МИЛЛИЙ КУРАШ БЎЙИЧА "ҒАЙРАТЛИ КЕКСАЛАР" МУСОБАҚАСИДА ҒАЙРАТЛИ-ШИЖОАТЛИ НУРОНИЙЛАР БЕЛЛАШДИЛАР
Президентимиз томонидан 2024 йил 25 ноябрда қабул қилинган “Камбағалликдан фаровонлик сари” дастурини амалга оширишга фаол нуронийларни жалб этиш чора-тадбирлари тўғрисида"ги Қарор ижросини таъминлаш, кекса авлод вакилларининг билим ва тажрибаларидан фойдаланган ҳолда оилаларни камбағалликдан чиқариш тизимини жорий этиш ҳамда “Камбағалликдан фаровонлик сари” дастурини амалга ошириш жараёнига фаол нуронийларни жалб этиш борасида тизимли ишлар амалга оширилмоқда. Уларнинг имкониятларидан самарали фойдаланиш ва маҳаллаларда соғлом турмуш тарзини тарғиб қилиш мақсадида ташкил этилаётган пиёда юриш маданиятини шакллантириш тадбирлари, нуронийлар ўртасида турли спорт мусобақалари ўтказилаётгани кекса авлод вакилларининг ижтимоий фаоллигини ошириш, саломатликларини мустаҳкамлаш имконини бермоқда.
Мазкур Қарорда белгиланган вазифаларни амалга ошириш мақсадида жорий йилнинг 14 август санасида “Нуроний” жамғармасининг Амударё туман бўлими томонидан “Ғайратли кексалар” шиори остида спортнинг миллий кураш тури бўйича соғлом турмуш тарзи тарғиботига бағишланган мусобақалар ўтказилди.
Кекса ёшдаги кишиларнинг ижтимоий фаоллигини ошириш, саломатликларини мустаҳкамлашга кўмаклашиш, уларнинг ҳамиша ҳаракатчан, ўзига эътиборли бўлишларини кундалик ҳаёт тарзига айлантиришларига ёрдам бериш мақсадида ташкиллаштирилган спорт мусобақаларида икки хил ёш тоифасидаги нуронийлар иштирок этишиб, ўзларининг нечоғли ғайратли-шижоатли эканликларини амалда намоён қилдилар.
Амударё туманининг барча овул ва маҳаллаларида истиқомат қилувчи ушбу мусобақада иштирок этиш истагини билдирган спортсевар ва ғайратли-шижоатли нуронийлар мусобақани ташкиллаштириш ва ўтказиш бўйича Низом талаблари билан таништирилди. Шундан сўнг барча овул ва маҳаллалардан 80 килограмгача ва 80 килограмдан юқори вазн тоифасидаги ғайратли нуронийлар саралаб олинди.
Мусобақа қизиқарли таассуротларга бой, дўстона ва самимий вазиятда ўтказилди. Ғолибларни аниқлашда тажрибали спорт тренерлари жалб этилиб, ҳар бир иштирокчининг миллий кураш спорти қоидаларига қай тарзда амал қилиши, курашиш услуби шаффофлик асосида баҳолаб борилди.
Якуний натижаларга кўра, 80 килограмгача бўлган вазн тоифасида Тўлқин овуллик энг ғайратли-шижоатли нуроний Кўклан Раҳимов 1-ўринни эгаллади. 2-ўрин жўшқин кайфиятли ва ғайратли нуроний Алишер Юлдашевга насиб этди. Ушбу вазн тоифасида Бойовул маҳалласи полвони, ғайратли-шижоатли нуроний Бахтиёр Эшимбетов 3-ўрин соҳиби бўлди.
Энг қизиқарли ва ҳаяжонли дақиқаларга бой тарзда ўтган 80 килограмдан юқори вазн тоифасидаги нуронийлар беллашувида Хизр эли маҳалласининг ғайратли-шижоатли нуроний полвони Қурбонбой Жуманиёзов 1-ўринни эгаллади. Шунингдек, ўзига хос кураш тушиш услубини намойиш этган Хитой овулидан келган ғайратли-шижоатли нуроний Норбой Урозов мусобақа шоҳсупасининг иккинчи поғонасидан жой олди. Ўрта қалъалик ғайратли-шижоатли нуроний полвон Давлатбой Эшниёзовга эса 3-ўрин насиб этди.
Мусобақада фахрли ўринларни эгаллаган нуронийлар ташкилотчилар томонидан диплом ва эсдалик совғалари билан тақдирландилар.
Ўз навбатида мусобақа иштирокчилари мамлакатимизда кекса авлод вакилларига кўрсатилаётган юксак эътибор ва уларнинг саломатликларини мустаҳкамлашга қаратилган ғамхўрликдан миннатдор эканликларини изҳор этишиб, мусобақа ташкилотчиларига бундан кейин ҳам доимий равишда мана шундай спорт тадбирларини ўтказиб туриш бўйича ўз таклифларини билдирдилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
