ИЮНЬ ОЙИДА ТУМАН ПЕНСИЯ ЖАМҒАРМАСИ ТОМОНИДАН 25 МИНГ 534 НАФАР ФУҚАРОГА 31,16 МЛРД СЎМ ПЕНСИЯ ҲИСОБЛАНДИ

Мамлакатимизда аҳолининг ижтимоий муҳофазасини кучайтириш, давлат ва жамият ҳаётида йиллар давомида амалга оширган фидойи меҳнатини рағбатлантириш, ёши улғайганида қадр-қимматини улуғлаш давлат сиёсатидаги устувор йўналишлардан бири саналади. Бу Янги таҳрирдаги Конституциямизнинг 46-моддасида ҳам ўз аксини топган. Унга кўра, “Ҳар ким қариганда, меҳнат қобилиятини йўқотганда, шунингдек, боқувчисини йўқотганда ва қонунда назарда тутилган бошқа ҳолларда ижтимоий таъминот олиш ҳуқуқига эга”. Шу боис, мамлакатимизда аҳоли турмуш даражасини оширишга қаратилган чора-тадбирлар кўламини кенгайтириш, фуқароларнинг даромадларини изчил ошириб бориш орқали уларнинг ижтимоий муҳофазасини кучайтиришга алоҳида эътибор қаратилади.

Бугунги кунда мамлакатимизда 4,5 млн. нафардан зиёд фуқаро турли тоифадаги пенсияларни олишади. Улардан салкам 216 минг нафари Қорақалпоғистон Республикасида истиқомат қилишади. Амударё туманида 25 минг 534 нафар пенсионерлар бўлиб, уларнинг пенсияларини ўз вақтида, қийинчиликларсиз олишларини таъминлашга қаратилган вазифалар ижроси давлатимиз томонидан доимий назоратда.

Айни пайтда туман Пенсия жамғармасида ҳисобда турувчиларнинг пенсия пулларини ўз вақтида, ҳеч қандай тўсиқларсиз олишлари учун зарур имкониятлар яратилган. Жорий йилнинг июнь ойида 25 минг 534 нафар фуқарога жами 31,16 млрд сўм пенсия пуллари тўланди. Шундан 19 минг 863 нафар фуқарога пластик карталар орқали 23,56 млрд сўм, 5 минг 671 нафар фуқарога эса нақд пул шаклида 7,6 млрд сўм беминнат етказиб берилди.

Пенсия таъминоти борасидаги янгиликлар ва ўзгаришлардан халқимизни вақтида хабардор қилиб бориш, фуқароларни қизиқтирган саволларга аниқ ва пухта жавоб бериш мақсадида туман Пенсия жамғармаси бўлимининг малакали мутахассислари томонидан мунтазам равишда тушунтириш ва тарғибот тадбирлари амалга оширилиб келинмоқда. Айниқса, Президент Қарор ва Фармонлари юзасидан аҳоли билан юзма-юз мулоқот тадбирлари ўзининг ижобий самарасини бериб, фуқаролар пенсия тайинлашдаги қулайликлардан ўз вақтида хабардор бўлишмоқда.

Ёшга доир пенсия тайинлаш борасидаги қулайлик туфайли 2025 йил 1 мартдан бошлаб пенсия ёшига етган фуқароларга пенсия “автоматик” тарзда, ҳеч қандай ҳужжат талаб қилмасдан, фуқароларнинг мурожаатисиз тайинланиб, фуқароларнинг шахсига оид барча маълумотлар вазирлик ва идоралар электрон базаларидан олинадиган бўлди. Тизимдаги бу ўзгариш пенсия тайинлаш борасидаги қоғозбозликларга, беҳуда оворагарчиликларга барҳам берибгина қолмай, халқимизнинг қимматли вақтини тежаш имконини яратди.

Жорий йил 2 июнда қабул қилинган, халқимиз, айниқса, пенсионерларнинг ижтимоий ҳимоясини кучайтиришга қаратилган “Иш ҳақи, пенсиялар, стипендиялар ва нафақалар миқдорини ошириш тўғрисида”ги Президент Фармони ва ушбу Фармондан келиб чиқадиган вазифалар, шунингдек, қандай ҳолатларда фуқарога кўпроқ, қандай ҳолатларда кам пенсия тайинланиши юзасидан ўтказилган тарғибот тадбирлари қизғин савол-жавоблар, мунозараларга бой тарзда ўтаётганидан аёнки, бу борада халқимизнинг ҳуқуқий маданияти ошиб бормоқда ва улар ўз келажагига бефарқ эмас.

Тизимда амалга оширилаётган изчил ислоҳотлар туфайли фуқароларга пенсия тайинлаш, фарзанд туғилганда бериладиган бир марталик нафақа, дафн маросими учун нафақа тайинлаш, пенсия ва нафақа олувчилар рўйхатида мавжудлиги ҳақидаги, пенсия ва нафақа миқдори тўғрисидаги маълумотномалар эндиликда Давлат хизматлари маркази ёки Ягона интерактив давлат хизматлари портали орқали берилаётгани тизимдаги бюрократик тўсиқларга барҳам берди ва фуқароларнинг оворагарчилигига чек қўйди.

Бундан ташқари, Ўзбекистон Республикаси Президентининг 2025 йил 27 майдаги “Ногиронлик пенсиялари ва компенсацияларни тайинлашда проактив хизматларни жорий этиш тўғрисида”ги Қарорига кўра, “Ўзбекистон — 2030” стратегиясини амалга ошириш доирасида аҳолига давлат пенсиялари ва компенсацияларни тайинлаш тартибини такомиллаштириш орқали пенсия олувчилар ва ногиронлиги бўлган шахсларнинг ижтимоий хизматлардан фойдаланиш имкониятлари янада кенгайтирилмоқда.

Унга асосан фуқароларга ногиронликни белгилаш муносабати билан пенсияларни алоҳида мурожаат талаб этмаган ҳолда проактив шаклда тайинлаш ҳамда фуқарога проактив шаклда тайинланган пенсияларни рад қилиш ҳуқуқининг берилиши, айрим тоифадаги шахсларга компенсацияларни электрон маълумотлар алмашинуви асосида проактив шаклда тайинлаш, фуқаронинг пенсия миқдорини ҳар икки йилда проактив шаклда қайта ҳисоблаш, пенсияларни тайинлаш ва тўлаш тартиб-таомилларини рақамлаштириш орқали ногиронлик пенсиялари ва компенсацияларни олувчилар учун қулай имкониятлар яратилмоқда.

“Инсон қадри учун” тамойили асосида туман Пенсия жамғармаси бўлими мутахассислари халқ орасида бўлиб, Президент Фармон ва Қарорларининг мазмун-моҳияти, пенсионерлар, ногиронлик нафақасини олувчи шахслар учун бериладиган солиқ имтиёзлари, қариганда яхши пенсия олиш учун қандай ҳужжатлар зарурлиги юзасидан ўтказилаётган очиқ мулоқот тадбирлари орқали фуқаролар ўз ҳуқуқ ва бурчларини чуқур англаб олишларига яқиндан ёрдам беришмоқда.

РОБИЯ ЙЎЛДОШЕВА.