“Долзарб 90 кун” ёшларга янги имкониятлар эшигини очмоқда

Янги Ўзбекистонда ёшлар учун яратилаётган кенг имкониятлар ва уларга қаратилган эътибор ёшларнинг ташаббускорлиги ҳамда креатив ёндашувларида муҳим ўрин тутмоқда. Хусусан, Президент ташаббуси билан амалга оширилаётган “Долзарб 90 кун” лойиҳаси доирасида жойларда кенг кўламли ижтимоий-маданий тадбирлар ташкил этилмоқда.

Олий таълим муассасалари, умумтаълим мактаблари ва бошқа таълим-тарбия масканларида турли тўгараклар фаолияти йўлга қўйилиб, “Илғор ғоя”, “Менинг start-up лойиҳам”, “Долзарб 90 кун” каби видеоконференциялар ва семинарлар орқали ёшларнинг ижтимоий фаоллиги оширилмоқда. Бу каби жараёнлар талабаларни янгидан-янги маълумотлар билан бойитиш баробарида уларда ўз устида ишлашга кучли мотивация шакллантирмоқда.

Бу дастур доирасида амалга оширилаётган ташаббусларни маълум маънода бир-бирига боғланган занжир сингари, ёшларни етуклик сари етакловчи йўл деб аташ мумкин. Чунки ўзликни англай олиш — етуклик белгисидир. Бугун ижтимоий ҳаётда ўз ўрнини топишга интилганлар жамиятда тобора кўпаймоқда. Мазкур лойиҳа улар учун ўз салоҳиятини намоён этишга қулай имконият ва катта туртки бўлмоқда.

Жаҳондаги кўпгина мамлакатлар ўзининг билимга чанқоқ, зеҳни ўткир ёшлари билан ажралиб туриши бежиз эмас. Бу, аввало, таълим тизими ва ўқитиш методикасининг самарасидир. Шунингдек, болани ҳар томонлама ривожлантириш, унинг қизиқишларини қўллаб-қувватлаш — тўғри йўналишлардан бири. Бунда мусиқа ва санъат ҳамда спорт тўгараклари ёшларни маънан ва жисмонан етук шахслар этиб вояга етказади.

XXI аср – Ўзбекистон ёшлари дунё билан ҳамқадам бўлиши лозим. Бироқ айрим ёшлар технологик имкониятларни фақат кўнгилочар мақсадларда ишлатиши, китоб мутолаасидан воз кечиши уларнинг интеллектуал ривожига салбий таъсир кўрсатмоқда. Бу эса умумий маънавий муҳитга ҳам таъсир ўтказиши мумкин. Шу сабабли, ёшларда соғлом тафаккур, билимга чанқоқлик ва шахсий масъулиятни шакллантириш муҳим вазифадир.

“Долзарб 90 кун” лойиҳаси доирасидаги ташаббуслар бу каби муаммоларга амалий ечим сифатида хизмат қилмоқда. Агар инсон олдига мақсад қўйиб, унга аниқ муддат белгиласа, у ҳолда натижага эришиш учбурчаги юзага келади. Инсон ушбу учбурчакнинг асосий устунига айланиб, ҳаракат ва саъй-ҳаракат жараёнини кучайтиради. Бу эса натижанинг тез ва самарали бўлишига олиб келади.

Бугун рақамли технологиялар, сунъий интеллект орқали билим олиш ва ривожланиш имкониятлари кенгаймоқда. Шу жиҳатдан, мазкур 90 кунлик жараён ҳар бир ёш учун янги нафас, илҳом манбаи бўлиши, унинг қизиқишлари ва қобилиятини аниқлашда муҳим аҳамият касб этади.

Вақтни унумли фойдаланиш, креативлик билан ҳаракат қилиш — бугунги ёш авлоднинг асосий бурчидир. Биз қабул қилаётган ҳар бир қарор, ташланаётган ҳар бир қадам келажак пойдеворини мустаҳкамлайди.

Биз — ёшлар, ўзимизда янги чўққиларни забт этишга бўлган ирода ва ақл-идрокни шакллантиришимиз шарт. Чунки шу 90 кун мобайнида келажакда халқимизга манфаат келтирадиган, етук, лаёқатли кадр сифатида шаклланиш имконияти яратиляпти. Шунинг учун ҳар биримиз ўзимизнинг ички “мен”имизни уйғотайлик!

Зеро, ҳар бир инсон — бутун бир халқни ташкил этади. Унинг қилаётган амаллари эса келажак авлод тақдирига бевосита таъсир кўрсатади.

Машҳура Хайитбоева, Ўзбекистон давлат жаҳон тиллари университети талабаси.