Пахтадан юқори ҳосил олишга қаратилган семинар бўлиб ўтди
Амударё туманининг Оқ Олтин овулида жойлашган “Якупова Гавҳар” фермер хўжалигида 2025 йил ҳосили учун чигит экилган майдонларда қатор орасига ишлов бериш, чуқур юмшатиш, озиқлантириш ва суспензия сепиш каби агротехник тадбирларни уюшқоқлик билан, тизимли тарзда ташкил этиш бўйича семинар ўтказилди.
Семинарга Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев, Қорақалпоғистон Республикаси Жўқорғи Кенгесининг қўмита раиси Анвар Жуманазаров, Ўзагроинспекциянинг Қорақалпоғистон Республикаси бошқармаси бошлиғи Арслон Юсупов, Амударё тумани ҳокими Собир Хўжаметов ва фермер хўжаликлари раҳбарлари қатнашдилар.
Семинар давомида сўзга чиққанлар ғўзанинг соғлом ўсиши, юқори ҳосил бериши ва зараркунанда ҳамда касалликларга чидамли бўлиши учун агротехник тадбирларнинг ўз вақтида ва сифатли бажарилиши муҳим эканлигини, агротехник тадбирлар ичида қатор ораларига ишлов бериш, суспензия сепиш, чуқур юмшатиш ва озиқлантириш муҳим ўрин тутиши хусусида сўз юритдилар.
Айтиш жоизки, қатор ораларига ишлов бериш — бу бегона ўтларни йўқотиш ва тупроқни юмшатишга хизмат қиладиган агротехник тадбирдир. Ғўзанинг дастлабки ривожланиш босқичларида қатор ораларини культивация қилиш орқали бегона ўтлар билан курашилади, тупроқда намлик сақланишига кўмаклашилади, илдизларнинг яхши ривожланишига шароит яратилади. Илк ишловлар ғўза 3-4 ҳақиқий барг чиқариши билан бошланади ва вегетация давомида бир неча маротаба такрорланади.
Суспензия сепиш ўсимлик барглари орқали озиқлантириш ва ҳимоя қилиш учун микроэлементлар ва кимёвий моддаларни майда томчилар ҳолида сепиш жараёнидир. Бунда, микроэлементлар ишлатилади, фунгицидлар ва инсектицидлар қўлланилади, натижада ғўзанинг бардошлилиги ошади, ҳосилдорлик кўпаяди. Ғўзани барг орқали озиқлантиришга қаратилган бу усул тез таъсир кўрсатиши билан аҳамиятлидир.
Ғўзани чуқур юмшатиш – тупроқнинг 25–30 см чуқурликкача ишлов берилиш жараёни бўлиб, ушбу тадбирни амалга ошириш орқали илдиз тизимининг чуқурроқ ривожланишига шароит яратилади, тупроқнинг зич қатламлари очилиб, ёмғир ёки оқар сув сингишига ёрдам беради. Бу усул одатда вегетациянинг ўрталарида, механик ишловлар оралиғида қўлланилади.
Семинар мобайнида жорий йилги пахта хомашёсидан юқори ҳосил олиш учун ушбу агротехник тадбирларни самарали ташкил этиш бўйича маслаҳатлар, таклиф, тавсия ҳамда кўрсатмалар берилди.
Фермер хўжаликлари раҳбарларлари ҳам ўз тажрибалари билан ўртоқлашиб, ғўза парваришида қўлланаётган турли агротехник усуллар ва технологиялар ҳақида ўзаро фикр алмашдилар.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
