Қурилишлар Прокуратура назоратида
Сўнгги йилларда Президентимизнинг алоҳида эътибор ва ташаббуслари билан мамлакатимиз таълим-тарбия тизимида жиддий ислоҳотлар амалга оширилиб, ўсиб келаётган ёш авлоднинг мукаммал билим олишлари учун зарур шарт-шароитлар яратилди. Энг олис ҳудудлардаги умумтаълим мактаблари ва мактабгача таълим ташкилотларининг ҳам эскирган биноларини таъмирлаш, реконструкция қилиш, замонавий таълим стандартларига жавоб бермайдиган муассасаларни янгидан бунёд этиш борасида кенг кўламли бунёдкорлик ишлари олиб борилмоқда.
Айниқса, мамлакатимиз Президентининг 2024 йил 24 декабрдаги “2025-2027 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги қарори ижросини таъминлашга қаратилган саъй-ҳаракатлар туфайли мамлакатимизда, шу жумладан Амударё туманида ҳам таъмирталаб ҳолатга келиб қолган таълим-тарбия муассасалари жорий таъмирланиб, реконструкция қилинмоқда. Йиллар давомида таълим-тарбия ишларини олиб боришда ўқитувчилар учун ноқулайлик туғдираётган, мослаштирилган биноларда фаолият олиб бораётган таълим муассасалари учун янги бинолар қуриб берилмоқда.
Маълумот ўрнида айтиш жоизки, Президент қарори билан “Ўзбекистон–2030” стратегиясида белгилаб берилган вазифаларни ҳаётга татбиқ этиш, ҳудудларда, шунингдек, маҳаллаларда ижтимоий ва ишлаб чиқариш инфратузилмасини янада ривожлантириш орқали аҳолининг турмуш даражасини ошириш ҳамда қурилиш соҳасидаги тадбиркорлар учун қулай инвестиция муҳитини яратиш, атроф-муҳитни асраш, “Яшил иқтисодиёт” йўналишларидаги бунёдкорлик ишларига 2025 йил давомида 2,4 триллион сўм маблағ ажратилди.
Шунингдек, объектларни лойиҳалаштириш ва қуришда атроф-муҳитга таъсирни камайтириш ва қайта тикланувчи энергия манбаларидан фойдаланиш, 2025 йилдан бошлаб ҳар йили умумтаълим мактабларининг санитария-гигиеник инфратузилмасини яхшилаш учун камида 100 млрд сўм маблағ ажратиб бориш белгиланган эди.
Айни пайтда ушбу қарор асосида Амударё туманида 8 та ижтимоий соҳа объектларида кенг кўламли қурилиш, жорий таъмирлаш ва реконструкция ишлари олиб борилмоқда. Мазкур қурилиш-таъмирлаш ва реконструкция ишларининг сифатли бажарилиши ва белгиланган муддатларда фойдаланишга топширилиши юзасидан прокурор назорати ўрнатилиб, ҳафталик, ойлик ва йил чораклиги бўйича белгиланган режаларнинг сифатли бажарилиши қатъий мониторинг қилиб борилмоқда.
Яқинда Амударё туман прокурори Баҳром Машарипов раҳбарлигида ушбу 8 та ижтимоий соҳа объектларида олиб борилаётган бунёдкорлик ишлари жойига чиққан ҳолда ўрганилди.
Дастлабки кузатишлар туманнинг Чойкўл овулидаги 59-сонли умумтаълим мактаби ҳудудида амалга оширилаётган реконструкция ишлари билан танишишдан бошланди. Мазкур мактаб биносининг реконструкция ишларини “Амударё хизмат кўрсатиш маркази” масъулияти чекланган жамият қурувчилари амалга оширишмоқда. Туман прокурори реконструкция ишлари билан танишиш асносида қурилишнинг лойиҳада белгиланган талаблар даражасида бажарилаётгани билан яқиндан танишди.
Шу билан бирга, мактаб ҳудуди ва бинонинг санитария-гигиеник инфратузилмасини сифатли амалга ошириш зарурлигини, барча қурилиш ва реконструкция ишларини муваффақиятли якунлаш, янги ўқиш йилига мактаб биносини фойдаланишга топшириш юзасидан зарур тавсиялар берди.
Шу куни туман прокурори Баҳром Машарипов Бўзёп овулидаги 68-сонли умумтаълим мактабида “Қизкеткен махсус қурилиш” масъулияти чекланган жамияти қурувчилари томонидан олиб борилаётган реконструкция ишлари билан ҳам яқиндан танишди. Бино эшик ва деразаларининг зич ёпилиши, инфратузилма иншоотларининг сифатли ўрнатилиши, бино ҳудудидаги ободонлаштириш ишларининг лойиҳа ҳужжатларига қай даражада мослиги мониторинг қилинди.
Ўрганишлар жараёнида тумани прокурори бунёдкорлик ишлари икки сменада олиб борилаётган мазкур объектларда аниқланган камчиликларни бартараф этиш ва янги ўқув йилида юз фоиз тайёр ҳолда, энг муҳими, сифатли фойдаланишга топшириш бўйича масъулларга зарур тавсиялар берди.
Шунингдек, туман прокурори томонидан Ўзбекистон Республикаси Президентининг “Янги Ўзбекистон” массивларини қуриш ва ҳудудларнинг ижтимоий-иқтисодий ривожланишини таъминлаш чора-тадбирлари тўғрисида”ги Фармонида белгиланган вазифаларнинг амалий ижроси Амударё туманида қай даражада таъминланаётгани бўйича ҳам жойига чиққан ҳолда ўрганишлар олиб борилди.
Масъуллар айни пайтда мазкур Фармон асосида Манғит шаҳрининг Дўстлик маҳалласи ҳудудида барпо этилаётган “Янги Ўзбекистон” массивидаги кўп хонадонли уй-жойларнинг қурилиш-таъмирлаш ишлари, ижтимоий-маиший инфратузилмаси, қурилиш ишларининг экологик, санитария-гигиеник талабларга мувофиқлиги билан яқиндан танишди.
“Янги Ўзбекистон” массивида ҳар бири 30 та хонадонга мўлжалланган ва 5 қаватли бўлган 8 та кўп хонадонли турар жой бинолари қурилиши жадал суръатларда олиб борилмоқда.
Ўрганишлар жараёнида Баҳром Машарипов мазкур уй-жойларни барпо этаётган қурилиш ташкилотларининг қурувчи-муҳандислари, пудратчилар билан учрашиб, турар жойларнинг белгиланган лойиҳа талабларига тўлиқ жавоб берадиган даражада сифатли қурилиши, ўз вақтида фойдаланишга топширилиши юзасидан маслаҳат ва кўрсатмалар берди. Айниқса, аҳолининг маҳаллий турмуш тарзидан келиб чиқиб, уйларнинг ички ва ташқи инфратузилмасига, ободонлаштириш ишларига ҳамда массив ҳудудида жойлаштириладиган болалар ўйин майдончаларида хавфсизлик қоидаларига қатъий амал қилган ҳолда иш олиб бориш зарурлигини алоҳида таъкидланди.
Туман ҳудудида олиб борилаётган ижтимоий соҳа объектларидаги қурилиш-таъмирлаш ва реконструкция ишларини белгиланган лойиҳа талаблари даражасида амалга ошириш юзасидан назорат тадбирлари давом этмоқда.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
