Ёшлар ташкилотида меҳнат қилган фахрийлар учрашди

Ҳар қандай жамиятнинг эртанги куни, унинг тақдири ва тараққиёти бевосита ёш авлоднинг қандай тарбия топиши билан чамбарчас боғлиқ. Айнан шу сабабли, барча даврларда ҳам навқирон авлодни жисмонан соғлом, маънан етук, билимли ва фаол фуқаро сифатида камол топтириш давлат сиёсатининг энг устувор йўналишларидан бири бўлиб келган. Бу муҳим вазифа нафақат давлатнинг, балки оиладан тортиб фуқаролик жамиятининг барча институтлари олдига улкан масъулият юклайди.

Ўзбекистоннинг яқин тарихига назар ташлар эканмиз, ёшлар билан ишлаш ташкилоти турли ном ва тузилмалар остида, аммо ягона мақсад йўлида фаолият юритганига гувоҳ бўламиз. Собиқ иттифоқ давридаги "Комсомол" қўмитасидан тортиб, мустақилликнинг дастлабки йилларида, яъни 1991-1996 йилларда фаолият юритган Ўзбекистон Ёшлар иттифоқигача, кейинчалик 1996 йилда ташкил этилиб, 2001 йилда Ёшлар ижтимоий ҳаракатига айлантирилган "Камолот" ташкилоти ҳам ана шу эзгу мақсадларга хизмат қилиб келган.

Вақт ўтиши билан замон талаблари ўзгарди. 2017 йилда "Камолот" ёшлар ижтимоий ҳаракати фаолияти танқидий кўриб чиқилиб, ёшларни янада кенгроқ қамраб олиш мақсадида тизим тубдан ислоҳ қилинди ва Ўзбекистон ёшлар иттифоқи ташкил этилди. Кейинчалик бу йўналишдаги ишлар янада такомиллашиб, ташкилот Ёшлар ишлари агентлиги сифатида фаолиятини давом эттирмоқда.

Номи ва тузилиши қандай бўлмасин, бу ташкилотларнинг асл мақсади ўзгармади: уларнинг зиммасига ёшларни билимли, халқаро майдонда рақобатбардош, ўз позициясига эга, катталарга ҳурмат ва кичикларга ғамхўрлик руҳида тарбиялаш, ўзбек маданияти ва анъаналарини эъзозлайдиган маънавиятли авлодни вояга етказиш вазифаси юкланди.

Албатта, ҳар қандай ташкилотнинг муваффақияти, аввало, унда фаолият юритган фидойи инсонларга боғлиқ. Амударё туманида ҳам ана шундай, умрининг энг қайноқ ва серғайрат дамларини ёшлар ташкилоти сафларида ўтказган, уларнинг ҳаётини мазмунли қилишга ҳисса қўшган, бугун эса кексалик гаштини сураётган фахрийлар кўпчиликни ташкил этади.

Яқинда ушбу фахрийлар Манғит шаҳрида жам бўлиб, унутилмас дийдорлашув тадбирини ўтказдилар. Улар орасида турли йилларда масъул лавозимларда ишлаган Озод Тожимуродов, Гуласал Ўрозимбетова, Гулчеҳра Отабоева, Сайёра Маткаримова, Фарҳод Маткаримов каби ўнлаб фахрийлар, ўз соҳасининг фидойилари бор.

Тадбирда узоқ йиллар ёшлар ташкилотида ва давлат идораларида ишлаган меҳнат фахрийлари Рустам Рўзметов, Хонимжон Ражабова ва бошқа фахрийлар барчани дийдор онлари билан қутлаб, энг эзгу тилакларни изҳор қилди. Шундан сўнг фахрийлар ўзлари билан бир ташкилотда, ягона маслак йўлида, бир сафда туриб меҳнат қилган, бугун эса оламдан ўтган устозлар ва дўстлар хотирасини ёдга олиб Қуръон тиловат қилдилар.

Дўстлар дийдорида бир-бирини соғинган нигоҳлар сўзлади, кўнгиллар кўнгиллардан қувват олди. Ҳаётнинг энг қайноқ, сермашаққат, аммо шарафли дамлари – айни куч-ғайратга тўлган пайтида амалга оширган эзгу ишларини, ўтказган тадбирлари ва эришган ютуқларини фахр билан ёдга олдилар. Олис ўтмишнинг сермазмун йиллари яна бир бор фахрийлар кўз ўнгида жонланди.

Умр ўткинчи, бироқ шу ўтган давр мобайнида эл-юрт манфаати, айниқса, келажак авлод камолоти учун хизмат қилиш, ортдан яхши ном ва ёруғ хотиралар қолдириш – ҳақиқий бахтдир. Мазкур дийдорлашув иштирокчилари айнан шундай бахтга мушарраф бўлган, бир-бирини йўқлаб, соғиниб яшайдиган инсонлардир. Уларга узоқ умр ва тилаган ҳолда ҳамиша фарзандларингизнинг, шогирдларингизнинг бахту камолини кўринг, дея тилак билдирамиз.