Аҳолини тоза ичимлик суви билан таъминлаш – давлат сиёсатининг устувор йўналиши
Давлатимиз раҳбарининг махсус қарорига асосан Осиё тараққиёт банки иштирокида Амударё туманида Манғит сув тозалаш иншоотини қуриш бўйича пудратчи ташкилот “Оби ҳаёт инжиниринг” билан 12,99 млн. долларлик шартнома имзоланган эди. Шартнома доирасида кунига 40 минг куб метр сувни тозалаш қувватига эга бўлган бўлган иншоотни қуриш назарда тутилган. Айни кунларда ҳажми 66,5 минг куб метр бўлган сув тиндириш ҳавзаси, 1- ва 2-кўтарма насос станциялари, горизонтал сув тиндиргичлар, хлорлаш ва фильтрлаш станциялари, реагент хўжалиги, ҳажми 3 минг куб метр бўлган 2 дона резервуар ва лаборатория-диспетчерлик корпусини қуриш ишлари жадал суръатларда олиб борилмоқда.
19 май куни ушбу сув тозалаш иншооти қурилиши жараёнлари билан танишиш мақсадида оммавий ахборот воситалари вакиллари учун пресс-тур ташкил этилди. Унда Қорақалпоғистон Республикаси Вазирлар Кенгаши Ахборот хизмати масъуллари, Ўзбекистон миқёсидаги телеканалларининг Қорақалпоғистондаги мухбирлари, республикада фаолият олиб бораётган ОАВ вакиллари ҳамда соҳа масъуллари иштирок этди. Тадбир доирасида журналист ва мухбирлар қурилиш давом этаётган объектга ташриф буюриб, амалга оширилаётган ишлар билан бевосита танишди.
Пресс-тур мобайнида "Қорақалпоқ сув таъминоти" АЖнинг бошқарув раиси Қаллибек Халмуратов ОАВ вакилларига “Манғит сув тозалаш иншооти”нинг қурилиши аҳолининг ичимлик сувига бўлган талабини қаноатлантиришда қанчалик муҳим аҳамият касб этиши хусусида маълумот бериб ўтди.
Таъкидланганидек, давлатмиз раҳбарининг Амударё, Беруний, Қораўзак, Қўнғирот, Нукус ва Мўйноқ туманларидаги аҳоли ва хўжалик юритувчи субъектларнинг сифатли ичимлик суви таъминотини янада яхшилаш, шунингдек, Осиё тараққиёт банки билан ҳамкорликни кенгайтириш мақсадида “Осиё тараққиёт банки иштирокида “Ўзбекистоннинг ғарбий қисмида ичимлик суви таъминоти тизимларини ривожлантириш” лойиҳасини амалга ошириш чора-тадбирлари тўғрисида” қарори бу борадаги ишларда муҳим дастуруламал бўлмоқда.
Пресс-тур якунида Амударё тумани ҳокимлигининг мажлислар залида матбуот анжумани бўлиб ўтди. Унда “Қорақалпоқ сув таъминоти” акциядорлик жамияти директори Қаллибек Халмуратов сўзга чиқиб, сув таъминоти тизимини янада такомиллаштириш борасида олиб борилаётган ислоҳотлар ижроси юзасидан жамият томонидан амалга оширилаётган лойиҳалар, истиқболдаги режалар ва истеъмолчилар учун яратилаётган қулайликлар ҳақида батафсил маълумот берди.
Қайд этиш жоизки, юртимизда аҳолининг турмуш фаровонлигини ошириш, соғлом турмуш тарзини таъминлаш ҳамда экологик муаммоларни бартараф этиш борасида бир қатор ислоҳотлар амалга оширилмоқда. Хусусан, аҳолига сифатли ва хавфсиз ичимлик суви етказиб бериш масаласи давлат сиёсатининг устувор йўналишларидан бири сифатида белгиланмоқда. Мамлакатимизда сув ресурсларининг чекланганлиги ва иқлим ўзгаришлари натижасида ичимлик сувига бўлган эҳтиёж тобора ортиб бормоқда. Шу боис, сўнгги йилларда сув таъминоти тизимини модернизация қилиш, янги сув иншоотларини қуриш ва мавжудларини реконструкция қилиш бўйича кўплаб лойиҳалар амалга оширилмоқда.
Қолаверса, аҳолини тоза ичимлик суви билан таъминлаш борасида халқаро молиявий институтлар, жумладан, Жаҳон банки, Осиё тараққиёт банки, Европа тикланиш ва тараққиёт банки билан ҳамкорликда йирик инвестиция лойиҳалари амалга оширилмоқда. Бу эса илғор технологияларни жорий этиш, энергия тежамкор ускуналарни ўрнатиш ва хизмат кўрсатиш сифатини оширишга хизмат қилмоқда.
Матбуот анжумани давомида журналистлар ўзларини қизиқтирган саволларга жавоб олди ва мавжуд муаммоларни бартараф этиш бўйича фикрлар билдирилди.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
