Маҳаллада жиноят ва ҳуқуқбузарликларнинг олдини олиш – хавфсиз ва осойишта ҳаёт гарови

Бугунги кунда мамлакатимизда жамоат хавфсизлиги ва ижтимоий барқарорликни таъминлашга давлат сиёсатининг устувор йўналишларидан бири сифатида қаралмоқда. Маҳалла тизими орқали жиноятчилик ва ҳуқуқбузарликларнинг олдини олиш, фуқароларнинг ҳуқуқий маданиятини ошириш, ёшларни ёт ғоялардан асраш борасидаги ишлар янги босқичга олиб чиқилмоқда.

Ўзбекистон Республикаси Президентининг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори бу борада муҳим дастуруламал бўлиб хизмат қилмоқда.

Амударё туманида ушбу қарор ижросини таъминлаш юзасидан амалга оширилаётган ишлар масъул раҳбарлар томонидан мувофиқлаштирилиб борилмоқда.

Қорақалпоғистон Республикаси Ички ишлар вазири ўринбосари Тергов бошқармаси бошлиғи полковник Музаффар Раҳматуллаев томонидан туманда жиноятчилик ва ҳуқуқбузарликларнинг олдини олиш борасидаги ишлар ўрганилди. Ўрганишлар мобайнида туман Давлат хизматлари маркази биносида фуқаролар билан сайёр қабули ўтказилди.

Сайёр қабул мобайнида 18 нафар фуқаролардан турли масалалар юзасидан мурожаатлар қабул қилинди. Муаммоли масалаларнинг ижобий ҳал этилиши юзасидан туман ИИБ масъулларига тегишли топшириқ ва кўрсатмалар берилди.

Шунингдек фуқаролик паспортини олиш билан боғлиқ муаммоли масалалар ижобий ҳал этилиб, 4 нафар фуқароларга янгидан фуқаролик паспортлари берилди.

Масъул раҳбарлар Куюк кўпир овулида “Маҳалла еттилиги” масъуллари томонидан ҳудудда жиноят ва ҳуқуқбузарликлар профилактикаси борасида амалга оширилаётган ишлар ҳолати ўрганилди. Ҳудудда шу вақтгача содир этилган жиноятларнинг келиб чиқиш сабаблари, унга имкон яратиб берган шарт-шароитлар таҳлил қилинди. Аниқланган муаммолар, мавжуд камчиликлар танқид қилиниб, уларни бартараф қилиш юзасидан тегишли топшириқ ва кўрсатмалар берилди.

Шу ўринда таъкидлаш жоизки, маҳалла – жамиятнинг асосий бўғини бўлиб, у ерда ҳар бир фуқаронинг яшаши, ишлаши, фарзанд тарбияси билан боғлиқ асосий муаммоли масалалар ечимини топади. Шу боис жиноят ва ҳуқуқбузарликларнинг олдини олишда маҳалла фаоллари, профилактика инспекторлари, хотин-қизлар фаоллари ҳамда нуронийларнинг ҳамкорлиги жуда муҳимдир. Бу борада маҳалла масъуллари ҳамкорликдаги фаолиятининг тўғри ташкил этилиши натижасида ҳудудларнинг криминоген вазияти яхшиланади ҳамда жиноят ва ҳуқуқбузарликлардан ҳоли ҳудудга айланишига замин яратилади.

Маҳалла масъуллари билан суҳбат чоғида профилактик тадбирларни кўпроқ ўтказиш, хусусан, хавф остида бўлган шахслар билан доимий мулоқотда бўлиш, уларнинг муаммоларини аниқлаб, ижтимоий ёрдам кўрсатиш, ёшларни қонунларга ҳурмат руҳида тарбиялаш, аҳолининг ҳуқуқий саводхонлигини ошириш муҳимлиги қайд қилинди. Маҳалла посбонлари ва фаоллар орқали маҳалладаги муаммоли ҳудудларни назорат қилиш, видеокузатув тизимларини жорий этиш, спорт, маданият, санъат ва касб-ҳунар тўгараклари орқали ёшларнинг салбий иллатларга берилишининг олдини олиш, шу йўл билан жиноятчилик ва ҳуқуқбузарликларни камайтириш лозимлиги хусусида тушунтиришлар олиб борилди.

Маҳаллада хавфсиз муҳит яратиш – ҳар бир фуқаронинг осойишта ҳаёт кечириши, болаларимизни тинч ва барқарор жамиятда вояга етказиш учун замин яратади. Бу борада ҳар бир фуқародан ҳушёрлик, фаоллик ва масъулият талаб этилади.

Чарос Арслонова, туман ҳокимлигининг Ахборот хизмати раҳбари.