровли назорат тадбирлари жараёнида ЙҲХБ инспекторлари томонидан 4 та ҳолатда автотранспортни бошқариш ҳуқуқини тасдиқловчи ҳужжатларсиз транспорт бошқариш, 7 та ҳолатда автомобилни ноқонуний қайта жиҳозлаш ҳолати аниқланди. Шунингдек, 1 нафар ҳайдовчининг спиртли ичимлик истеъмол қилган ҳолда, 5 нафар ҳайдовчининг эса қоидабузарликлари учун қарздорлиги бўла туриб, транспорт воситасини бошқараётгани ҳолати аниқланди. Тезкор назорат тадбирлари жараёнида қоидабузарлиги қайд қилинган жами 23 нафар фуқароларнинг автотранспорт воситалари жарима майдончасига қўйилиб, ҳайдовчиларга нисбатан баённомалар расмийлаштирилди.
Йўл қоидаси — умр фойдаси, деб бекорга айтишмаган. Ҳақиқатан ҳам мамлакатимиз қонунчилик ҳужжатлари билан мустаҳкамлаб қўйилган йўл ҳаракати қоидаларига, йўлда ҳаракатланиш маданиятига амал қилиш нафақат инсонларнинг умрини узайтиради, балки эл-юрт осойишталиги, саломатлиги ва фаровонлигини таъминлайди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
