Амударё туманида коррупцияга қарши курашиш масалалари муҳокама қилинди

Бугунги кунда коррупция нафақат бир тизимнинг, балки бутун жамиятнинг энг асосий муаммоларидан бирига айланган. У жамият тараққиётини секинлаштиради, инсонлар орасидаги ишончни емиради, давлат ва фуқаролар ўртасида масофа пайдо қилади. Айнан шунинг учун ҳам мамлакатимизда коррупцияга қарши курашиш давлат сиёсатининг устувор йўналишига айлантирилган.

Шу мақсадда Амударё туманида кенг қамровли чора-тадбирлар амалга оширилмоқда. Яқинда туман ҳокимлигида ўтказилган навбатдаги йиғилиш ҳам айнан шу долзарб масалага бағишланди. Мазкур йиғилишда Қорақалпоғистон Республикаси Вазирлар Кенгашининг Коррупцияга қарши ички назорат бўлими бошлиғи Батир Матмуратов ҳамда Бош прокуратура ҳузуридаги Иқтисодий жиноятларга қарши курашиш департаменти Қорақалпоғистон Республикаси бошқармаси бўлим бошлиғи Рашид Садиков иштирок этди ва мавзу юзасидан атрофлича маъруза қилди. Йиғилишга туман Иқтисодий жиноятларга қарши курашиш департаменти масъуллари, ҳоким ўринбосарлари, депутатлар, маҳаллалар раислари, ҳоким ёрдамчилари жалб этилди.

Батир Матмуратов ўз чиқишида коррупцияга қарши курашиш борасида давлатимиз раҳбари томонидан илгари сурилган стратегик вазифаларга алоҳида эътибор қаратди. У коррупция – жамият ривожига қарши қаратилган яширин тўсиқ эканини, унга қарши фақат қоғоздаги чора-тадбирлар билан эмас, балки амалий ишлар, очиқлик ва ҳалоллик орқали курашиш зарурлигини таъкидлади.

Қайд қилинганидек, коррупциянинг илдизи кўп ҳолларда оддий бефарқликдан, лоқайдликдан бошланади. Ҳар бир ходим ўз виждони олдида масъулиятни ҳис қилмаса, ҳеч қандай қонун уни ҳалол бўлишга мажбур қила олмайди.

Тадбир давомида йиғилиш иштирокчиларига коррупцияга қарши курашишга оид махсус видеоролик намойиш этилди. Унда коррупциянинг давлатга, иқтисодиётга, энг муҳими оддий инсонлар ҳаётига қандай таъсир ўтказиши аниқ мисоллар билан ёритилди.

Видеоролик намойишидан кейин очиқ мулоқот бўлиб ўтди. Унда мутасаддилар ва ташкилот раҳбарлари ўз фикрларини билдирдилар, мавжуд муаммолар ва уларни бартараф этиш йўллари хусусида баҳс-мунозара юритилди. Йиғилиш иштирокчилари коррупцияга қарши курашиш борасида ҳар бир ходимнинг шахсий масъулияти муҳим ўрин тутишини яна бир бор англаб етдилар.

Батир Матмуратов Амударё туманидаги коррупцияга қарши курашиш ҳолатини нафақат йиғилиш доирасида, балки жойларга чиққан ҳолда ҳам ўрганди. Хусусан, у 36-сонли умумтаълим мактаби, Бойовул маҳалласи ва Туман тиббиёт бирлашмасида бўлиб, бу ерда давлат хизматларининг шаффофлиги, мурожаатлар билан ишлаш тартиби, ички назорат тизимининг самарадорлиги каби жиҳатларни ўрганди.

Ташриф давомида тиббиёт муассасасида аҳолига кўрсатилаётган хизмат сифати, навбатларни самарали бошқариш, дорихона ва лаборатория тизимининг очиқлиги, тиббий ходимларнинг ҳалоллик меъёрларига амал қилиши алоҳида таҳлил қилинди. Жойлардаги мулоқотлар давомида аниқланган муаммолар юзасидан мутасаддиларга аниқ кўрсатмалар, тавсиялар ва таклифлар берилди.

Бугун ҳар бир мутасаддининг олдида турган энг катта вазифа ҳалоллик тамойилларини шунчаки тарғиб қилиш эмас, балки амалда унга риоя этиш, ҳалол меҳнат қилиш ва эл ишончини оқлашдир. Амударё туманида ўтказилган ушбу йиғилиш ва жойлардаги ўрганишлар айнан шу ёндашувни амалда таъминлашга хизмат қилди.

Чарос Арслонова, туман ҳокимлигининг Ахборот хизмати раҳбари.