“Ишбилармон аёл – 2025” кўрик-танловининг туман босқичи бўлиб ўтди

Бугунги кунда мамлакатимизда хотин-қизларнинг жамиятдаги ўрни ва нуфузи йил сайин мустаҳкамланмоқда. Уларнинг иқтисодий фаоллигини кучайтириш, тадбиркорлик салоҳиятини рўёбга чиқаришга алоҳида эътибор қаратилмоқда. Айниқса, “Аёллар дафтари” орқали моддий ва маънавий қўллаб-қувватланаётган аёлларнинг ўз йўлини топиши, тадбиркорлик фаолиятини бошлаб, бошқаларга ҳам йўл кўрсатиши амалдаги ислоҳотларнинг самарасидир. Бугун тадбиркор аёллар нафақат ўз оиласи, балки бутун жамият ривожига ҳисса қўшаётган катта кучга айланмоқда.

Ана шундай эзгу мақсадларнинг амалий ифодаси сифатида Тадбиркорлар ва ишбилармонлар ҳаракати – Ўзбекистон Либерал-демократик партияси Амударё туман Кенгаши ташаббуси ҳамда Оила ва хотин-қизлар туман бўлими ҳамкорлигида “Ишбилармон аёл – 2025” кўрик-танловининг туман босқичи юқори савияда ташкил этилди. Ушбу танлов аёлларни тадбиркорликка кенг жалб этиш, уларнинг ижтимоий-сиёсий фаоллигини ошириш, мамлакат тараққиётидаги ўрни ва масъулиятини юксалтиришда муҳим платформа вазифасини бажарди.

Танловда туман ҳокими ўринбосари, Оила ва хотин-қизлар бўлими раҳбари Гўзал Сабурова, партиянинг туман Кенгаши раҳбари Яхшимурод Аҳмедов, шунингдек, партиядан туман Кенгашига сайланган депутатлар Мадамин Казаков ва Муяссар Раҳматуллаева ҳамда тумандаги етакчи тадбиркор аёллар иштирок этди.

Тадбир давомида хотин-қизларнинг иқтисодий-ижтимоий жараёнлардаги ўрни, фаоллиги, ташаббускорлиги алоҳида эътироф этилди. Дарҳақиқат, аёлларнинг тадбиркорликка жалб этилиши оила даромадини оширади, фарзандлар таълими ва соғлиғи, яшаш даражасига ижобий таъсир кўрсатади, камбағалликни камайтиришга хизмат қилади.

Танлов доирасида ишбилармон, ташаббускор аёллар томонидан ишлаб чиқарилган маҳсулотлар кўргазмаси ҳам ташкил этилди. Унда тадбиркор, ҳунарманд ва томорқа ер эгалари ўз маҳсулотларини намойиш қилди. Маҳаллий ишлаб чиқарувчилар томонидан тайёрланган брендлар, тўқувчилик, бадиий безак санъати, қишлоқ хўжалиги маҳсулотлари, қўл меҳнати буюмлари ва миллий анъаналарни ифода этувчи ҳунармандчилик намуналари иштирокчилар ва меҳмонларда катта таассурот қолдирди.

Айниқса, кўргазмада миллий образлар акс этган қўғирчоқлар, юмшоқ ўйинчоқлар, эсдалик совғалари, тўқувчилик ва тикувчилик маҳсулотлари, ҳар хил нон ва нон маҳсулотлари, уй-рўзғор буюмлари кенг намойиш этилди.

Таъкидлаш жоизки, бугунги кунда Амударё туманида 70 нафардан ортиқ тадбиркор аёл турли йўналишларда фаолият юритмоқда. Танловда эса 30 нафар ташаббускор ва фаол тадбиркор аёл иштирок этди. Улар орасида “Аёллар дафтари”да туриб, давлат томонидан кўрсатилган ёрдам орқали ўз тадбиркорлигини бошлаган, бошқа хотин-қизларга ҳунар ўргатаётган, уларнинг иқтисодий мустақиллигига ёрдам бериб келаётган аёллар борлиги алоҳида эътироф этилди.

– Бу кўрик-танловда “Аёллар дафтари”да турган, моддий ва маънавий қўллаб-қувватланиш натижасида ўз тадбиркорлик фаолиятини йўлга қўйиб, бошқаларга ҳам ҳунар ўргатиш орқали жамият равнақига ҳисса қўшаётган аёллар иштирок этмоқда, – дейди туман ҳокими ўринбосари Гўзал Сабурова. – Бу – юртимизда хотин-қизларга қаратилган эътибор ва амалга оширилаётган кенг қамровли ислоҳотларнинг ёрқин самарасидир.

Танловни баҳолаш жараёнида ҳакамлар ҳайъати томонидан белгиланган мезонлар асосида ишбилармон аёлларнинг фаолияти холис баҳоланди. Айниқса, янги иш ўрни яратиш, “Аёллар дафтари”даги хотин-қизларни касб-ҳунарга ўргатиб уларнинг бандлигини таъминлаш, бизнесини экспортга йўналтириш каби омиллар муҳим мезон сифатида кўрилди.

Танловда иштирок этган ҳар бир аёл ўзининг амалий ишланмалари, ютуқлари, янги ғоялари ва келажакдаги режаларини тақдим этди. Натижаларга кўра, Дилдора Хайтбоева фахрли 1-ўринни эгаллаб, Қорақалпоғистон Республикаси босқичига йўлланма олди. 2-ўринга Тўлганой Худайбергенова ва Малика Худайбергенова лойиқ деб топилди. 3-ўрин эса Фатима Давлетова, Нилуфар Хўжаниёзова ва Саида Эсенбаеваларга насиб этди.

Танлов якунида ғолиб ва совриндорларга Тадбиркорлар ва ишбилармонлар ҳаракати – Ўзбекистон Либерал-демократик партияси Амударё туман Кенгаши томонидан диплом ва эсдалик совғалари топширилди. Шунингдек, бир гуруҳ фаол тадбиркор аёллар “Ташаккурнома”лар билан тақдирланди.

“Ишбилармон аёл – 2025” кўрик-танлови туман босқичи аёллар тадбиркорлигини рағбатлантириш, уларнинг салоҳиятини юзага чиқариш, ижтимоий-иқтисодий фаоллигини оширишга хизмат қилувчи самарали майдонга айланди. Бундай тадбирлар орқали ҳар бир аёл ўзини намоён этиш ва бошқалар учун намуна бўлиш имконига эга бўлмоқда.

Шоҳзод Қурбонбоев тайёрлади.