Ҳарбий хизматчиларнинг ота-оналари шарафланди

Мамлакатимизда ёш авлодни юксак ватанпарварлик, миллий ғурур ва юртга садоқат руҳида тарбиялашга катта эътибор қаратилмоқда. Айниқса, Ватан сарҳадлари ҳимоясида садоқат билан хизмат қилаётган ҳарбий хизматчиларни рағбатлантириш, уларнинг ота-оналарига ҳурмат кўрсатиш ва меҳнатини муносиб қадрлашга устувор аҳамият берилмоқда. Бу каби чора-тадбирлар Ватан ҳимоясида хизмат қилаётган ёшларни янада руҳлантиради.

Яқинда ана шундай тадбирлардан бири Амударё туманидаги Давлат хавфсизлик хизмати Чегара қўшинларига қарашли ҳарбий қисмда ташкил этилди. Унда мамлакатимиз сарҳадларида юрт ҳимояси йўлида садоқат билан хизмат қилаётган ҳарбий хизматчиларнинг ота-оналарига ҳурмат ва эътироф рамзи сифатида “Миннатдорлик хати” топширилди.

Тадбирда сўзга чиққан масъуллар томонидан ҳарбий хизмат — бу юрт, миллат ва халқ олдидаги юксак инсоний масъулият экани таъкидланди. Шунингдек, бугунги тинч ва осуда ҳаётимиз, мамлакат тараққиёти замирида ана шундай жасур ва интизомли ёшларнинг хизматлари мужассам экани алоҳида қайд этилди. Шу маънода, ҳар бир ота-она фарзандининг бу йўлдаги хизматидан фахр туяётгани эътироф этилди. Тадбир давомида Ўзбекистон Республикаси Давлат хавфсизлик хизмати раҳбарияти томонидан юборилган “Миннатдорлик хати” ўқиб эшиттирилиб, ҳарбий хизматчиларнинг ота-оналарига тантанали равишда топширилди.

Шу муносабат билан Тошкент вилоятидаги ҳарбий қисмда хизмат қилаётган кичик сержант Шоҳзод Ёдгоровнинг Ватан олдидаги бурчига садоқати, давлат чегараларини қўриқлашдаги жасорати, интизоми ва намунавий фаолияти юксак эътироф этилди. Унинг ота-онаси — Амударё туманида истиқомат қилувчи Фарҳод Хақназаров ва Мақсуда Юсуповаларга “Миннатдорлик хати” тантанали равишда топширилди.

Шунингдек, Жиззах вилоятидаги ҳарбий қисмда  ўз хизмат  бурчини ўтаётган кичик сержант Акмал Холбоевнинг фаолияти ҳам намуна сифатида қайд этилди. Унинг онаси — Амударё туманидаги Тўлқин овулида истиқомат қилувчи Насиба Сапарбоева ҳам шу мазмундаги “Миннатдорлик хати”ни фахр билан қабул қилиб олди.

Қашқадарё вилоятида хизмат қилаётган оддий аскар Олимбой Гулимбатовнинг ҳам Ватан олдидаги хизмати муносиб баҳоланди. Унинг ота-онаси — Амударё тумани Хитой овулида истиқомат қилувчи Анвар Айтбаев ва Гулчехра Каримоваларга ҳам Давлат хавфсизлик хизмати раҳбарияти томонидан “Миннатдорлик хати” топширилди.

Шубҳасиз, бундай тадбирлар юртимизда хизмат қилаётган ҳар бир ҳарбий хизматчи ва уларнинг оила аъзоларига фахр-ифтихор бағишлайди. Фарзандини Ватанга садоқатли, фидойи инсон сифатида тарбиялаган ота-оналар меҳнатининг эътироф этилиши — жамиятда инсон қадрини юксалтириш, она Ватанга муҳаббат ва садоқат туйғусини ёшлар қалбига мустаҳкам сингдиришга хизмат қилади. Бу эса, ўз навбатида, тинчлик ва осойишталикни таъминлаш, муқаддас Ватан сарҳадларини қўриқлашдек шарафли бурчни сидқидилдан адо этаётган юрт фарзандларини ҳар томонлама қўллаб-қувватлашга хизмат қилади.

Шоҳзод Қурбонбоев.